26-Jul-2021

ନୂଆପଡ଼ା (ପ୍ରେରଣା ଖବର) : ନୂଆପଡା ଜିଲ୍ଲା ସିନାପାଲି ଥାନା ଅନ୍ତର୍ଗତ ଚଳନା ଶିବମନ୍ଦିର ନିକଟସ୍ଥ ପୋଖରୀ ପାଣିରେ ଜଣେ ଯୁବକ ବୁଡି ମୃତ୍ୟୁବରଣ କରିଥିବା ସୂଚନା ମିଳିଛି। ମୃତ ଯୁବକ ଜଣକ ଗୋଡାଲ ପଞ୍ଚାୟତ ପଳସାପଡା ଗ୍ରାମର ଲୋଚନ ଜଗତ(୫୨) ବୋଲି ଜଣାପଡିଛି। ପ୍ରାପ୍ତ ଖବର ଅନୁସାରେ ଲୋଚନ ଜଗତ ଗାଁ ଗାଁ ବୁଲି ଛତା ମରାମତି କରି ଜୀବିକା ନିର୍ବାହ କରେ। ରବିବାର ଭୋର ସକାଳୁ ଚଲନା ସାପ୍ତାହିକ ବଜାରକୁ ଛତା ମରାମତି କରି ଦିପଇସା ରୋଜଗାର ପାଇଁ ଘରୁ ବାହାରି ଥିଲା। ବଜାରକୁ ପହଂଚିବା ପୂର୍ବରୁ ଚଲନା ଶିବମନ୍ଦିର ନିକଟସ୍ଥ ପୋଖରୀ ରେ ନିତ୍ୟକର୍ମ ଓ ସ୍ନାନଶୌଚ କରିବା ପାଇଁ ମୁଖ୍ୟରାସ୍ତା ପାର୍ଶ୍ବ ରେ ପୋଷକପତ୍ର , ଛତା ମରାମତି କରିବା ସାମଗ୍ରୀ ଓ ବ୍ୟାଗକୁ ରଖି ପୋଖରୀକୁ ଯାଇଥିଲା। ପରେ ପୋଖରୀରେ ବୁଡିଯାଇଥିବା ଅନୁମାନ କରାଯାଉଛି। ଦୀର୍ଘ ସମୟ ଧରି ମୁଖ୍ୟ ରାସ୍ତାପର୍ଶ୍ଵରେ ପୋଷାକ ପତ୍ର ଓ ବ୍ୟାଗ ରହିଥିବା ଦେଖି ଲୋକଙ୍କ ମଧ୍ୟରେ ସନ୍ଦେହ ଜାତ ହୋଇଥିଲା। ଅନ୍ୟ ପକ୍ଷେ ସନ୍ଧ୍ୟା ପର୍ଯ୍ୟନ୍ତ ସେ ଘରକୁ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ । ହେଲେ କୌଣସି ସୁରାକ ନ ପାଇବାରୁ ଲୋଚନ ର ନିଖୋଜ ନେଇ ସିନାପାଲି ଥାନାରେ ଏକ ଲିଖିତ ଏତଲା ଦେଇଥିଲେ। ପରେ ପରିବାର ଲୋକେ ଚଲନା ଶିବମନ୍ଦିର ନିକଟରେ କେହି ଜଣେ ପୋଷାକ ପତ୍ର ଛାଡି ଦେଇଥିବା ଖବର ପାଇ ସନ୍ଦେହ କରିଥିଲେ। ଘଟଣା ସ୍ଥଳରେ ପରିବାର ଲୋକେ ପହଞ୍ଚି ପୋଷକପତ୍ର ଓ ବ୍ୟାଗକୁ ଚିହ୍ନଟ କଲା ପରେ ଉକ୍ତ ପୋଖରୀରେ ବୁଡି ଯାଇଥିବା ସନ୍ଦେହ କରି ସିନାପାଲି ପୁଲିସକୁ ଖବର କରିଥିଲେ। ସିନାପାଲି ପୁଲିସ ର ସୂଚନା ପାଇ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ପୋଖରୀରେ ଖୋଜାଖୋଜି ପରେ ମୃତ ଦେହକୁ ଉଦ୍ଧାର କରାଯାଇଥିଲା। ଶବ ବ୍ୟବଚ୍ଛେଦ ପରେ ପରିବାର କୁ ହସ୍ତାନ୍ତର କରାଯାଇଛି। ଏନେଇ ସିନାପାଲି ଥାନାରେ କେଶ ନଂ ୮/୨୧ ଅନୁସାରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇ ଥିବା ସିନାପାଲି ଥାନାଧିକାରୀ ଡମ୍ବରୁଧର ପ୍ରଧାନ ପ୍ରକାଶ କରିଛନ୍ତି।