15-Apr-2021

ବଲାଙ୍ଗୀର,   ପବିତ୍ର ପବିତ୍ର ବିଷୁବ ସଂକ୍ରାନ୍ତି ଓ ହିନ୍ଦୁ ନବ ବର୍ଷ ତଥା ଅଙ୍କୁର ସାହିତ୍ୟ ସଂସଦର ସପ୍ତମ ପ୍ରତିଷ୍ଠା ଦିବସ ଅବସରରେ ଏକ ସାହିତ୍ୟ ସଭା ଓ କବିତା ପାଠୋତ୍ସବ ସ୍ଥାନୀୟ ଶାସ୍ତ୍ରୀ ନଗର ଠାରେ ପାଳିତ ହୋଇଯାଇଛି । ସ୍ୱେଚ୍ଛାସେବୀ ଅନୁଷ୍ଠାନ କିରଣ ଓ ଅଙ୍କୁର ସାହିତ୍ୟ ସଂସଦର ମିଳିତ ଆୟୋଜନରେ ତଥା କୋଭିଡ କଟକଣାକୁ ପାଳନ ପୂର୍ବକ ଏହି ସଭା ଅନୁଷ୍ଠିତ ହୋଇଥିଲା । ସଭା ପ୍ରାରମ୍ଭରେ କିରଣ ଅନୁଷ୍ଠାନର ଲିପ୍‌ସା ରାଣୀ ମିଶ୍ର ସ୍ୱାଗତ ସଙ୍ଗୀତ ଗାନ କରିଥିଲେ । ଶିକ୍ଷ।।ବିତ୍ କପିଳ ପତିଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ମୁଖ୍ୟ ଅତିଥି ଭାବରେ ସାପ୍ତାହିକ ‘ପ୍ରେରଣା’ର ସଂପାଦକ ରଘୁ ନନ୍ଦନ ସିଂହ ଯୋଗ ଦେଇ ରାମଭକ୍ତ ହନୁମାନଙ୍କ ଫଟୋଚିତ୍ରରେ ମାଲ୍ୟାର୍ପଣ ଓ ପ୍ରଦୀପ ପ୍ରଜ୍ୱଳନ କରି ସଭାକୁ ଉଦ୍‌ଘାଟିତ କରିଥିଲେ ।  କୁନି କୁନି ଶିଶୁ ମାନେ ବିଭିନ୍ନ ବହି ପଢ଼ିବା ଉପରେ ଜୋର ଦେବା ସହ ଏମାନଙ୍କୁ ବହି ପଢ଼ିବା ତଥା କବିତା ଲେଖା ପାଇଁ ମାଁ ବାପା ମାନେ ପ୍ରବର୍ତ୍ତାଇବାକୁ ଅନୁରୋଧ କରିଥିଲେ । ଇଂରାଜୀ ଓ ହିନ୍ଦୀ ଭାଷା ସହ ନିଜର ମାତୃଭାଷା ଉପରେ ଜ୍ଞାନ ରହିଲେ ଏହା ଶିଶୁ ମାନଙ୍କ ଭବିଷ୍ୟତ ଗଢ଼ିବାରେ ସହାୟକ ହୋଇପାରିବ ବୋଲି ମୁଖ୍ୟ ଅତିଥି ଶ୍ରୀ ସିଂହ ମତ ଦେଇଥିଲେ । ସଭାରେ ସମ୍ମାନିତ ଅତିଥି ଭାବରେ ପୂଜ୍ୟ ପୂଜା ସେବା ସଂଗଠନର ସଭାପତି ମଦନମୋହନ ରଥ ଓ ଅଙ୍କୁର ସାହିତ୍ୟ ସଂସଦର ସଂପାଦକ ଡ. ଅଶୋକ ସେଠୀ ମଂଚାସୀନ ରହି ଆଗାମୀ ଦିନରେ ସଂସଦର କାର୍ଯ୍ୟକ୍ରମକୁ ଆହୁରି ବ୍ୟାପକ କରାଯିବ ଓ ଶିଶୁ ମାନଙ୍କ ଅନ୍ତନିର୍ହିତ ପ୍ରତିଭାର ବିକାଶ ପାଇଁ  ବିଭିନ୍ନ ସାହିତ୍ୟ ଭିତ୍ତିକ କାର୍ଯ୍ୟକ୍ରମ ହାତକୁ ନିଆଯିବ ବୋଲି କହିଥିଲେ । ଏହି ଅବସରରେ ଦେଓଗାଁ ବ୍ଲକ ଅନ୍ତର୍ଗତ ହାତୀସରା ଅଂଚଳର କବି ପ୍ରଦୀପ ନାୟକଙ୍କ ଅଙ୍କୁର ସାହିତ୍ୟ ସଂସଦ ତରଫରୁ ମାନପତ୍ର ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଥିଲା । ପରେ ଶିକ୍ଷୟିତ୍ରୀ କସ୍ତୁରୀ ରଥଙ୍କ ସଂଯୋଜନାରେ ଏକି କବିତା ଆସର ଅନୁଷ୍ଠିତ ହୋଇଥିଲା । ଏଥିରେ ଅନ୍ୟ ମାନଙ୍କ ମଧ୍ୟରେ ତନୁଶ୍ରୀ ନାଗ, ଚୂଡେନ୍ଦ୍ର ବେହେରା, ହୃଷୀକେଶ ପୁରୋହିତ, ସତ୍ୟାନନ୍ଦ ବିଶ୍ୱାଲ, ବଳିଷ୍ଠ ପ୍ରଧାନ, ଶ୍ରୀମତୀ ଜ୍ୟୋତି ମିଶ୍ର ପ୍ରମୁଖ କବିତା ପାଠ କରିଥିଲେ । କାର୍ଯ୍ୟକ୍ରମରେ କିରଣ ଅନୁଷ୍ଠାନର ସୈରାଷ୍ଟ୍ର ବାଗ, ନୟନ କୁମାର ସା, ତ୍ରିଲୋକ ସିଂହ, ବଡ ବକୁଲ ଓ ନରେନ୍ଦ୍ର ପ୍ରଧାନ ପ୍ରମୁଖ ସହଯୋଗ କରିଥିଲେ ।  ଶେଷରେ କିରଣ ଅନୁଷ୍ଠାନର ସଭାପତି ମଧୁ ସାହୁ ଧନ୍ୟବାଦ ଅର୍ପଣ କରିଥିଲେ ।