28-Feb-2022

ବରଗଡ(ପ୍ରେରଣା ଖବର): ବିକାଶ ଟେକ୍ନିକାଲ୍ କ୍ୟାମ୍ପସ୍ ଅନ୍ତର୍ଗତ ବିକାଶ ଡିଗ୍ରୀ ମହାବିଦ୍ୟାଳୟ ରେ ଜାତୀୟ ବିଜ୍ଞାନ ଦିବସ ଅବସରରେ ‘ବିସ୍ମୟ - ୨୦୨୨’ ଶୀର୍ଷକ ସାଇନ୍ସ୍ ଏଣ୍ଡ୍ ଟେକ୍ନୋଲୋଜି ଫେୟାର୍ ସଫଳତାର ସହିତ ଅନୁଷ୍ଠିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ବିକାଶ ଗ୍ରୁପ୍‌ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା ମୁଖ୍ୟ ଅତିଥି ରୂପରେ ଯୋଗଦେଇ ସାଇନ୍ସ୍ ଫେଷ୍ଟ୍ କୁ ଉଦ୍‌ଘାଟନ କରିଥିଲେ ଏବଂ ତାଙ୍କ ଅଭିଭାଷଣରେ ଆଧୁନିକ ଯୁଗର ବିଜ୍ଞାନ କୁ ପୁରାତନ ଯୁଗର କଳା କୌଶଳ ସହିତ ତୁଳନା କରିଥିଲେ । ଏହି ଅବସରରେ ହୀରାକୁଦ ୱାଇଲ୍ଡ୍ ଲାଇଫ୍ ବିଭାଗର ଡି.ଏଫ୍‌.ଓ. ଶ୍ରୀମତୀ ଅଂଶୁପ୍ରଜ୍ଞା ଦାସ ମୁଖ୍ୟ ବକ୍ତା ଭାବରେ ଯୋଗଦେଇ ଛାତ୍ରଛାତ୍ରୀଙ୍କ ସହିତ ଭାବର ଆଦାନପ୍ରଦାନ କରିଥିଲେ । ବିଜ୍ଞାନର ପରିଭାଷା, ଦୂରଦୃଷ୍ଟି ଏବଂ ଏକବିଂଶ ଶତାବ୍ଦୀର ଛାତ୍ରଛାତ୍ରୀମାନଙ୍କର ଭୂମିକା ଉପରେ ଦିଗ୍‌ଦର୍ଶନ ଦେଇଥିଲେ । ଏକ୍‌ଜିକ୍ୟୁଟିଭ୍ ଡାଇରେକ୍ଟର୍ ଶ୍ରୀ ଡି.ନାଗେଶ୍ୱର ରାଓ ତାଙ୍କ ଉଦ୍‌ବୋଧନରେ ବିସ୍ମୟ ୨୦୨୨ ଭଳି ସୁନ୍ଦର କାର୍ଯ୍ୟକ୍ରମର ସଫଳ ଆୟୋଜନ ପାଇଁ ଛାତ୍ରଛାତ୍ରୀଙ୍କ ସମେତ ଅଧ୍ୟାପକ-ଅଧ୍ୟାପିକାବୃନ୍ଦଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ । ଡାଇରେକ୍ଟର୍ ଡ.ସମରେନ୍ଦ୍ର ନାଥ ପଣ୍ଡା ସ୍ୱାଗତ ଭାଷଣରେ ବିସ୍ମୟ ୨୦୨୨ ର ଆଭିମୁଖ୍ୟ ଉପସ୍ଥାପିତ କରିବା ସହିତ ବିକାଶ ଅଣ୍ଡର୍ ଗ୍ରାଜୁଏଟ୍ କୋର୍ସେସ୍ ଅନ୍ତର୍ଗତ ବିଜ୍ଞାନ ଛାତ୍ରଛାତ୍ରୀଙ୍କର ଶୃଙ୍ଖଳିତ ପରିଶ୍ରମ ଓ ଜିଜ୍ଞାସୁ ମନସ୍ତତ୍ୱର ପ୍ରଶଂସା କରିଥିଲେ । ଟେକ୍ନିକାଲ୍ ସେସନ୍ ରେ ଛାତ୍ରଛାତ୍ରୀମାନେ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ଗଣିତ, ଉଦ୍ଭିଦ ବିଜ୍ଞାନ, ପ୍ରାଣୀ ବିଜ୍ଞାନ, ମନୋବିଜ୍ଞାନ ତଥା ଇଣ୍ଟିଗ୍ରେଟେଡ୍ ଏମ୍‌.