06-Jun-2021

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ) :ସୁବର୍ଣ୍ଣପୁର  ନୋଡାଲ ଏସୋସିଏସନ ଫର ଏମେଚ୍ୟୋର ଥିଏଟର (ନାଟ୍) ଅନୁଷ୍ଠାନର ଆବାହକତ୍ଵରେ ଓଡିଶାର ଗର୍ବ ଓ ଗୌରବ ଶଲାବୁଢା ଫେମ ଡ. ଅଟଳ ବିହାରୀ ପଣ୍ଡାଙ୍କ ବିୟୋଗରେ ଗତ କାଲି ଏକ ଶୋକ ସଭା ଭାର୍ଚୁଆଲ ପ୍ଲାଟଫର୍ମରେ ଅନୁଷ୍ଠିତ ହୋଇଯାଇଛି । ଏଥିରେ ସୁବର୍ଣ୍ଣପୁର ଜିଲ୍ଲାର ବିଭିନ୍ନ ସାମାଜିକ ଓ ସାଂସ୍କୃତିକ ଅନୁଷ୍ଠାନ ସମେତ ପଶ୍ଚିମ ଓଡିଶାର ବିଭିନ୍ନ ଜିଲ୍ଲାର ଅନୁଷ୍ଠାନର କର୍ମକର୍ତ୍ତାମାନେ ଯୋଗଦେଇ ସ୍ଵର୍ଗତ ଅଟଳ ବିହାରୀ ପଣ୍ଡାଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ସ୍ଵର୍ଗତ ଅଟଳ ବିହାରୀ ପଣ୍ଡା ପଶ୍ଚିମ ଓଡିଶାର ସାଂସ୍କୃତିକ ଓ ସାହିତ୍ୟିକ ଅସ୍ମିତାର ପ୍ରତିଭୂ ଏବଂ ଶ୍ରୀ ପଣ୍ଡାଙ୍କୁ ଏକ ବ୍ୟକ୍ତିରୁ ଉର୍ଦ୍ଦ୍ଵକୁ ନେଇ ଅନୁଷ୍ଠାନର ସ୍ଵରୂପ ଦେଇପାରିଲେ ତାହା ତାଙ୍କ ପ୍ରତି ପ୍ରକୃତ ଶ୍ରଦ୍ଧାଞ୍ଜଳି ହେବ ବୋଲି ଶ୍ରଦ୍ଧାଞ୍ଜଳି ସଭାରେ ବରିଷ୍ଠ ଆଇନଜୀବୀ ଗୌରୀ ଶ୍ୟାମ ପଣ୍ଡା   ମତ ପ୍ରକାଶ କରିଥିଲେ  ।
ଡ. ଅଟଳ ବିହାରୀ ପଣ୍ଡା ୦୧ ଡିସେମ୍ଵର ୧୯୩୧ ମସିହାରେ ସ୍ଵର୍ଗତ କବିରାଜ ବାସୁଦେବ ପଣ୍ଡା ଏବଂ ମାତା ସ୍ଵର୍ଗତ ଲକ୍ଷ୍ମୀପ୍ରିୟା ପଣ୍ଡାଙ୍କ ଔରସରୁ ବିନିକା ସ୍ଥିତ ଗଡଭିତର ପଡାରେ ଜନ୍ମଲାଭ କରି ତମାମ ଜୀବନ ସାହିତ୍ୟ, ସଂଗୀତ ଏବଂ ନାଟକ ସାଧନାରେ ବ୍ରତୀ ଥିଲେ । ସେ ଥିଲେ ବହୁମୁଖୀ ପ୍ରତିଭାର ଅଧିକାରୀ । ସେ ପ୍ରାୟ ୩୦ ଖଣ୍ଧ ଓଡିଆ ବେତାର ଓ ମଂଚ ନାଟକ, ୬ ଖଣ୍ଡ ଅପେରା ରଚନା କରିଥିବା ସତ୍ଵେ କୋସଲି-ସମ୍ଵଲପୁରୀ ଭାଷା ସାହିତ୍ୟ ପ୍ରତି ତାଙ୍କର ଅବଦାନ ଅତୁଳନୀୟ । ସମ୍ଵଲପୁରୀ-କୋସଲି ଭାଷାରେ ପ୍ରଥମ ପ୍ରକାଶିତ ପୂର୍ଣ୍ଣାଙ୍ଗ ନାଟକ ଫଟା କପାଲ, ପ୍ରଥମ ପ୍ରକାଶିତ ଉପନ୍ୟାସ ଦେବୀ, ପ୍ରଥମ ପ୍ରକାଶିତ ଆତ୍ମଜୀବନୀ ବାନ୍ଦୁ ଉବାଚର ସେ ଲେଖକ। ପ୍ରାୟ ୩୩ ଖଣ୍ଡ କୋସଲି-ସମ୍ଵଲପୁରୀ ନାଟକ, ୨୦୦ ରୁ ଉର୍ଦ୍ଧ୍ଵ ଗୀତ ରଚନା ସହ ଶତାଧିକ ନାଟକର ଅଭିନେତା ଏବଂ ନିର୍ଦ୍ଦେଶକ ହେଉଛନ୍ତି ଶ୍ରୀ ପଣ୍ଡା। ତେବେ ୮୩ ବର୍ଷ ବୟସରେ ସବ୍ୟସାଚୀ ମହାପାତ୍ର ନିର୍ଦ୍ଦେଶିତ ଆନ୍ତର୍ଜାତୀୟ ଖ୍ୟାତିପ୍ରାପ୍ତ ସିନେମା ଶଲାବୁଢା ର ମୁଖ୍ୟନାୟକ ଚରିତ୍ର ରେ ଅଭିନୟ ତାଙ୍କୁ ବେଶ ପ୍ରସିଦ୍ଧି ଆଣି ଦେଇଥିଲା। ଏହି ସିରିଜର ପରବର୍ତ୍ତୀ ଦୁଇ ସିନେମା ଆଦିମ ବିଚାର ଏବଂ ଶଲାବୁଢାର ବଦଲା ଜାତୀୟ ଚଳଚ୍ଚିତ୍ର ପୁରସ୍କାର ପ୍ରାପ୍ତ ହୋଇଛି ଏବଂ ଶଲାବୁଢା ଓ ଆଦିମ ବିଚାର ସିନେମା ପାଇଁ ସେ ଶ୍ରେଷ୍ଠ ଅଭିନେତା ଭାବେ ରାଜ୍ୟ ଚଳଚ୍ଚିତ୍ର ପୁରସ୍କାର ପ୍ରାପ୍ତ ହୋଇଛନ୍ତି ।  ତାଙ୍କ ପାଇଁ ବୟସ କେବଳ ଏକ ସଂଖ୍ୟା। ତେବେ ସମଗ୍ର ପୃଥିବୀରେ ଅସଂଖ୍ୟ ପ୍ରଶଂସକଙ୍କ ହୃଦୟର ମଉଡମଣି ସାଜିଥିବା ଏହି ନବେ ବର୍ଷୀୟ ଯୁବ ଅଭିନେତା ଅଳ୍ପଦିନ ତଳେ ନିଜ ଧର୍ମପତ୍ନୀଙ୍କ ବିୟୋଗ ପରେ ମର୍ମାହତ ହୋଇ ଗୁରୁତର ଅସୁସ୍ଥ ହୋଇପଡିଥିଲେ ଏବଂ ବୁର୍ଲାରେ ଚିକିତ୍ସାଧୀନ ଥିଲେ ।ଗତ କାଲି  ପ୍ରାତଃ ୩.୪୫ ମି ରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଥିଲା ଯୋଉଥିପାଇଁ ତାଙ୍କ ଅଗଣିତ ପ୍ରଶଂସକଙ୍କ ମଧ୍ୟରେ ଶୋକର ଛାୟା ଖେଳି ଯାଇଛି । ସେ ହେଉଛନ୍ତି ନାଟ୍ ର ପ୍ରତିଷ୍ଠାତା ରାଷ୍ଟ୍ରୀୟ ଅଧ୍ୟକ୍ଷ୍ୟ । ନାଟ୍ ର କାର୍ଯ୍ୟକାରୀ ସଭାପତି ତଥା ଅଭିନେତା ପ୍ରଦ୍ୟୁମ୍ନ ସାହୁଙ୍କ ଅଧ୍ୟକ୍ଷ୍ୟତାରେ ଅନୁଷ୍ଠିତ ଆଜିର ଶ୍ରଦ୍ଧାଞ୍ଜଳି ସଭାରେ କୋସଲି ସାହିତ୍ୟ ସଂସ୍କୃତି ଏକାଡେମୀର ସଚିବ ଗୋରେଖନାଥ ସାହୁ, ରେଆର ର ସଭାପତି