31-Mar-2021

ବୌଦ୍ଧ(ଶ୍ରୀବନ୍ତ ମେହେର): ଅବସର ଗ୍ରହଣ ପରେ ମଧ୍ୟ ସବୁଦିନ ଭଳି ମଙ୍ଗଳବାର ଦିନ ବଡିଭୋର ସକାଳୁ ସକାଳୁ ହରଭଙ୍ଗା ବ୍ଲକର ସମସ୍ତ ଶିକ୍ଷକଙ୍କ ନିକଟକୁ ୱାଟସପରେ ସୁପ୍ରଭାତ ଶୁଭେଚ୍ଛା ଜଣାଇଥିଲେ ହରଭଙ୍ଗା ବ୍ଲକର ପୂର୍ବତନ ଗୋଷ୍ଠିଶିକ୍ଷା ଅଧିକାରୀ ସନାତନ ଗାଣ।ହେଲେ କେହି କଳ୍ପନା ସୁଦ୍ଧା କରି ପାରିନଥିଲେ।ଆଜିର ଶୁଭେଚ୍ଛା ଥିଲା ତାଙ୍କର ଅନ୍ତିମ ବିଦାୟି ବାର୍ତ୍ତା।କେଇଘଣ୍ଟା ପରେ ଏ ମୋବାଇଲରୁ ସେ ମୋବାଇଲ  କୁ ଘୁରିବୁଲିଲା ଗୋଟିଏ କଥା ଗାଣସାର ଚାଲିଗଲେ।ହେଲେ କେହି ଏକଥାକୁ ବିଶ୍ୱାସ କରିବାକୁ ପ୍ରସ୍ତୁତ ନଥିଲେ।ଆଜି ସକାଳୁ ମୋତେ ୱାଟସପ କରିଥିଲେ ତାର କିଛିଘଣ୍ଟା ନହେଉଣୁ ସମସ୍ତଙ୍କୁ ନିଜ ପରିବାରର ସଦସ୍ୟ ଭଳି ଭଲପାଉଥିବା ମୁରବି ହଠାତ କେମିତି କାହାକୁ କିଛି ନକହି ସେପାରିକୁ ଚାଲିଯିବେ।କିନ୍ତୁ ଯେତେବେଳେ ଏହାହିଁ ନିଷ୍ଠୁର ସତ୍ୟ ବୋଲି ଜଣାପଡିଲା ମଙ୍ଗଳବାର ଅପରାହ୍ନ ପ୍ରାୟ ୨ଟା ସମୟରେ ତାଙ୍କର ହୃଦଘାତ ହୋଇଥିଲା।ପରିବାର ଲୋକେ ତାଙ୍କୁ ତୁରନ୍ତ ଅନୁଗୋଳ ମୁଖ୍ୟ ଚିକିତ୍ସାଳୟ କୁ ନେଇଥିଲେ।ଡାକ୍ତର ତାଙ୍କୁ ପରୀକ୍ଷା କରି ମୃତ ଘୋଷଣା କରିଥିଲେ।ଏ କଥା ଶୁଣିବା ପରେ ଏଭଳି କୌଣସି ଶିକ୍ଷକ ଶିକ୍ଷୟିତ୍ରୀ ନଥିଲେ ଯିଏକି ନିଜ କୋହ ସମ୍ବରଣ କରିପାରି ଥିଲେ।ତାଙ୍କର ନିଷ୍କପଟ ସ୍ନେହ ଓ ସ୍ମୃତିକୁ ମନେ ପକାଇ କାନ୍ଦି ଥିଲେ।ଏଭଳି ଏକ ବିରଳ ଘଟଣା ଦେଖିବାକୁ ମିଳିଥିଲା ହରଭଙ୍ଗା ବ୍ଲକରେ।ସନାତନ ଗାଣ ଗତ ୨୦୧୫ ଡିସେମ୍ବର ମାସରେ ହରଭଙ୍ଗା

ଗୋଷ୍ଠି ଶିକ୍ଷା ଅଧିକାରୀ ଭାବେ ଦାଇତ୍ୱ ଗ୍ରହଣ କରି ଫେବୃଆରୀ ୨୯ ୨୦୨୦ରେ ଚକିରୀରୁ ଅବସର ନେଇଥିଲେ।କିନ୍ତୁ ଏହି କିଛିବର୍ଷ ଭିତରେ ସେ ନିଜର ସରଳ ନିଷ୍କପଟ ସାମୟିକ ଓ ପରୋପକାରୀ ଗୁଣ ଯୋଗୁଁ ସମସ୍ତ ଶିକ୍ଷକ ଏବଂ ସହକର୍ମୀ ମାନଙ୍କୁ ଆପଣାର କରିନେଇଥିଲେ।ଅବସର ନେବାପରେ ତାଙ୍କୁ ବିଭିନ୍ନ କ୍ଳଷ୍ଟର ଗୁଡିକରେ ଦିଆଯାଇଥିବା ବିଦାୟ ସମ୍ବର୍ଦ୍ଧନା ସମସ୍ତଙ୍କୁ ଅଭିଭୂତ କରି ବା ସହ ତାଙ୍କର ଲୋକପ୍ରିୟତାକୁ ପ୍ରମାଣିତ କରୁଥିଲା।