12-Nov-2021

ନର୍ଲା (ସଞ୍ଜୀବ ଦାସ) ରାଜ୍ୟର ଅଗ୍ରଣୀ ସଂସ୍ଥା ଦେବଗିରି ସାଂସ୍କୃତିକ ଅନୁ୍‌ଷ୍ଠାନର ୨୯ତମ ବାର୍ଷିକ ଉତ୍ସବ ତଥା କୁମାରସ୍ୱାମୀ ମହୋତ୍ସବ ଆସନ୍ତା ୧୭ରୁ ୧୯ ତାରିଖ ଯାଏଁ ଆୟୋଜିତ ହେବ । ଏହି ଅବସରରେ ବିଭିନ୍ନ ବିଭାଗରେ ଏବର୍ଷର ସମ୍ମାନ ଘୋଷଣା କରାଯାଇଛି । ବିଶିଷ୍ଟ ସଂସ୍କୃତିବିତ୍ ତଥା ସଂଗଠକ ହରେକୃଷ୍ଣ ଭୋଇଙ୍କୁ ଅନୁଷ୍ଠାନର ସର୍ବୋଚ୍ଚ ସମ୍ମାନ ‘ଦେବଗିରି ସମ୍ମାନ’ ପ୍ରଦାନ କରାଯିବ । ନର୍ଲା ବ୍ଲକ୍ ମାଣ୍ଡେଲ ଗ୍ରାମରେ ଜନ୍ମିତ ଶ୍ରୀ ଭୋଇ ଜଣେ ସଂସ୍କୃତି ସଂଗଠକ ଭାବରେ ସାରା ଦେଶରେ ପରିଚିତ । ପୂର୍ବରୁ ସେ ସଂସ୍କାର ଭାରତୀର ଜିଲ୍ଲା ଓ ରାଜ୍ୟ ନେତୃତ୍ୱ ନେଇ ସଫଳ ହୋଇଥିବା ବେଳେ ସଂପ୍ରତି ସର୍ବଭାରତୀୟ ଲୋକକଳା ଟୋଲିର ସଦସ୍ୟ ଅଛନ୍ତି ।ଦେଶର ବିଭିନ୍ନ ସ୍ଥାନରେ ସାମାଜିକ, ସାଂସ୍କୃତିକ, ଛାତ୍ର ସଂଗଠନରେ ମଧ୍ୟ ସେ ଅଗ୍ରଣୀ ଭୂମିକା ନେଇଛନ୍ତି । ସେହିପରି  ରାଜ୍ୟର ପ୍ରଥମ ଅଧ୍ୟାପିକା ପର୍ବତାରୋହୀ ସୁଶ୍ରୀ ଲିପ୍‌ସାମୟୀ ଦୁବେଙ୍କୁ ଦେବଗିରି ଯୁବ ସମ୍ମାନ ପ୍ରଦାନ କରାଯିବ । ରାଜ୍ୟର ବିଭିନ୍ନ ପତ୍ରପତ୍ରିକାରେ ତାଙ୍କ କବିତା ପ୍ରକାଶିତ ହେବାସହ ବିଭିନ୍ନ କ୍ଷୁଦ୍ର ଚଳଚ୍ଚିତ୍ରରେ ଅଭିନୟ କରି ସେ ଲୋକପ୍ରିୟ ହୋଇପାରିଛନ୍ତି ।

ବିଶିଷ୍ଟ କବି ସୁରେଶ ସାଗରଙ୍କୁ ଏବର୍ଷର ଦେବଗିରି ସାହିତ୍ୟ ସମ୍ମାନ ପ୍ରଦାନ କରାଯିବ । ‘ଅଜ୍ଞାତବାସ’, ‘ଅନ୍ତରଙ୍ଗ ଆକାଶ’ ଆଦି କବିତା ସଂକଳନର ସ୍ରଷ୍ଟା ଶ୍ରୀ ସାଗରଙ୍କ କବିତାରେ ଥାଏ ସ୍ୱପ୍ନ, ପ୍ରେମ ଓ ଜୀବନବୋଧର କଥା । ସେହିପରି ଦେବଗିରି ଶିକ୍ଷା ସମ୍ମାନ ପାଇବେ ନର୍ଲାରୋଡ଼ ଜୟଦୁର୍ଗା ହାଇସ୍କୁଲ୍‌ର ବରିଷ୍ଠ ଶିକ୍ଷକ, ବିଜ୍ଞାନ ଲେଖକ ତଥା ଗବେଷକ ସନ୍ତୋଷ କୁମାର କର । ଅନେକ ଜାତୀୟ ସ୍ତରୀୟ ବିଜ୍ଞାନ ପରିଯୋଜନାରେ ସେ ସଦସ୍ୟ ରହିଥିବା ବେଳେ ଜାତୀୟ ଓ ଅନ୍ତର୍ଜାତୀୟ ବିଜ୍ଞାନ କାର୍ଯ୍ୟକ୍ରମ ପରିଚାଳନା କରିଛନ୍ତି । ବିଶିଷ୍ଟ ସମାଜସେବୀ ଦୀପକ ରଂଜନ ସାହୁଙ୍କୁ ଚଳିତ ବର୍ଷର ଦେବଗିରି ସମାଜସେବା ସମ୍ମାନ ପ୍ରଦାନ କରାଯିବ । ଜୁନାଗଡ଼ ନିବାସୀ ଶ୍ରୀ ସାହୁ ନିଜସ୍ୱ ଅଙ୍ଗଦାନ କରିବା ସହ ରକ୍ତଦାନ, ଗରିବ ପିଲାଙ୍କୁ ପାଠପଢ଼ାରେ ସାହାଯ୍ୟ, ବୃକ୍ଷରୋପଣ, ଆଦିବାସୀ ଅଧ୍ୟୁଷିତ ଅଂଚଳରେ ବସ୍ତ୍ର ବଣ୍ଟନ ଆଦି କାର୍ଯ୍ୟ ନିୟମିତ ଭାବେ କରିଆସୁଛନ୍ତି । ସଂପ୍ରତି ଓଡ଼ିଶା ସରକାରଙ୍କ ନାନୋ ୟୁନିକର୍ନ୍ ପ୍ରକଳ୍ପରେ ଅବୈତନିକ ସଦସ୍ୟ ଭାବେ ଯୁବ ଉଦ୍ୟୋଗୀମାନଙ୍କୁ ମାର୍ଗଦର୍ଶନ କରୁଛନ୍ତି । ଏହି ଅବସରରେ ଭାରତୀୟ ସେନାରେ କାର୍ଯ୍ୟରତ ଯବାନ୍ ଭୂପେନ୍ଦ୍ର ଦୀପଙ୍କୁ ଦେବଗିରି ଦେଶସେବା ସମ୍ମାନ ଏବଂ ବିଶିଷ୍ଟ ନାଟ୍ୟକାର, ନିର୍ଦ୍ଦେଶକ ତଥା ଘୁମୁରା ଗୁରୁ କୈଳାସ ଚନ୍ଦ୍ର ନାଏକଙ୍କୁ ଦେବଗିରି ନାଟ୍ୟ ସମ୍ମାନ ପ୍ରଦାନ କରାଯିବ । କଳାହାଣ୍ଡି ଜିଲ୍ଲା ନର୍ଲା ବ୍ଲକ୍ ଅନ୍ତର୍ଗତ ବୁଢ଼ୀପଦରଠାରେ  ହେବାକୁଥିବା ମହୋତ୍ସବରେ ଉକ୍ତ ପ୍ରତିଭାମାନଙ୍କୁ ସମ୍ବର୍ଦ୍ଧିତ କରାଯିବ । ଏହି ଅବସରରେ ପାରଂପରିକ ଲୋକଗୀତ, ଲୋକନୃତ୍ୟ ତଥା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ବୋଲି ଅନୁଷ୍ଠାନର ସଭାପତି ସଂଜୟ ଧଙ୍ଗଡ଼ାମାଝୀ ଓ ସାଧାରଣ ସଂପାଦକ ସୁନୀଲ ଧଙ୍ଗଡ଼ାମାଝୀ ସୂଚନା ଦେଇଛନ୍ତି ।