24-Feb-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ):  ଆଜି ବେଲପଡାସ୍ଥିତ ନବୋଦୟ ସ୍କୁଲ୍ ର ଜଣେ ଦ୍ଵାଦଶ ଶ୍ରେଣୀର ଛାତ୍ରୀ ସ୍କୁଲ୍ ରୁ ବାହାରି ପଳାଉଥିବାବେଳେ ସ୍ଥାନୀୟ ଲୋକଙ୍କ ଦ୍ବାରା ଉଦ୍ଧାର କରାଯାଇଛି । ଏହି ଘଟଣାକୁ ସ୍କୁଲ୍ ର ବିଶୃଙ୍ଖଳାର ଚରମ ନମୁନା ବୋଲି କାହିଁକି କୁହାଯିବନାହିଁ ବୋଲି ଲୋକେ ବିଭିନ୍ନ ଚର୍ଚ୍ଚା ଆରମ୍ଭ କରିଦେଇଛନ୍ତି । ଏ ସମ୍ପର୍କରେ ସ୍କୁଲ୍ କର୍ତ୍ତୃପକ୍ଷଙ୍କ ଠାରୁ ଚେଷ୍ଟା କରାଯାଥିବା ସତ୍ତ୍ୱେ କୌଣସି ପ୍ରତିକ୍ରିୟା ମିଳିପାରିନାହିଁ ।

ପ୍ରକାଶ ଯେ , ଶ୍ରେଣୀରେ ପାଠପଢା ଚାଲିଥିବାବେଳେ ସ୍କୁଲ୍ ରେ ଛାତ୍ରଛାତ୍ରୀଙ୍କୁ ମୋବାଇଲ୍ ଫୋନ୍ ରଖିବାକୁ ମନାଥିବା ସତ୍ତ୍ୱେ , ଉକ୍ତ ଛାତ୍ରୀଙ୍କର ଫୋନ୍ ବାଜିବାରୁ ଶ୍ରେଣୀଶିକ୍ଷକ ଆକଟ କରିଥିଲେ । ଏଇ କାରଣ ଯୋଗୁଁ ରାଗଅଭିମାନରେ ଛାତ୍ରୀଜଣକ ସ୍କୁଲ୍ ରୁ ବାହାରି ରାସ୍ତାକୁ ଦୌଡି ଦୌଡି ପଳାଇଯାଇଥିଲେ ତ ସ୍ଥାନୀୟ ଭଦ୍ରବ୍ୟକ୍ତିଙ୍କ ନଜରରେ ପଡିବାରୁ ତାଙ୍କୁ ବୁଝାଇସୁଝାଇ ସ୍କୁଲ୍ କୁ ଫେରାଇଆଣିଥିବା ପ୍ରକାଶ । ଏହି ଛାତ୍ରୀଜଣକର ଘର କଣ୍ଟାବାଞ୍ଜି ଅଞ୍ଚଳରେ ବୋଲି ଜଣାପଡ଼ିଛି ।

ତେବେ ଏହି ଘଟଣା କେନ୍ଦ୍ରୀୟ ଯୋଜନାରେ ଚାଲିଥିବା ନବୋଦୟସ୍କୁଲ୍ ଓ ଏହାର ଆବାସିକ ବ୍ୟବସ୍ଥା ବା ଛାତ୍ରଛାତ୍ରୀଙ୍କ ହଷ୍ଟେଲର୍ ପରିଚାଳନା , ଖାଦ୍ୟପେୟ , ଶିକ୍ଷକ / ଶିକ୍ଷୟିତ୍ରୀଙ୍କର ବ୍ୟବହାର ଓ ଶୃଙ୍ଖଳା ଇତ୍ୟାଦି ପ୍ରତି ପୁଣିଥରେ ଜନସାଧାରଣଙ୍କର ସନ୍ଦେହ ସୃଷ୍ଟି ହୋଇଛି । ପ୍ରକାଶଯୋଗ୍ୟ ଯେ, କିଛିବର୍ଷ ତଳେ ଏହି ବେଲପଡା ନବୋଦୟସ୍କୁଲ୍ ର ବିଭିନ୍ନ ସମସ୍ୟା ଚର୍ଚ୍ଚାରେ ରହିଥିଲା । ଏପରିକି କିଛିବର୍ଷ ତଳେ ଜଣେ ଛାତ୍ର ବାହାରର ଏକ ଗଛରେ ଝୁଲି ଆତ୍ମହତ୍ୟା କରିଥିବା ଶୁଣିବାକୁ ମିଳୁଛି । ଏଣୁ ଏହି ସ୍କୁଲ୍ ର ପରିଚାଳନା ଓ ଅନୁଶାସନ ସମ୍ପର୍କରେ ଏକ ଉଚ୍ଚସ୍ତରୀୟ ତଦନ୍ତ ଦାବି କରାଯାଇଛି ।