ଗୌରୀଶ୍ୟାମ ପଣ୍ଡା, ମହାନଦୀ ସାହିତ୍ୟ ସଂସଦର ସଭାପତି ନାଟ୍ୟଶ୍ରୀ ଗଦାଧର ବାରିକ, ଅଧ୍ୟାପକ ପୁରୁଷୋତ୍ତମ ମିଶ୍ର, ପଏଁରୀ ସଂପାଦକ ଚୌଧୂରୀ ବିଭାର, ଭୀମଭୋଇ କଳା ପରିଷଦର ସଂପାଦକ ଉମେଶ କୁମ୍ଭାର, ନାଟ୍ୟଚକ୍ର ର ନିର୍ଦ୍ଦେଶକ ମନୋଜ ବାରିକ, ଓଡିଶା ସଂଗୀତ ନାଟକ ଏକାଡେମୀ ସଦସ୍ୟ ଶାଶ୍ଵତ ତ୍ରିପାଠୀ, ଶ୍ୟାମା ଓମ ପ୍ରସାଦ ମିଶ୍ର, ସମ୍ବଲପୁର ଶ୍ରୀକଲଚରାଲ ଏକାଡେମୀର ସଂପାଦକ ନାଟ୍ୟକାର ସତ୍ୟ ରଂଜନ ବେହେରା,  ବରଗଡ ସଚେତନ ହେମା ଥିଏଟର ଗୃପର ନିର୍ଦ୍ଦେଶକ ରାଜକୁମାର ସାହୁ, ସ୍ଵଚ୍ଛ ଭାରତ ଅଭିଯାନର ସଂପାଦକ ମନୋରଂଜନ ତ୍ରିପାଠୀ, ଦେଶଫାଳ ଲୋକ କଳା ମହୋତ୍ସବ ଆବାହକ ବେଣୀମାଧବ ବେଦବାକ, ଅଭିନେତ୍ରୀ ଡ. ତପସ୍ଵିନୀ ଗୁରୁ, ସୁଶୀଳା ନାୟାର, ବଲିଉଡ ଏଡିଟର ଏସୋସିଏସନର ଉପଦେଷ୍ଟା ରାଜେନ୍ଦ୍ର ମହାପାତ୍ର, ବୀରମହାରାଜପୁର ସପ୍ତଦୀପା ସାହିତ୍ୟ ସଂସଦର ସଂପାଦକ ଦ୍ଵିତୀକୃଷ୍ଣ ପଣ୍ଡା, ଦିଲ୍ଲୀ ଜୁହାର ପରିବାର, ସୁବର୍ଣ୍ଣସ୍ଵର ନିର୍ଦ୍ଦେଶକ ଶ୍ରୀଧର ବାଗ, ଏକସନଏଡର ଘାସିରାମ ପଣ୍ଡା, କବି ଆର୍ତ୍ତତ୍ରାଣ ବାବୁ, କବି ରଂଜିତା ପଣ୍ଡା, ବାପୁଜୀ କ୍ଲବର ଜିତେନ୍ଦ୍ର ପଟ୍ଟନାୟକ, ବୌଦ୍ଧ ଜିଲ୍ଲାରୁ ସାମ୍ବାଦିକ ତଥା  କବି ଭାର୍ଜନ ପ୍ରଧାନ, କବି ରଂଜୁ ଅମାତ, ସୀତାକାନ୍ତ ସିଂ, ଅଭିନେତା ବିରଞ୍ଚି ମେହେରଙ୍କ ସମେତ ନାଟର ସଦସ୍ୟମାନେ  ଉପସ୍ଥିତ ରହି ସ୍ଵର୍ଗତ ପଣ୍ଡାଙ୍କ ସ୍ମୃତିଚାରଣ କରିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ସଭା ଆରମ୍ଭରେ ନାଟ୍ ର ସାଧାରଣ ସଂପାଦକ ବନମାଳୀ ପଣ୍ଡାଙ୍କ ସଂଯୋଜନାରେ ଶ୍ରୀ ଅଟଳ ବିହାରୀ ପଣ୍ଡାଙ୍କ ଦିବଂଗତ ଆତ୍ମାର ସଦଗତି ପାଇଁ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା ।