30-Sep-2020

ଖୁଣ୍ଟା: ଖୁଣ୍ଟା ବ୍ଲକର ଶିମିଳିପାଳ ଅଭୟାରଣ୍ୟ ପାଦ ଦେଶରୁ ଦଶ କିମି ମଧ୍ୟରେ ଥିବା ୮ଗୋଟି କ୍ରସରକୁ ଖୁଣ୍ଟା ତହସିଲଦାର ସିଲ କରିଦେଇଥିବା ଜଣାପଡିଛି। ଉକ୍ତ ଦଶ କିମି ମଧ୍ୟରେ ଥିବା ଇଲାକା ଇକୋ ସେନସିଟିଭ ଜୋନ ହୋଇଥିବାରୁ ମୟୂରଭଞ୍ଜ ଜିଲାପାଳ କପ୍ତିପଦା ଉପଜିଲାପାଳଙ୍କୁ ନିର୍ଦେଶ ଦେବାପରେ ଏହି ପଦକ୍ଷେପ ନିଆଯାଇଥିବା ଜଣା ପଡିଛି। ଜାତୀୟ ଗ୍ରୀନ ଟ୍ରିବ୍ୟୁନାଲ(ଏନଜିଟି) ଶିମିଳିପାଳରୁ ୧୦ କିମି ଦୂରତାକୁ ଇକୋ ସେନସିଟିଭ ଜୋନ ଘୋଷଣା କରିଥିବାରୁ ତା ମଧ୍ୟରେ ଥିବା ଉକ୍ତ କ୍ରସର ଗୁଡିକ ନିର୍ଦ୍ଧାରୀତ ସମୟରେ ଏନଜିଟିର ଅନୁମତି ପତ୍ର ଦାଖଲ କରିପାରିନଥିବାରୁ ୮ଗୋଟି କ୍ରସରକୁ ସିଲ କରାଯାଇଥିବା ତହସିଲଦାର ସ୍ମରଣ କୁମାର ପୃଷ୍ଟି କହିଥିଲେ। ତେବେ ମୟୂରଭଞ୍ଜ ଜିଲା କ୍ରସର ମାଲିକ ସଂଘର ସଭାପତି ପ୍ରକାଶ କର ମହାପାତ୍ର ତୀବ୍ର ପ୍ରତିକ୍ରିୟା ପ୍ରକାଶ କରି ଏହାକୁ ଜିଲା ପ୍ରଶାସନର ଅଗଣତାନ୍ତ୍ରିକ ଓ ବେଆଇନ ପଦକ୍ଷେପ ବୋଲି କହିଛନ୍ତି। ଶାସକ ଦଳର ନେତାଙ୍କ ଚାପରେ ପ୍ରଶାସନ ପରିଚାଳିତ ହେଉଥିବା ସେ ଗୁରୁତର ଅଭିଯୋଗ କରିଛନ୍ତି। କ୍ରସର ଗୁଡିକୁ ଅନୁମତି ମିଳିବା ପୂର୍ବରୁ ଏନଜିଟିର ନିୟମ ଥିବା ବେଳେ ପୂର୍ବର ଜିଲାପାଳ ଓ ଡିଏଫ ମାନେ କେମିତି ଉକ୍ତ ୧୦ କିମି ମଧ୍ୟରେ କ୍ରସର ସ୍ଥାପନ ପାଇଁ ଅନୁମତି ପ୍ରଦାନ କରିଥିଲେ। ସେହିପରି କ୍ରସର ଗୁଡିକ ପାଇଁ ଉଦ୍ଦିଷ୍ଟ ଅନୁମତି ପତ୍ରର ନିୟମିତ ନବୀକରଣ କେମିତି ହେଉଛି ବୋଲି ସେ ପାଲଟା ପ୍ରଶ୍ନ କରିଛନ୍ତି। କ୍ରସର ଗୁଡିକ ବନ୍ଦ କରାଗଲେ ମାଲିକ ମାନେ କ୍ଷତି ସହିବା ସହ ତା ଉପରେ ନିର୍ଭର କରୁଥିବା ଖୁୁଣ୍ଟା ତହସିଲ ସମେତ,ବାଙ୍ଗିରିପୋଷି, କୁଳିଆଣା, ଶାମାଖୁଣ୍ଟା, ବଡସାହି ଇତ୍ୟାଦି ତହସିଲର ଶହଶହ ଗରିବ ଶ୍ରମିକ ଜୀବିକା ହରେଇବେ ସେ ବୋଲି କହିଛନ୍ତି। ଏଥିମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ କେନ୍ଦ୍ରକୁ ୧୦ କିମି ପରିବର୍ତ୍ତେ ଇକୋ ସେନସିଟିଭ ଜୋନକୁ ୧କିମିକୁ ହ୍ରାସ କରାଯିବାକୁ ଗତ ମାର୍ଚ୍ଚ ମାସରେ ଚିଠି ଦ୍ୱାରା ପ୍ରସ୍ତାବ ଦିଆଯାଇଥିବା ଜଣା ପଡିଛି। ଆଜିର କାର୍ୟ୍ୟାନୁଷ୍ଠାନରେ ତହସିଲଦାରଙ୍କ ସହ ରାଜସ୍ୱ ପରିଦର୍ଶକ ବ୍ରଜ ବିହାରୀ ସାହୁ, ରାଜସ୍ୱ ନିରୀକ୍ଷକ ଜ୍ୟୋତିପ୍ରକାଶ ଗିରି ଓ ଖୁଣ୍ଟା ପୁଲିସ ସାମିଲ ହୋଇଥିଲେ। ତେବେ ନୀତି ନିୟମ ଓ ରାଜନୈତିକ ଛକାପଞ୍ଝା ମଧ୍ୟରେ ଆଗକୁ କଣ ଘଟୁଛି ଦେଖିବାକୁ ବାକିରହିଲା।