07-Jul-2021

ସଇଁତଳା (ପ୍ରେରଣା ଖବର) : କରୋନା ମହାମାରୀକୁ ନେଇ ସାରା ରାଜ୍ୟରେ ମହାମାରୀ ଥମିବାର ନାଁ ନେଉନଥିବା ବେଳେ କେନ୍ଦ୍ର ଓ ରାଜ୍ୟ ସରକାର କ୍ରମାଗତ ଭାବରେ ଡିଜେଲ, ପେଟ୍ରୋଲ, ରନ୍ଧନ ଗ୍ୟାସ, ଖାଇବା ତେଲ, ଡାଲି ଜାତୀୟ ଦ୍ରବ୍ୟ ଠାରୁ ଆରମ୍ଭ କରି ନିତ୍ୟ ବ୍ୟବହୃତ ସାମଗ୍ରୀର ଦର ବୃଦ୍ଧି କରିବାରେ ଲାଗିଛନ୍ତି । ସେହିପରି ସାଧାରଣଙ୍କ ଆର୍ଥିକ ଅବସ୍ଥା ଅତ୍ୟନ୍ତ ଶୋଚନୀୟ ଥିବା ବେଳେ ଏପରି ସରକାରଙ୍କ ଅର୍ଥ ବୃଦ୍ଧି କେତେଦୂର ଯୁକ୍ତିଯୁକ୍ତ ବୋଲି ମତ ପ୍ରକାଶ ପାଇଛି ।ଫଳରେ ସାଧାରଣ ଜନତା ତଥା ଖାଉଟିଙ୍କ ପାଇଁ ବେଡି ଉପରେ କରୋଡା ମାଡ଼ ସାଜିଛି। ଏହାର ପ୍ରତିବାଦରେ ଆଜି ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ସୁରେନ୍ଦ୍ର ସିଂ ଭୋଇଙ୍କ ନେତୃତ୍ୱରେ ବ୍ଲକ୍ କଂଗ୍ରେସ ସଭାପତି ଗୁଣ ସାଗର ମାଝୀଙ୍କ ସଭାପତିତ୍ୱରେ ସ୍ଥାନୀୟ ସଇଁତଲା ବ୍ଳକ କାର୍ଯ୍ୟାଳୟ ପରିସରରେ ବିକ୍ଷୋଭ ପ୍ରଦର୍ଶନ କରାଯାଇଥିଲା।

    ସଇଁନ୍ତଳା ବିଡିଓ ଦେବାଶିଷ ସାମଲଙ୍କ ଜରିଆରେ ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଥିବା ବେଳେ ଦାବିପତ୍ରରେ ଉଲ୍ଲେଖ ରହିଛି ଯେ, ଡିଜେଲ, ପେଟ୍ରୋଲ, ରନ୍ଧନ ଗ୍ୟାସ ତଥା ନିତ୍ୟ ବ୍ୟବହୃତ ସାମଗ୍ରୀର ତୁରନ୍ତ ଦରଦାମ ହ୍ରାସ କରାଯାଉ। ଧାନର ଦର ୨୯୩୦କୁ ବୃଦ୍ଧି

କରାଯାଉ, ଧାନ କିଣିବାର ଟୋକନ ଅବଧିକୁ ଜୁନ ୩୦ ପରିବର୍ତ୍ତେ ଜୁଲାଇ ୨୫କୁ ବୃଦ୍ଧି କରିବା ସହ କଟନି ଛଟନୀ ସମ୍ପୂର୍ଣ୍ଣ ବନ୍ଦ କରାଯାଉ ଏହିପରି   ଅନେକ ଦାବି ମଧ୍ୟ କଂଗ୍ରେସ ଦଳ ପକ୍ଷରୁ ଦାବି କରାଯାଇଛି । ଅନ୍ୟପଟେ ବ୍ଲକରେ ଦିନକୁ ଦିନ ଦୁର୍ନୀତି ସୀମାରେଖା ମଧ୍ୟ ବଢି ଚାଲିଥିବା ବେଳେ ଏହାକୁ ନେଇ ବ୍ଲକ୍ ପ୍ରଶାସନକୁ କଂଗ୍ରେସ ଦଳ ମଧ୍ୟ ବର୍ଷିଥିଲା।
ଏଥିରେ ବ୍ଲକ୍ ଉପାଧ୍ୟକ୍ଷ ପ୍ରମୋଦ ଭୋଇ, ସେନାପତି ମଲ୍ଲିକ, ଗଦାଧର ସାହୁ, ଟିଟିଲାଗଡ଼ ମିଡ଼ିଆ ସେଲ ସଂଯୋଜକ ସୁବ୍ରତ ବେହେରା, ଦୀପକ ଅଗ୍ରୱାଲ, ବୈକୁଣ୍ଠ ଭୋଇ, ପାଣ୍ଡବ ଭୋଇ, ସୁବ୍ରତ ପଟ୍ଟନାୟକ, ଜିତେନ୍ଦ୍ର ଜାଲ ସମେତ ଶତାଧିକ କଂଗ୍ରେସ କର୍ମୀ ସାମିଲ ହୋଇଥିଲେ। ତେବେ ସଇଁନ୍ତଳା ପୁଲିସ ପକ୍ଷରୁ ଆନ୍ଦୋଳନକୁ ନିୟନ୍ତ୍ରଣ କରିବା ପାଇଁ ଏକ ପ୍ଲାଟୁନ ଫୋର୍ସ ମଧ୍ୟ ମୁତୟନ କରାଯାଇଥିଲା।