26-Mar-2021

ଲମତାପୁଟ(ପ୍ରେରଣା ଖବର ବ୍ୟୁରୋ) :  ଲମତାପୁଟ  ପୋଲିସକୁ ପୁଣି  ସଫଳତା । ଟ୍ରାକ୍ଟରରେ ଗଞ୍ଜେଇ ଚୋରାଚାଲାଣ ବେଳେ ଧରିଲା ପୋଲିସ । ଲମତାପୁଟ ବ୍ଲକର ବାଙ୍ଗୁରପଡା ଗାଁରୁ ବାଲେଲ ଗ୍ରାମକୁ ଗଞ୍ଜେଇ ଚୋରା ଚାଲଣ ବେଳେ ଧରିଛି ଲମତାପୁଟ ଓ ଜଲାପୁଟ ପୋଲିସ  । ପ୍ରାୟ ୪୦ଲକ୍ଷ ଟଙ୍କାର ଗଞ୍ଜେଇ ