30-Oct-2021

ବଲାଙ୍ଗୀର(ପ୍ରେରଣା ଖବର)- କଳାହାଣ୍ଡି ଜିଲ୍ଲା ମହାଲିଙ୍ଗ କଲେଜ ଅଧ୍ୟକ୍ଷ ମମିତା ମେହେର ମୃତ୍ୟୁ ଘଟଣାର ନିଆଁ ବର୍ତ୍ତମାନ ଜିଲ୍ଲା ଠାରୁ ଅଅରମ୍ଭ କରି ରାଜ୍ୟ ସାରା ବ୍ୟାପିବାରେ ଲାଗିଛି । ଧର୍ମଘଟ,  ବନ୍ଦ, ଧାରଣା ଓ କୁଶପୁତ୍ତଳିକା ଦାହ ତଥା ସରକାର ବିରୋଧୀ ସ୍ଲୋଗାନରେ ବର୍ତ୍ତମାନ ସାରା ରାଜ୍ୟରେ ଅସନ୍ତୋଷର ବାତାବରଣ ଦେଖାଯାଇଛି । ଏହାରି ଭିତରେ ବିଭିନ୍ନ ରାଜନୈତିକ ଦଳର ପ୍ରତିନିଧି ତଥା ରାଜ୍ୟ ମହିଳା କମିଶନ ର ଏକ ଟିମ୍ ମୃତ ମମିତା ମେହେରଙ୍କ ଝରଣୀ ଗ୍ରାମକୁ ଯାଇ ଶୋକସନ୍ତପ୍ତ ପରିବାରକୁ ସାନ୍ୱନା ଜଣାଇ ସାରିଛନ୍ତି । ଗତକାଲି ବିଜେପିର ଏକ ତିନି ଜଣିଆ କେନ୍ଦ୍ରୀୟ  ଟିମ୍ ମୃତ ମମିତାଙ୍କ ଜନ୍ମସ୍ଥାନ ଝରଣୀ ଗ୍ରାମରେ ପହଂଚି ଥିଲେ । ଏପରି ଏକ ଜଘନ୍ୟ କାଣ୍ଡର ପର୍ଦ୍ଦା ପଛର ଦୋଷୀଙ୍କ ଗିରଫ କରାଯିବା ସହ ମମିତାଙ୍କ ପରିବାରକୁ ଉଚିତ ନ୍ୟାୟ ପ୍ରଦାନ କରାଯିବାକୁ ବିଜେପି ଦାବି କରିଛି । ଏହି ଅବସରରେ ଘଟଣାର ସିବିଆଇ ତଦନ୍ତ କରାଯିବାକୁ ବିଜେପିର କେନ୍ଦ୍ରୀୟ ନେତୃମଣ୍ଡଳୀ ଦାବି କରିଛନ୍ତି । ଏ ନେଇ ସେମାନେ ଦଳର କେନ୍ଦ୍ରୀୟ ସଭାପତିଙ୍କୁ ରିପୋର୍ଟ ପ୍ରଦାନ କରିବେ ବୋଲି ଜଣାଇଛନ୍ତି । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ନିର୍ଦ୍ଦେଶକ୍ରମେ ବିଜେପି ରାଷ୍ଟ୍ରୀୟ ମହିଳା ମୋର୍ଚ୍ଚା ସଭାନେତ୍ରୀ  ଭାନାତ ଶ୍ରୀନିବାସନଙ୍କ ନେତୃତ୍ୱରେ ବିଜେପି ସାଂସଦ ସୁନୀତା ଦୁଗ୍‌ଗଲ ଓ ପଶ୍ଚିମବଙ୍ଗର ବିଧାୟିକ ରୂପା ମିତ୍ର ଚୌଧୁରୀ, ବଲାଙ୍ଗୀର ସାଂସଦ ସଙ୍ଗୀତ।। କୁମାରୀ ସିଂଦେଓ, ବ୍ରଜରାଜନଗର ବିଧାୟିକ ରାଧାରଣୀ ପଣ୍ଡା, କଳାହାଣ୍ଡି ଜିଲ୍ଲା ପରିଷଦ ଅଧ୍ୟକ୍ଷା ନମିତା ସାହୁ ପ୍ରମୁଖ ଝରଣୀ ଗ୍ରାମକୁ ପରିଦର୍ଶନ ରେ ଯାଇଥିଲେ । ପ୍ରାୟ ଦେଢ଼ ଘଣ୍ଟା କାଳ  ସେମାନେ ମୃତ ମମିତାଙ୍କ ବାପା ମାଁ ଙ୍କ ସହ ଆଲୋଚନା କରିଥିଲେ ।  ପୋଲିସର ତଦନ୍ତ ଉପରେ ଅସନ୍ତୋଷ ପ୍ରକାଶ କରି ଏହି ଘଟଣାରେ କିଛି ବଡବଡିଆଙ୍କୁ ପୋଲିସ ରାଜ୍ୟ ସରକାର ଅହେତୁକ ଅନୁକମ୍ପା ପ୍ରଦର୍ଶନ କରୁଛନ୍ତି ବୋଲି ବିଜେପି କେନ୍ଦ୍ରୀୟ ପ୍ରତିନିଧି ଦଳ ଅଭିଯୋଗ କରିଛନ୍ତି । ଏହି ଘଟଣାରେ ସଂପୃକ୍ତ ସମସ୍ତ ଦୋଷୀ ଆଇନ ଅନୁଯାୟୀ ଦଣ୍ଡ ପାଇବା ଉଚିତ ବୋଲି ବିଜେପି ପ୍ରତିନିଧି ଦଳ ସ୍ପଷ୍ଟ ଭାବରେ କହିଛନ୍ତି ।