ଏସ୍‌ସି. ବିଭାଗରୁ ମୋଟ୍ ୨୨ଟି ପ୍ରକଳ୍ପ ପ୍ରଦର୍ଶିତ ହୋଇଥିଲା । ତନ୍ମଧ୍ୟରୁ ଉଦ୍ଭିଦ ବିଜ୍ଞାନ ବିଭାଗ ର ଡିଏନ୍‌ଏ ଫିଙ୍ଗର୍ ପ୍ରିଣି୍ଟଂ ଏବଂ ହାଇଡ୍ରୋଫୋନିକ୍ ଫାର୍ମିଂ, ପ୍ରାଣୀ ବିଜ୍ଞାନ ବିଭାଗ ର ହେମୋଡାଇଲିସିସ୍‌,  ଗ୍ରେଟ୍ ବେରିଅର୍ ରିଫ୍‌, ରସାୟନ ବିଜ୍ଞାନର ସଷ୍ଟେନେବଲ୍ ସିଟି, ପଦାର୍ଥ ବିଜ୍ଞାନ ବିଭାଗର ହାଇପର୍ ଲୁପ୍‌, ସ୍ପେକ୍ଟ୍ରୋାଫୋଟୋମିଟର୍‌, ଅଲଟ୍ରାସୋନିକ୍ ସେନ୍ସର୍‌, ଗଣିତ ବିଭାଗ ର ସର୍ଟେଷ୍ଟ୍ ପାଥ୍‌, ପ୍ରିଡେଟରୀ ପ୍ରେ ମଡେଲ୍‌, ମନୋବିଜ୍ଞାନର ସାଇକୋଫିଜିକ୍ସ୍‌, ଇଣ୍ଟିଗ୍ରେଟେଡ୍ ଏମ୍‌.ଏସ୍‌ସି. ବିଭାଗର ସେନ୍ସର୍ ସିକ୍ୟୁରିଟି ସିଷ୍ଟମ୍ ଇତ୍ୟାଦି ଉଲ୍ଲେଖନୀୟ । ସୂଚନା ଥାଉକି, ଜାତୀୟ ବିଜ୍ଞାନ ଦିବସ ଉପଲକ୍ଷେ ବିଜ୍ଞାନ ବିଭାଗର ଛାତ୍ରଛାତ୍ରୀମାନେ ବିଜ୍ଞାନ ଗବେଷଣା ଏବଂ ବିଜ୍ଞାନ ଉପରେ ଆଧାରିତ ଖେଳ ପ୍ରଦର୍ଶନ କରିଥିଲେ, ଯାହା ଅତିଥିଙ୍କ ଦ୍ୱାରା ଉଦ୍‌ଘାଟିତ ହୋଇଥିଲା ଓ ଉଚ୍ଚ ପ୍ରଶଂସିତ ହୋଇଥିଲେ । ଉକ୍ତ କାର୍ଯ୍ୟକ୍ରମରେ ବିକାଶ ଅନ୍ତର୍ଗତ ବିଭିନ୍ନ ଅନୁଷ୍ଠାନର ଅଧ୍ୟକ୍ଷ, ଉପାଧ୍ୟକ୍ଷ ଏବଂ ଅଧ୍ୟାପକ-ଅଧ୍ୟାପିକାବୃନ୍ଦ ଉପସ୍ଥିତ ଥିଲେ । ଏହି କାର୍ଯ୍ୟକ୍ରମକୁ ବିକାଶ ଉଚ୍ଚ ମାଧ୍ୟମିକ ବିଦ୍ୟାଳୟ, ଆବାସିକ ବିଦ୍ୟାଳୟ, ୟୁଜି କ୍ୟାମ୍ପସ୍‌ର ଛାତ୍ରଛାତ୍ରୀମାନେ ପରିଦର୍ଶନ କରି ନୂତନ ଜ୍ଞାନକୌଶଳ ଆହରଣ କରିଥିଲେ । ଉକ୍ତ କାର୍ଯ୍ୟକ୍ରମକୁ ସଫଳ କରିବା ପାଇଁ ଅଧ୍ୟାପକ ଶ୍ରୀ ଆଦିତ୍ୟ ପ୍ରଧାନ, ଶ୍ରୀ ଅଙ୍କିତ ପଣ୍ଡା, ଶ୍ରୀ ଅବ୍‌ଦୁଲ୍ ଫରିଦ୍ ଖାନ୍‌, ଶ୍ରୀ ଦେବାଶିଷ ରଥ, ଡ.ଶୁଭେନ୍ଦୁ ତ୍ରୀପାଠୀ, ଡ.ଶକ୍ତି ମିଶ୍ର ପ୍ରମୁଖ ଭୂମିକା ଗ୍ରହଣ କରିଥିଲେ । ଉପାଧ୍ୟକ୍ଷ ଶ୍ରୀ ଆର୍‌.ଏସ୍‌.ଭି. କ୍ରୀଷ୍ଣା ଙ୍କ ତତ୍ୱାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଉଦ୍ଭିଦ ବିଜ୍ଞାନ ର କୋଅର୍ଡିନେଟର୍ ଶ୍ରୀ ସୁଦାମ ମିଶ୍ର ଧନ୍ୟବାଦ ଅର୍ପଣ କରିଥିଲେ ।