24-Feb-2022

 ବରଗଡ:- ଅଙ୍ଗନବାଡି କର୍ମୀ ମାନେ ରାଜ୍ୟ ସରକାର ଙ୍କର ଏକ ପ୍ରକାର ର ଦର୍ପଣ କହିଲେ  ଅତ୍ୟୁକ୍ତି ହେବ ନାହିଁ । ସରକାର ଙ୍କର ପ୍ରଣୟନ ଯୋଜନା ଗୁଡିକ ଏହି କର୍ମୀ ମାନଙ୍କର ପ୍ରତ୍ୟକ୍ଷ ତତ୍ତ୍ୱାବଧାନରେ ତୃଣମୂଳ ସ୍ଥରରେ କାର୍ଯକାରୀ ହୋଇଆସୁଛି । ଗ୍ରାମ ମାନଙ୍କର ପ୍ରତ୍ୟେକ ସମସ୍ୟା ଓ ଅସୁବିଧା ପ୍ରଥମେ ଏହି କର୍ମୀ ମାନଙ୍କର ନଜର କୁଆସିଥାଏ । କହିବାକୁ ଗଲେ ତୃଣମୂଳ ସ୍ତରରେ ଏହି କର୍ମୀ ମାନେ ଅନବରତ ଭାବେ ଗ୍ରାମମାନଙ୍କ ସେବା କରି ଆସୁଛନ୍ତି । ହେଲେ ଅନେକ ସମୟରେ ଅନେକ ସ୍ଥାନରେ ଅଙ୍ଗନବାଡି ଦିଦି ମାନଙ୍କୁ ନାନା ପ୍ରକାର ମାନସିକ ନିର୍ଯ୍ୟାତନା ଦେଉଥିବା ଅନେକ ଉଦାହରଣ ମଧ୍ୟ ରହିଛି । ତଥାପି ସେମାନେ ସ୍ୱଳ୍ପ ବେତନରେ  ନିଜର କାର୍ଯ୍ୟ ସମ୍ପାଦନ କରି ଆସୁଛନ୍ତି । ବିଗତ ଦିନରେ ସାମାଜିକ ଗଣମାଧ୍ୟମରେ ଏହି ଦିଦି ମାନଙ୍କର ଚରିତ୍ର

ସଂହାର କରିବା ଭଳି ଏକ ଭିଡିଓ  ସୋସିଆଲ ମିଡ଼ିଆ ରେ ଘୁରି ବୁଲୁଛି । ଜଣେ ଅଜଣା ବ୍ୟକ୍ତି ଗୀତ ମାଧ୍ୟମରେ ଅଙ୍ଗନବାଡି ଦିଦି ମାନଙ୍କ ଚରିତ୍ର ସଂହାର କରି ସେମାନଙ୍କୁ ଅପମାନିତ କରୁଥିବାର ଦେଖିବାକୁ ମିଳିଛି । ଏହି ଭିଡିଓ ଟି ବହୁଳ ମାତ୍ରାରେ ସାମାଜିକ ଗଣମାଧ୍ୟମରେ ବୁଲିବା ଦ୍ୱାରା ନିଜକୁ ଅପମାନିତ ମନେ କରୁଥିବା ଅଙ୍ଗନବାଡି ଦିଦି ମାନେ ଆଜି ବରଗଡ଼ ଜିଲ୍ଲାର ବିଭିନ୍ନ ଥାନା ରେ ଉକ୍ତ ଅଜଣା ବ୍ୟକ୍ତି ବିରୁଦ୍ଧରେ ଅଭିଯୋଗ କରିଛନ୍ତି । ଏହି ପରିପ୍ରେକ୍ଷୀରେ ପାଇକମାଲ ବ୍ଲକ ଅଞ୍ଚଳ ରେ କାର୍ଯ୍ୟରତ ଅଙ୍ଗନବାଡ଼ି କର୍ମୀ ମାନେ ପାଇକମାଲ ଥାନାରେ ଏସ.ଆଇ  ଚୁମକି ପ୍ରଭା ନାଥ ଙ୍କୁ ଲିଖିତ ଅଭିଯୋଗ କରି ତୁରନ୍ତ ଅପରାଧୀ ଙ୍କୁ ଧରିବା ସହିତ ତା ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ  ଗ୍ରହଣ କରିବାକୁ ନିବେଦନ କରିଥିଲେ । ଏହା ସହିତ ଜିଲ୍ଲା ଅଙ୍ଗନବାଡି ସଂଘ ତରଫରୁ ଆଜି ଏହି ମାମଲାରେ ବରଗଡ଼ ଆରକ୍ଷୀ ଅଧିକ୍ଷକ ଙ୍କ ନିକଟରେ ମଧ୍ୟ ଅଭିଯୋଗ କରାଯିବ ବୋଲି ସୂଚନା ମିଳିଛି ।