05-Aug-2021

ବଲାଙ୍ଗିର,(ପ୍ରେରଣା ଖବର) - ଚଳିତ ଖରିଫ ଋତୁରେ ସ୍ୱଳ୍ପ ବର୍ଷାରେ ଯୋଗୁଁ କମ୍ ଜାଗାରେ ଚାଷ କାମ ଚାଲୁଥିଲେ ମଧ୍ୟ କୃଷକଙ୍କୁ ସାର ଯୋଗାଇବା ସରକାର ବିଫଳ ହୋଇଛନ୍ତି । ଅଧିକ ଅମଳ ପାଇଁ ସାର ପ୍ରୟୋଗ ନିହାତି ଜରୁରି ହୋଇଥିଲେ ମଧ୍ୟ ସାର ନ ପାଇବାରୁ ଚାଷୀମାନେ ନାହିଁ ନ ଥିବା ଅସୁବିଧାର ସମ୍ମୁଖିନ ହେଉଛନ୍ତି ଏବଂ ଯେଉଁଠି ବି ମିଳୁଛି କଳାବଜାରିମାନେ ଚଢା ଦରରେ ବିକ୍ରି କରୁଥିଲେ ମଧ୍ୟ ଅଧିକାରୀମାନେ କୁମ୍ଭକର୍ଣ୍ଣ ନିଦ୍ରାରେ ଶୋଇଛନ୍ତି । ଜିଲ୍ଲା କୃଷି ଅଧିକାରୀଙ୍କ ତଥ୍ୟ ଅନୁସାରେ ବଲାଙ୍ଗିର ଜିଲ୍ଲା ପାଇଁ ଏ ବର୍ଷ କାଦୁଅ ବା କମ୍ପେ୍ଲସ ସାର ୧୬ହଜାର ୮ଶହ ମେଟ୍ରିକ ଟନ୍ ଦରକାର କିନ୍ତୁ ଏ ଯାଏଁ ୮ହଜାର ୨ଶହ ମେଟ୍ରିକ ଟନ ସାର ଆସିଛି ଏବଂ ୟୁରିଆ ସାର ୨୨ହଜାର ମେଟ୍ରିକ ଟନ୍ ଦରକାର ଥିବା ବେଳେ ଏଯାଏଁ ୧୦ହଜାର ୫୦୦ ମେଟ୍ରିକ ଟନ୍ ଆସିଛି । ଯଦି କିଛି ଦିନ ମଧ୍ୟରେ ପର୍ଯ୍ୟାପ୍ତ ପରିମାଣରେ ସାର ନ ମିଳେ କୃଷକମାନେ ସାଙ୍ଗାତିକ ଅସୁବିଧାର ସମ୍ମୁଖିନ ହେବା ସହ ଚାଷ କାର୍ଯ୍ୟରେ ବ୍ୟାପକ କ୍ଷତି ହେବ ବୋଲି ପ୍ରଦେଶ କିଶାନ କଂଗ୍ରେସର ଆହ୍ୱାନରେ ଏବଂ ବଲାଙ୍ଗିର ବିଧାୟକ ନରସିଂହ ମିଶ୍ର ଏବଂ

ଯୁବନେତା ସମରେନ୍ଦ୍ର ମିଶ୍ରଙ୍କ ନିର୍ଦ୍ଦେଶରେ ଜିଲ୍ଲା କିଶାନ କଂଗ୍ରେସ ଅଧ୍ୟକ୍ଷ ସାନନ୍ଦ ମିଶ୍ରଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳି ଜିଲ୍ଲା କୃଷି ଅଧିକାରୀଙ୍କୁ ଦାବି ପତ୍ର ଦେଇ କହିଛନ୍ତି ଯେ ତୁରନ୍ତ ଚାଷୀମାନଙ୍କୁ ସାର ଯୋଗାଇ ଦିଆ ନ ଗଲେ ତିବ୍ରତର ଆନ୍ଦୋଳନ ହେବ ବୋଲି ଚେତାବନି ଦେଇଥିଲେ । ଉକ୍ତ କମିଟିରେ ସରୋଜ ରଥ, ବିଶ୍ୱଜିତ ନାଥ, ବିପିନ ବିହାରି ବେହେରା, ଭରତ ଭୋଇ, ଯୁଗେଶ୍ୱର ପଟେଲ, ରମାକାନ୍ତ ପଟେଲ, ଲକ୍ଷ୍ମିନାରାୟଣ ନାଏକ ଏବଂ ଜିଲ୍ଲା କଂଗ୍ରେସ କମିଟି ପକ୍ଷରୁ ଉପ-ସଭାପତି ମନୀଷ ମିଶ୍ର, ଟାଉନ କଂଗ୍ରେସ ସଭାପତି ବୁଲୁ ଦାନି, ଅସିତ ମିଶ୍ର, ଉମାକାନ୍ତ ସାହୁ, ଅଙ୍କିତ ସାହୁ, ନାରିନେତ୍ରୀ ବବିତା ସାହୁ, ସାଇନା ବେଗମ, ଲଳିତ ପଟେଲ ସମେତ ଶତାଧିକ ଚାଷୀ ଉପସ୍ଥିତ ଥିଲେ ।