26-Jul-2021

ଗୋପ, : ଗୋପ ବ୍ଲକ୍ ଅନ୍ତର୍ଗତ ସର୍ବଧର୍ମ ସମନ୍ୱୟ ପୀଠ ପ୍ରାଚୀ ଗୁରୁଧର୍ମ କ୍ଷେତ୍ର ପରିସରରେ କୋଭିଡ଼୍‌-୧୯ ନିୟମ ଅନୁଯାୟୀ ଅନ୍ତେବାସୀ ଓ କେତେକ ଭକ୍ତ ତଥା ଶ୍ରଦ୍ଧାଳୁ ମାନଙ୍କ ଦ୍ୱାରା ଆଶ୍ରମର ମୁଖ୍ୟ ବାବାଜୀ ଦାମୋଦର ଦାସଙ୍କ ତତ୍ୱ୍ୱାବଧାନରେ ପବିତ୍ର ବ୍ୟାସ ପୂର୍ଣ୍ଣିମା ବା ଗୁରୁ ପୂର୍ଣ୍ଣିମା ନିରାଡ଼ମ୍ବର ଭାବେ ପାଳିତ ହୋଇ ଯାଇଛି ।
        ଆଶ୍ରମର ସମସ୍ତ ନ୍ଦିରରେ ସନ୍ଧ୍ୟା ଆଳତୀ, ବିଶ୍ୱଶାନ୍ତି ପ୍ରାର୍ଥନା ଶେଷ ପରେ ଶ୍ରୀ ଶ୍ରୀ ଗୁରୁଦେବ ଶ୍ରୀ ବିଗ୍ରହ ଓ ପାଦୁକା ସମାଧୀ ମନ୍ଦିରର ମହାମନ୍ତ୍ର “ଓଁ କୃଷ୍ଣ ମଧୁସୂଦନ ବାସୁଦେବ ଜନାର୍ଦ୍ଦନ” ସହିତ ହରିବୋଲ ହୁଳହୁଳିରେ ସ୍ୱତନ୍ତ୍ର ପୂଜା ମଣ୍ଡପକୁ ଅଣାଯାଇଥିଲା । ଭାରତ ବର୍ଷରେ ପ୍ରତ୍ୟେକ ଧର୍ମାନୁଷ୍ଠାନରେ ଏହି ପବିତ୍ର ଦିବସକୁ ମହା ଆନନ୍ଦରେ ପାଳନ କରାଯାଇଥାଏ । ପ୍ରତ୍ୟେକ ଭକ୍ତ ଓ ଶ୍ରଦ୍ଧାଳୁ ଗୁରୁଙ୍କୁ ଏହି ପବିତ୍ର ଦିନରେ ଦାନ-ଧର୍ମ ଦେଇ ପୂଜାର୍ଚ୍ଚନା କରି ପାରିଲେ, ବର୍ଷକର ସମସ୍ତ ପର୍ବପର୍ବାଣୀରେ ଗୁରୁଦେବ ପୂଜା ପାଇଥାନ୍ତି ବୋଲି ଡ଼ଃ ରତ୍ନାକର ମହାନ୍ତି ପରାମର୍ଷ ଦେଇଥିଲେ । ତେବେ ଭକ୍ତମାନେ ମୁଖ୍ୟ ଆଶ୍ରମକୁ ନ ଆସି ନିଜ ଘରେ ପୂଜାର୍ଚ୍ଚନା କରିବା ପାଇଁ ଆଶ୍ରମ ତରଫରୁ ସୂଚନା ଦିଆ ଯାଇଥିଲା ବୋଲି ସେବକ ପ୍ରୀତି ରଂଜନ ଦାସ ସୂଚନା ଦେଇଛନ୍ତି । ଏହି ଅବସରରେ ଶ୍ରୀ ଗୁରୁଦେବଙ୍କୁ ଷୋଡ଼ଶ ଉପଚାରରେ ପୂଜାର୍ଚ୍ଚନା କରାଯାଇଥିଲା । ବିଶ୍ୱରୁ ମହାମାରୀ କରୋନା ଦୂରିଭୂତ ହେଉ ବୋଲି ପ୍ରଭୁଙ୍କ ନିକଟରେ ସମବେତ ପ୍ରାର୍ଥନା କରାଯାଇଥିଲା ।