03-Apr-2021

ଭୁବନେଶ୍ୱର,(ଶୁଭାଶିଷ ନାୟକ) :  ବାଚସ୍ପତିଙ୍କୁ ଲକ୍ଷ୍ୟ କରି ଚପଲ, ହେଡ଼ଫୋନ ଫିଙ୍ଗିବା ଘଟଣା ବିଜେପିର ତିନି ବିଧାୟକଙ୍କୁ ମହଙ୍ଗା ପଡ଼ିଛି  । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବିଧାୟକମାନେ ଦାବି କରିଥିଲେ  । ବିଧାୟକମାନଙ୍କ ଦାବିକୁ ଅନୁଶୀଳନ କରିବା ପରେ ବାଚସ୍ପତି ଗୃହର ଭିଡ଼ିଓ କ୍ଲିପ ମଗାଇ ଦେଖିଥିଲେ  । ପରେ ଶାସକ ଦଳ ମୁଖ୍ୟ ସଚେତିକା ପ୍ରମିଳା ମଲ୍ଲିକ ଏକ ମୋସନ ଆଣିବା ସହ ବରିଷ୍ଠ ବିଧାୟକ ଜୟ ନାରାୟଣ ମିଶ୍ର, ବିରୋଧୀ ଦଳ ଉପନେତା ବିଷ୍ଣୁଚରଣ ସେଠୀ ଓ ବିରୋଧୀ ଦଳ ମୁଖ୍ୟ ସଚେଚକ ମୋହନ ମାଝୀଙ୍କୁ ନିଲମ୍ବିତ କରିବା ପାଇଁ କହିଥିଲେ  । ଏନେଇ ବାଚସ୍ପତି ଗୃହରେ ଭୋଟିଂ ଗ୍ରହଣ କରିବା ସହ ତିନି ଜଣଙ୍କୁ ସସପେଣ୍ଡ କରିଥିଲେ  । ଫଳରେ ଚଳିତ ଅଧିବେଶନରେ ଏହି ୩ ବିଧାୟକ ଗୃହକୁ ଆସିପାରିବେ ନାହିଁ  ।

ପ୍ରକାଶ ଯେ ଶନିବାର ବିଧାନସଭାରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ।  ବିଧାନସଭା ଭଳି ଏକ ପବିତ୍ର ଗୃହରେ ବିଜେପି ବିଧାୟକଙ୍କ  ଅଶୋଭନୀୟ ଆଚରଣ ଦେଖିବାକୁ ମିଳିଛି । ବିଧାନସଭାରେ ବିଜେପି ସଦସ୍ୟମାନେ ହୋହାଲ୍ଲା ଓ ହଟ୍ଟଗୋଳ କରିବା ସହ ବାଚସ୍ପତିଙ୍କ ପୋଡ଼ିୟମ ଉପରକୁ ଚପଲ ଫିଙ୍ଗିଛନ୍ତି । ଖାଲି ସେତିକି ନୁହେଁ ଇୟର ଫୋନ ଓ  କାଗଜ ମଧ୍ୟ ଫିଙ୍ଗିଛନ୍ତି । ଏସଂକ୍ରାନ୍ତରେ ପୂର୍ବରୁ ବାଚସ୍ପତି ଡକ୍ଟର ସୂର୍ଯ୍ୟ ନାରାୟଣ ପାତ୍ର କହିଥିଲେଯେ, ବିଧାୟକଙ୍କ ପାଇଁ ଆଇନ ତା’ ବାଟରେ ଯିବ,  ତାକୁ କେହି ବନ୍ଦ କରିପାରିବେ ନାହିଁ । ବିଜେପି  ବିଧାୟକଙ୍କ ଚପଲ ଫିଙ୍ଗା ଘଟଣାରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ନିଜର ପ୍ରତିକ୍ରିୟା ରଖି ଏହା କହିଛନ୍ତି ।  ସେ କହିଛନ୍ତି ଯେ,  ସମସ୍ତ କଥାକୁ କରୁଛି । ତର୍ଜମା କରୁଛି । ଆଇନ ତା’ ବାଟରେ ଯିବ, କେହି ବନ୍ଦ କରିପାରିବେନି । ବିଧାନସଭାରେ ଉଠାଯାଇଥିବା ଫଟୋ ପରୀକ୍ଷା କରୁଛି ।  ସବୁ ପ୍ରମାଣ ମିଳିସାରିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବାଚସ୍ପତି ଶ୍ରୀ ପାତ୍ର କହିଛନ୍ତି