02-Dec-2021

ବରଗଡ/ଅତାବିରା:- ପାଖାପାଖି ଦୁଇବର୍ଷ ହେଲା ଚାଷୀଙ୍କୁ ମିଳିନାହିଁ  ବିକ୍ରି ଧାନର ମୂଲ୍ୟ ।ବର୍ତ୍ତମାନ  ପରିସ୍ଥିତିରେ  ଚାଷୀ ଦୁଇବର୍ଷ ହେଲା ତାର ବିକ୍ରି ଧାନର ମୂଲ୍ୟ ପାଇ ନଥିବା ବେଶ ଚର୍ଚ୍ଚାର ବିଷୟ ହେଇଛି। ଚାଷୀଙ୍କ  ସମସ୍ୟା କୁ ନେଇ ଅନେକ କଥା ଖବର କାଗଜରେ ,ଟି ଭି ରେ  ପ୍ରକାଶିତ ଓ ପ୍ରସାରିତ ହେଉଛି।କେଉଁଠି ଚାଷୀଙ୍କ ଧାନ  ବିଲରେ ନଷ୍ଟ ହେଲା କାଳ ବୈଶାଖୀ ର ପ୍ରଭାବରେ  ତ ଆଉ କେତେବେଳେ ସରକାରଙ୍କ ଟୋକନ ବ୍ୟବସ୍ଥା ରେ ଚାଷୀ ଛନ୍ଦି ହୋଇ ଧାନ ବିକ୍ରି କରି ନ ପାରିବା,ରୋଗ ପୋକ ଜନିତ ଫସଲ କ୍ଷୟକ୍ଷତି ଇତ୍ୟାଦି ଇତ୍ୟାଦି। ହେଲେ ଧାନ ବିକ୍ରି କରିଥିବା ସତ୍ତ୍ୱେ ଦୁଇ ବର୍ଷ ଧରି ଧାନର ମୂଲ୍ୟ ପାଇ ନଥିବା ଏକ ନୂଆଁ ଘଟଣା,ଯାହା ଘଟିଛି ବରଗଡ଼ ଜିଲ୍ଲା ଅତାବିରା ବ୍ଲକ ରେ। ଯେତେବେଳେ  କରୋନା  ମହାମାରୀର ପ୍ରଥମ ଲହରରେ ଜନ ଜୀବନ ଅସ୍ତବ୍ୟସ୍ତ ହୋଇ ପଡ଼ିଥିଲା, ଲୋକେ ଘରୁ ବାହାରକୁ ବାହାରୁ ନଥିଲେ , ସେଇ ସମୟରେ ନିଜ ଜୀବନକୁ ଭ୍ରୁକ୍ଷେପ  ନ କରି ଚାଷୀ ମାନେ ଚାଷ କରିଥିଲେ ହାଡ଼ ଭଙ୍ଗା ପରିଶ୍ରମ କରି।ଧାନ ଅମଳ ସମୟରେ ଶ୍ରମିକ ଅଭାବ ରହିଥିଲା। ବାହାର ଜିଲ୍ଲାରୁ ଶ୍ରମିକ ଆସୁନଥିଲେ।ଯଦି ବା ଜୀବିକାର୍ଜନ ପାଇଁ କେହି କାମପାଇଁ ଆସିବାକୁ ଚାହୁଁଥିଲା ଯାନ ବାହନ ଚଳାଚଳ ବନ୍ଦ ଥିଲା,  ସରକାର ଘୋଷଣା କରିଥିଲେ ଗୋଟିଏ ବୋଲେରୋ ରେ  ମାତ୍ର ୪ ଜଣ ଶ୍ରମିକ ଆସିପାରିବେ ।ଶ୍ରମିକ ବାବଦକୁ ଏଇ ଚାଷୀ ମାନେ ବହୁ ପରିମାଣର  ଅର୍ଥ ରାଶି ଖର୍ଚ୍ଚ କରି ମହାମାରୀ ସମୟରେ ଧାନ ଅମଳ କରି ବିକିଥିଲେ । ସେଇ ଚାଷୀ ମାନେ ହେଲେ ଅତାବିରା ଟୋପ  ଖଲିଆପାଲି ର ଆନ୍ଧ୍ର ପଡ଼ା ସ୍ଥିତ ଭାଗ ଚାଷୀ କେ ଭେଙ୍କଟ ରେଡ୍ଡୀ , ଏମ୍ ଗୋପାଳ ରେଡ୍ଡୀ,ପି ଭି ଡି ମହେଶ୍ୱର,ଯକ୍କା ଭେଙ୍କେଟ ଲକ୍ଷ୍ମୀ ଓ ଲସ୍ତଲା ର  ମହେଶ ଅଗ୍ରୱାଲ। ପ୍ରକାଶ ଥାଉ କି ଗତ ୨୦୨୦ ଖରିଫ ଋତୁରେ ଏଇ ଭାଗ ଚାଷୀଙ୍କ ଧାନ ଜମି ମାଲିକଙ୍କ ନାମରେ ମାର୍କେଟ ରେ  ବିକ୍ରି ହୋଇ ସାରିଛି।