01-Nov-2020

ଭୁବନେଶ୍ବର (ପ୍ରେରଣା ଖବର) - କରୋନା କଟକଣା ସତ୍ତ୍ୱେ ଅକ୍ଟୋବର ମାସରେ ରାଜ୍ୟର ଜିଏସଟି ଆଦାୟ ଉତ୍ସାହଜନକ ଭାବେ ବୃଦ୍ଧି ହୋଇଛି ।ଗତବର୍ଷ ଅକ୍ଟୋବର ମାସ ତୁଳନାରେ ଚଳିତବର୍ଷ ଅକ୍ଟୋବର ମାସରେ ଜିଏସଟି ଆୟ 21.79 ପ୍ରତିଶତ ବୃଦ୍ଧି ଘଟିଛି । ଚଳିତବର୍ଷ ଅକ୍ଟୋବର ମାସରେ ଆଇଜିଏସଟି 480.83 କୋଟି ଟଙ୍କା ଆଦାୟ ହୋଇଥିବା ବେଳେ ଗତବର୍ଷ ଏହି ମାସରେ 307.69 କୋଟି ଟଙ୍କା ଆଦାୟ ହୋଇଛି । ଯାହା ଗତ ମାସ ତୁଳନାରେ 56.27 ପ୍ରତିଶତ ବୃଦ୍ଧି ହୋଇଛି । ଏଥି ସହ ସେସ ଆଦାୟ ଗତବର୍ଷ ଅକ୍ଟୋବର ତୁଳନାରେ 57.55 ପ୍ରତିଶତ ବୃଦ୍ଧି ହୋଇଛି । ସେହିପରି ଗତବର୍ଷ ସେପ୍ଟେମ୍ବର ତୁଳନାରେ ଚଳିତବର୍ଷ ସେପ୍ଟେମ୍ବରରେ 18.3 ପ୍ରତିଶତ ଜିଏସଟି ଆଦାୟ ବୃଦ୍ଧି ହୋଇଛି । ଓଜିଏସଟି ଆଦାୟ ଚଳିତବର୍ଷ ସେପ୍ଟେମ୍ବର 3.42 ପ୍ରତିଶତ ଥିବା ବେଳେ ଅକ୍ଟୋବରରେ 5.16 ପ୍ରତିଶତ ହୋଇଛି । 
ସେହିପରି ପେଟ୍ରୋଲିୟମ ଦ୍ରବ୍ୟ ଉପରେ ଅଣ ଜିଏସଟି ଆୟ ମଧ୍ୟ ଗତବର୍ଷ ଅକ୍ଟୋବର ତୁଳନାରେ 36.05 ପ୍ରତିଶତ ବୃଦ୍ଧି ପାଇଛି ।
ଗତବର୍ଷ ସେପ୍ଟେମ୍ବର ମାସରେ ପେଟ୍ରୋଲିୟମ ସାମଗ୍ରୀରେ ଟିକସ ସଂଗ୍ରହ ରାଶି 431.04 କୋଟି ଟଙ୍କାଥିବାବେଳେ ଚଳିତବର୍ଷ ସେପ୍ଟେମ୍ବରରେ 464.25 କୋଟି ଟଙ୍କା ସଂଗ୍ରହ ହୋଇଛି । ସେହିପରି ଗତବର୍ଷ ଅକ୍ଟୋବରରେ 369.40 କୋଟି ଟଙ୍କା ସଂଗ୍ରହ ହୋଇଥିବା ବେଳେ ଚଳିତବର୍ଷ ଅକ୍ଟୋବରରେ 514.29 କୋଟି ଟଙ୍କା ସଂଗ୍ରହ ହୋଇଛି । ଯାହା ଗତବର୍ଷ ସେପ୍ଟେମ୍ବର ଓ ଅକ୍ଟୋବର ତୁଳନାରେ ଚଳିତବର୍ଷ ସେପ୍ଟେମ୍ବର ଓ ଅକ୍ଟୋବରରେ ଯଥାକ୍ରମେ 7.6 ପ୍ରତିଶତ ଓ 39 ପ୍ରତିଶତ ବୃଦ୍ଧି ହୋଇଛି । ସିଟି ଆଣ୍ଡ ଜିଏସଟି କମିଶନରେଟ ପକ୍ଷରୁ ଏ ନେଇ ଏକ ପ୍ରେସ ବିଜ୍ଞପ୍ତି ପ୍ରକାଶ ପାଇଛି । ମିଳିଥିବା ସୂଚନା ଅନୁସାରେ, କୋରନା ମହାମାରୀ ଯୋଗୁଁ ଚଳିତ ଆର୍ଥିକ ବର୍ଷର ପ୍ରଥମ କ୍ୱାଟରରେ ଜିଏସଟି ଆଦାୟ ନୈରାଶ୍ୟଜନକ ଥିଲା । ଲକଡାଉନ ପ୍ରଭାବରେ 2019 ତୁଳନାରେ ଚଳିତବର୍ଷ ଏପ୍ରିଲ ମାସରେ 61.15 ପ୍ରତିଶତ କମ ଜିଏସଟି ଆଦାୟ ହୋଇଥିଲା । ସେହିପରି ମେ ଓ ଜୁନ ମାସରେ ଯଥାକ୍ରମେ 25.22 ଓ 5.83 ପ୍ରତିଶତ ଜିଏସଟି କମ ଆଦାୟ ହୋଇଥିଲା । ଅନଲକ ପ୍ରକ୍ରିୟା ଅରମ୍ବ ହୋଇଥିବାରୁ ଜୁଲାଇ ମାସରୁ ଜିଏସଟି ସଂଗ୍ରହର ଚିତ୍ର ବଦଳିଛି ।