09-Jul-2021

ବଲାଙ୍ଗିର(ପ୍ରେରଣା ଖବର)-  ଚଳିତ କେନ୍ଦ୍ର ମନ୍ତ୍ରୀ ମଣ୍ଡଳରେ ପଶ୍ଚିମ ଓଡିଶାରୁ ପାଞ୍ଚ ଜଣ ବିଜେପି ସାଂସଦ ଥିଲେ ମଧ୍ୟ କାହାରିକୁ କେନ୍ଦ୍ର ମନ୍ତ୍ରୀମଣ୍ଡଳରେ ସ୍ଥାନ ଦେଇ ନ ଥିବାରୁ ବଲାଙ୍ଗିର ତଥା ପଶ୍ଚିମ ଓଡିଶାରେ ବୁଦ୍ଧିଜୀବୀ ମହଲରେ ଉଦ୍‌ବେଗ ପ୍ରକାଶ ପାଇଛି । କିନ୍ତୁ ଖୁସିର ବିଷୟ ବିଗତ ଦିଗରେ ଭକ୍ତ ଚରଣ ଦାସ ଏବଂ କାହ୍ନୁଚରଣ ଲେଙ୍କା ରେଳ ବିଭାଗ ରାଜ୍ୟ ମନ୍ତ୍ରୀ ହୋଇଥିବା ବେଳେ କେନ୍ଦ୍ର କ୍ୟାବିନେଟରେ ଓଡିଶାରୁ ପ୍ରତିନିଧିତ୍ୱ କରୁଥିବା ରାଜ୍ୟସଭା ସାଂସଦ ଅଶ୍ୱିନି ବୈଷ୍ଣବକୁ ରେଳ ବିଭାଗ କ୍ୟାବିନେଟ ମନ୍ତ୍ରୀ କରାଯାଇଥିବାରୁ ତାଙ୍କୁ ସ୍ୱାଗତ କରାଯାଇଛି । ତାଙ୍କ କାର୍ଯ୍ୟକାଳ ଭିତରେ ମାର୍ଚ୍ଚ ୩୧ ୨୦୨୩ ପର୍ଯ୍ୟନ୍ତ ବଲାଙ୍ଗିର- ଖୋର୍ଦ୍ଧା ରେଲୱେ ଲାଇନ ସମ୍ପୁର୍ଣ୍ଣ ହୋଇପାରିବ ବୋଲି ଆଶା ପ୍ରକାଶ କରାଯାଇଛି । ଦେଶ ସ୍ୱାଧିନତା ୭୪ ବର୍ଷ ପରେ ମଧ୍ୟ ଦେଶର ରାଜଧାନୀ ସହିତ ବଲାଙ୍ଗିର ରୁ କୌଣସି ସିଧା ସଳଖ ଟ୍ରେନ ଚଳାଚଳ କରୁନାହିଁ । ଦୁର୍ଗ-ପୁରି ଏକ୍ସପ୍ରେସ ତଥା ବଲାଙ୍ଗିର ଭୁବନେଶ୍ୱର ଇଣ୍ଟରସିଟି ଏକ୍ସପ୍ରେସ ମଧ୍ୟ କରୋନା ପ୍ରଭାବ ଯୋଗୁଁ ବର୍ତ୍ତମାନ ସୁଦ୍ଧା ଚଳାଚଳ କରୁନାହିଁ । ଏଣୁ ଏହା ତୁରନ୍ତ ଚାଲୁ କରିବା ପାଇଁ ମାନ୍ୟବର ବଲାଙ୍ଗିର ସାଂସଦଙ୍କ ଜରିଆରେ ନୂତନ ରେଳମନ୍ତ୍ରୀଙ୍କୁ ଅନୁରୋଧ କରାଯାଇଅଛି । ସମତା ଏକ୍ସପ୍ରେସ ଦୁଇ ଦିନ ବଲାଙ୍ଗିର-ବରଗଡ-ସମ୍ବଲପୁର ଦେଇ ଦିଲ୍ଲୀକୁ ଚାଲିବା