07-Jul-2021

ଟିଟିଲାଗଡ଼ (ପ୍ରେରଣା ଖବର) : ବଲାଙ୍ଗୀର ଜିଲ୍ଲାର ବିଭିନ୍ନ ସ୍ଥାନରେ ସ୍ୱାସ୍ଥ୍ୟ ସେବା ସମ୍ପୁର୍ଣ୍ଣ ବିପର୍ଯ୍ୟସ୍ତ ହୋଇପଡିଥିବା ଓ ଅଧିକାଂଶ ସ୍ଥାନରେ ଡ଼ାକ୍ତର ପଦ, ପଦବୀ ମାନ ଖାଲି ପଡିରହିଥିବା ବାରମ୍ବାର ସ୍ବେଚ୍ଛାସେବୀ ମହଲରେ ଅଭିଯୋଗ ହୋଇଆସୁଥିବା ସତ୍ୱେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ପରି ଗୁରୁତର ଅଭିଯୋଗ ହେଉଛି । ଏପରିକି ଗତ ୧୫ ଦିନ ମଧ୍ୟରେ ଦୁଇ ଥର ମହିଳା ଓ ଶିଶୁ କଲ୍ୟାଣ ତଥା ମିଶନ ଶକ୍ତି ମନ୍ତ୍ରୀ ଟୁକୁନି ସାହୁ ଙ୍କୁ କଳା ପତାକା ପ୍ରଦର୍ଶନ କରି ବିରୋଧ କରାଯାଇଛି । ସୂଚନା ଅନୁଯାୟୀ, ତୁଷୁରା ଡାକ୍ତରଖାନା ପ୍ରତି ସ୍ୱାସ୍ଥ୍ୟ ବିଭାଗ ଅବହେଳା କରିବା ପ୍ରତିବାଦରେ ତୁଷୁରାରେ ଜନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ପୂର୍ବରୁ ପଦଯାତ୍ରା କରି କଳା ପତକା ଦେଖାଇ ପ୍ରତିବାଦ କରିଥିବା ୟୁଥ ଏକ୍ସନ କମଟି ତୁଷୁରା ତରଫରୁ  ଆଜି ପୁଣିଥରେ ମହିଳା ଓ ଶିଶୁ ବିକାଶ କ୍ୟାବିନେଟ ମନ୍ତ୍ରୀ ଟୁକୁନି ସାହୁଙ୍କୁ କଳା ପତାକା ଦେଖାଇ ବିରୋଧ କରିଛି। ଏନେଇ ତୁଷୁରା ପୋଲିସ ୪ ଜଣ ଯୁବକ ଙ୍କୁ  ଥାନାରେ ଅଟକ ରଖିଥିବା  ଜଣାପଡ଼ିଛି । ଡାକ୍ତର ନିଯୁକ୍ତିକୁ ନେଇ ନିଜ ନିର୍ବାଚନ ମଣ୍ଡଳୀରେ ଜଣେ ମନ୍ତ୍ରୀଙ୍କୁ ୧୫ ଦିନ ମଧ୍ୟରେ ଦ୍ୱିତୀୟଥର ପାଇଁ ବିରୋଧ କରିବା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ସୂଚନାଯୋଗ୍ୟ, ମନ୍ତ୍ରୀ ଟୁକୁନି ସାହୁ ଗୁଡ଼ଭେଲା ବ୍ଲକରେ ଥିବା ଅଙ୍ଗନବାଡି କେନ୍ଦ୍ରଗୁଡ଼ିକ ପାଇଁ ଦିଆଯାଉଥିବା ଏଲପିଜି ଗ୍ୟାସର ଲୋକାର୍ପଣ କରିବାକୁ ଆସିଥିଲେ, କିନ୍ତୁ ଫେରିବା ସମୟରେ ତୁଷୁରା ସହର ଭିତରେ କଳା ପତକା ଦେଖାଇ ପ୍ରତିବାଦ କରିଥିବା ଜଣାପଡ଼ିଛି । ତୁଷୁରା ପୁଲିସ ଏନେଇ ପୂର୍ବରୁ ସୂଚନା ପାଇଥିଲେ ମଧ୍ୟ କୌଣସି ପଦକ୍ଷେପ ନେଇ ନ ଥିବା ରୁ ପୁଲିସର ଭୂମିକାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଜୁନ ୧୭ ତାରିଖରେ ମଧ୍ୟ ମହିପୁର ଛକରେ ସଂଗଠନର କର୍ମକର୍ତ୍ତାମାନେ ପ୍ଲାକାର୍ଡ ସହ କଳା ପତକା ଦେଖାଇ ବିରୋଧ କରିଥିଲେ। ଡାକ୍ତରଖାନାରେ ୨ଜଣ ଡାକ୍ତର ଯୋଗ ଦେଇଥିଲେ ମଧ୍ୟ ସିଏଚସି କରିବା ପାଇଁ ଦାବି ହେଉଛି । ତେବେ ତୁଷୁରା ଡାକ୍ତରଖାନାରେ ଥିବା ଡାକ୍ତରଙ୍କୁ ଅନ୍ୟତ୍ର ବଦଳି କରିବା ପରେ ତୁଷୁରାରେ ଅସନ୍ତୋଷ ଦେଖାଦେଇଛି । ସେହିପରି ମନ୍ତ୍ରୀ ବିଧାୟକ ଭାବେ ନିର୍ବାଚିତ ହୋଇଥିବା ଟିଟିଲାଗଡ ସବ ଡିଭିଜନାଲ ସରକାରୀ ଡାକ୍ତରଖାନାରେ ବର୍ଷ,ବର୍ଷ ଧରି ବିଭିନ୍ନ ଗୁରୁତ୍ୱପୂର୍ଣ୍ଣ ଡ଼ାକ୍ତର ପଦବୀ ମାନ ଖାଲି ପଡିଥିବା ସତ୍ୱେ  ପୂରଣ ଦିଗରେ ନିରବ ଦ୍ରଷ୍ଟା ସାଜିଥିବା ଅଭିଯୋଗ ହୋଇଆସୁଛି । ଏ ନେଇ ତୁରନ୍ତ ବିଭାଗୀୟ ଶାସନ ସଚିବ ଦୃଷ୍ଟି ଦେବାକୁ ବିଭିନ୍ନ ମହଲରୁ ଦାବୀ ହେଉଛି ।