18-Feb-2022

ବଲାଙ୍ଗୀର :(ମଳୟ ମିଶ୍ରଙ୍କ ରିପୋର୍ଟ ) ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଏଇ ଦୁଇଦିନ ମଧ୍ୟରେ ଦ୍ବିତୀୟପର୍ଯ୍ୟାୟ ଭୋଟଗ୍ରହଣ ସୁଦ୍ଧା ଯାହା ଦେଖାଯାଇଆସୁଛି , ଟଙ୍କା , ମଦମାଂସ ଓ ବଳଶାଳୀନେତାଙ୍କ ପ୍ରଚ୍ଛନ୍ନ ଧମକଚମକ ଦ୍ବାରା ଭୋଟ ହାତେଇବା ଚାଲିଛି । ଗାଁ' ଗାଁ'ରେ ଟଙ୍କା ଦେଇ ଭୋଟ କିଣାଯାଉଛି । ମଦଭାଟି ବା ମଦଦୋକାନ ବନ୍ଦ ରହି ଡ୍ରାଇ ଡେ' କୁହାଯାଉଥିଲେ ହେଁ , ଏତେ ମଦ ମିଳୁଛି କେଉଁଠୁ  ?  ପୁଲିସ୍ ଗାଡିରେ ଓ ପୁଲିସ୍ କର୍ମଚାରୀଙ୍କ ନାଁ'ରେ ଭୋଟରଙ୍କୁ ଟଙ୍କା ବଣ୍ଟା ଧରାପଡୁଛି । ପ୍ରଥମପର୍ଯ୍ୟାୟର ଭୋଟଗ୍ରହଣ ପୂର୍ବରୁ ପାଟଣାଗଡ ବ୍ଲକ୍ ର  ପାଣ୍ଡେସରା ଓ ମସିଣାଛାପର ଦୁଇଟି ଗ୍ରାମରେ ଏଭଳି ଘଟିଥିବା ଲୋକଲୋଚକୁ ଆସିଛି । କେତେକ ଅସାଧୁପ୍ରକୃତିର ଲୋକଙ୍କୁ ମତାଇ ଗାଁ' ଅବରୋଧ କରାଯାଇ ବୁଥ୍ କ୍ୟାପ୍ ଚର ଭଳି ଘଟଣା ଘଟିଥିବା ଶୁଣାଯାଇଛି । ପ୍ରଥମ ପର୍ଯ୍ୟାୟରେ ଭୋଟଗ୍ରହଣ ବେଳେ ପାଟଣାଗଡ ବ୍ଲକ୍ ର ଗଙ୍ଗାସାଗର ସାଲେପାଲି ଗ୍ରାମରେ ଏଭଳି ହୋଇଥିବା ଶୁଣିବାକୁ ମିଳିଥିଲା । ଅନ୍ୟାନ୍ୟ ସ୍ଥାନରେ ମଧ୍ୟ ଅନୁରୂପ ବିଶୃଙ୍ଖଳା ଘଟିଥିବା ଅଭିଯୋଗ ହୋଇଥିଲେ ହେଁ , ନିର୍ବାଚନଅଧିକାରୀ ବା ପ୍ରଶାସନ ଏସବୁ ପ୍ରତି ଆଖିବୁଜି ଦେଇଥିବା ଅଭିଯୋଗ ହେଉଛି । ଖୋଦ୍ ସରକାରୀଦଳର ଲୋକେ , ବିଧାୟକଙ୍କ ବିରୋଧରେ ଏଭଳି ଗୁରୁତର ନିର୍ବାଚନଆଚରଣବିଧି ଉଲଙ୍ଘନର ଅଭିଯୋଗକୁ ଅଣଶୁଣା କରିଦିଆଯାଇଛି । ଆଜି ଦ୍ୱିତୀୟଦିନରେ ସବୁଠୁଁ ରାଜନୀତିସଚେତନ ଲୋଇସିଂହା ବିଧାନସଭା ନିର୍ବାଚନମଣ୍ଡଳୀର ଲୋଇସିଂହା , ପୁଇଁତଳା ଓ ଆଗଲପୁର ତିନୋଟି ବ୍ଲକ୍ ରେ କ'ଣ ଘଟୁଛି , ଜଣାପଡିପାରି ନଥିଲେ ହେଁ , ବିଭିନ୍ନ ଅଘଟଣ ଓ ବିଶୃଙ୍ଖଳାର ଆଶଙ୍କାକୁ ଏଡାଇଦେଇ ହେଉନାହିଁ ।

ବାହୁବଳୀ ରାଜନେତା ଓ ତାଙ୍କବଳରେ ବଳୀୟାନ୍ ଉଦ୍ ଭ୍ରାନ୍ତ ଯୁବବାହିନୀ , କେନ୍ଦ୍ର ଶାସକଦଳ ବିଧାୟକଙ୍କ ପତିଆରାପାଇଁ ପ୍ରାଣମୂର୍ଚ୍ଛା ଲଢେଇ  , ଚିରଅସନ୍ତୁଷ୍ଟ ନିରାଶନେତାଙ୍କ କୂଟନୀତିକ ଚାଲ୍ ଓ  ରାଜ୍ୟ ଶାସକଦଳର ଆଗକୁ ଟିକେଟ୍ ଆଶାୟୀ ଯୁବନେତାଙ୍କ ସଂଗ୍ରାମ ଇତ୍ୟାଦି ଭିତରେ ଅତୀତର ବିଚିତ୍ର ଗତିପ୍ରକୃତିର ଅତିସମ୍ବେଦନଶୀଳ ଲୋଇସିଂହା ବିଧାନସଭା ମଣ୍ଡଳୀର ଭୋଟଗ୍ରହଣ ଯେ ସହଜରେ ଅବାଧ ଓ ସ୍ବଚ୍ଛ ପ୍ରକ୍ରିୟାରେ ସମ୍ପନ୍ନ ହେବ , ଏ ନେଇ ନାନାଦି ଆଶଙ୍କା ରହିଛି ।

ଆଗକୁ ରହିଛି ଆଉ ତିନୋଟି ପର୍ଯ୍ୟାୟର।ଭୋଟଗ୍ରହଣ । 

ତେଣୁ ଏଭଳି ଧର୍ମକୁ ଆଖିଠାରମାରି ଧନବଳ , ବାହୁବଳ ଓ ପୂର୍ବରୁ ସଂରକ୍ଷଣ ଭଳି ପଛୁଆବର୍ଗ ଓ  ଆଦିବାସୀଙ୍କ ଅସନ୍ତୋଷ ଆଦି କୂଟନୈତିକ ପ୍ରସଙ୍ଗ ମଧ୍ୟରେ ହେଉଥିବା ତ୍ରିସ୍ତରୀୟପଞ୍ଚାୟତ ନିର୍ବାଚନର ଗଣତନ୍ତ୍ରର ବାଟମାରଣାର କୁଫଳ ଆଗାମୀଦିନରେ ଲୋକଙ୍କୁ ହିଁ ଭୋଗିବାକୁ ପଡିବ । ଏଣୁ ପ୍ରତ୍ୟେକ ଭୋଟର ଭାବିଚିନ୍ତି ସଠିକ୍ ପ୍ରାର୍ଥୀଙ୍କୁ ଭୋଟ ଦେବାକୁ ପରାମର୍ଶ ଦିଆଯାଇଛି ।