ତାର ସମସ୍ତ ପ୍ରମାଣ ବି ରହିଛି।ହେଲେ ଆକାଉଣ୍ଟରେ ପଇସା ପଡୁନି ଆଜିଯାଏଁ।ଏଇ ଚାଷୀ ମାନେ ଜମି ମାଲିକଙ୍କୁ କର ଟଙ୍କା ମଧ୍ୟ  ନିଜ ହାତରୁ ପୈଠ କରି ସାରିଛନ୍ତି।ହେଲେ ନିଜେ ବିକି ଥିବା ଧାନ ର ମୂଲ୍ୟ ଆଜି ଯାଏ ପାଇ ନାହାନ୍ତି ।ଏତଦ୍ ବ୍ୟତୀତ ଏଥିପାଇଁ ସେମାନେ ମାର୍କେଟ ୟାର୍ଡ଼  ରୁ ଆରମ୍ଭ କରି ସମବାୟ ବ୍ୟାଙ୍କ୍ , ମିଲର୍ସ୍,ଯୋଗାଣ ବିଭାଗ ଅଧିକାରୀ ଙ୍କ ପାଖକୁ ଦୌଡ଼ି ଦୌଡ଼ି  ହଜାର ହଜାର ଟଙ୍କା ଖର୍ଚ୍ଚ କରି ଅର୍ଥହାନି  ସହ ପ୍ରାଣ ପୀଡl  ଭୋଗି ସାରିଛନ୍ତି। ଶେଷରେ ଜିଲ୍ଲାପାଳ ଙ୍କୁ ମଧ୍ୟ ଗତ ୨୦/୯/୨୧ ମେଲ ମାଧ୍ୟମରେ ଜଣାଇ ସାରିଛନ୍ତି। ସେମାନେ ବିଧାୟିକା ଙ୍କୁ ଭେଟି ଏହି ବିଷୟରେ ଅବଗତ କରାଇଥିଲେ।ଭୁବନେଶ୍ୱର ଗଲେ ସେଠାରେ ଏ କଥା ଉଠାଇବି  ଓ ଏହାର ସମାଧାନ ହେବା ବୋଲି ବିଧାୟିକା ପ୍ରତିଶ୍ରୁତି ଦେଇଥିବା ଏହି ଚାଷୀମାନେ କହନ୍ତି।  ହେଲେ କେହି ବି ତାଙ୍କ ସମସ୍ୟାର ସମାଧାନ କରିପାରି ନଥିବା ବଡ ଦୁଃଖ ର ବିଷୟ। କେ ଭେଙ୍କଟ ରେଡ୍ଡୀ ଙ୍କ ୨୮୦ କ୍ଵିଣ୍ଟାଲ ୨୮ କେଜି,ଏମ୍ ଗୋପାଳ ରେଡ୍ଡୀ ଙ୍କ ୮୯ କ୍ଵିଣ୍ଟାଲ ୮୦ କେଜି,ପି  ମହେଶ୍ୱର ଙ୍କ ୧୨୬ କ୍ଵିଣ୍ଟାଲ ୨୬ କେଜି, ଯକ୍କା ଭେଙ୍କେଟ୍ ଙ୍କ ୧୪୫ କ୍ଵିଣ୍ଟାଲ ୬୦ କେଜି,ମହେଶ ଅଗ୍ରୱାଲ ଙ୍କ ୧୦୮ କ୍ଵିଣ୍ଟାଲ ୧୪ କେଜି  ଧାନର ମୋଟ ମୂଲ୍ୟ ୧୩ ଲକ୍ଷ ୭୭ ହଜାର ୯୧୧ ଟଙ୍କା  ମିଳିନାହିଁ।ଏତେ ଗୁଡିଏ ଟଙ୍କା ପାଇ ନଥିବା ଚାଷୀଙ୍କ  ମାନସିକ ସନ୍ତୁଳନ ନଷ୍ଟ ହେବା ସ୍ଵାଭାବିକ କଥା। କିନ୍ତୁ ଆଶାରେ ମଣିଷ ବଞ୍ଚିରହେ,ଆଜି ଏକଥା ଏଇ ଭାଗ ଚାଷୀ ମାନେ ପ୍ରମାଣିତ କରିଛନ୍ତି ଦୀର୍ଘ ଦିନ ଧରି ଆଶାରେ ବଞ୍ଚିରହି।ତଥାପି ଏମାନଙ୍କ  ସମସ୍ୟା କୁ ଆଜି ଯାଏ କେହି ବୁଝି ତାର ଉଚିତ ପଦକ୍ଷେପ ଉଠାଉ ନ ଥିବା  ସାଧାରଣରେ ପ୍ରଶ୍ନବାଚୀ ସୃଷ୍ଟି କରୁଛି।ତେବେ ଏମାନେ ଜୀବିତ ଥାଉ ଥାଉ ନିଜ  ଧାନ ର ମୂଲ୍ୟ ପାଇବେ ତ?