ପାଇଁ ପ୍ରସ୍ତାବ ଦିଆଯାଇଛି । ଜମ୍ବୁତାବି ଏକ୍ସପ୍ରେସ ଟିଟିଲାଗଡ ପର୍ଯ୍ୟନ୍ତ ସଂପ୍ରସାରଣ ତଥା ହାଓଡା ଟିଟିଲାଗଡ ଇସ୍ପାତ ଏକ୍ସପ୍ରେସକୁ କଣ୍ଟାବାଞ୍ଜି ପର୍ଯ୍ୟନ୍ତ ସଂପ୍ରସାରଣ ପାଇଁ ଦାବି କରାଯାଇଛି । ଟିଟିଲାଗଡରୁ - ଏହ୍ଲାହାବାଦ ବନାରସ ପର୍ଯ୍ୟନ୍ତ ଏକ ଟ୍ରେନ ଚଳିବା ପାଇଁ ପ୍ରସ୍ତାବ ଦିଆଯାଇଛି । ବିଛୁପାଲି ବଲାଙ୍ଗିର ଟ୍ରେନକୁ ସକାଳରେ ଭୁବନେଶ୍ୱର ପର୍ଯ୍ୟନ୍ତ ଚଳାଚଳ କରିବା ପାଇଁ ଦାବି କରାଯାଇଛିି । ବଲାଙ୍ଗିର-ଖୋର୍ଦ୍ଧା ରେଲୱେ ଲାଇନ ଯୁଦ୍ଧକାଳିନ ଭିତ୍ତିରେ ନିର୍ମାଣ କାମ ଆଗେଇବା ପାଇଁ ମାନ୍ୟବର ରେଳମନ୍ତ୍ରୀଙ୍କୁ ବଲାଙ୍ଗିର ସାଂସଦଙ୍କ ଜରିଆରେ ଅନୁରୋଧ କରାଯାଇଛି । ଏ ଦିଗରେ କନ୍ଧମାଲ ତଥା ପୁରି ଏବଂ ଭୁବନେଶ୍ୱର ସାଂସଦ ବଲାଙ୍ଗିର ସାଂସଦଙ୍କ ନେତୃତ୍ୱରେ ରେଳ ମନ୍ତ୍ରୀଙ୍କ ପାଖରେ ଦାବି କରିବା ପାଇଁ ବଲାଙ୍ଗିର ନାଗରିକ କମିଟି ତରଫରୁ ବିକ୍ରମାନନ୍ଦ ବହିଦାର, ବିଷ୍ଣୁପ୍ରସାଦ କେଡିଆ, ନିତ୍ୟାନନ୍ଦ ମିଶ୍ର, ବୃନ୍ଦାବନ ବରାଳ, ଛବିଲାଲ ବେହେରା, ନରେଶ କୁମାର ଦାଶ, ଗୋପଭୂଷଣ ନାଥ, ମନୋରଂଜନ ପୁରୋହିତ, ମନୋରଂଜନ ସାହୁ, ଧର୍ମବ୍ରତ ରଥ, ପର୍ଶୁରାମ ନାୟକ, ଗୋପବନ୍ଧୁ ପୁରୋହିତ, ଜୟରାମ ମିଶ୍ର ଇତ୍ୟାଦି ସଭ୍ୟ ଉପରୋକ୍ତ ଦାବି କରିଛନ୍ତି । ଆଗାମୀ ଦିନରେ ବଲାଙ୍ଗିର ନାଗରିକ କମିଟି ତରଫରୁ ଦିଲ୍ଲୀ ଯାଇ ମାନ୍ୟବର ବଲାଙ୍ଗିର ସାଂସଦଙ୍କ ସହିତ ନୂତନ ରେଳମନ୍ତ୍ରୀଙ୍କୁ ସାକ୍ଷାତ ଆଲୋଚନା କରାଯିବ ନିଷ୍ପତ୍ତି ନିଆଯାଇଛି ।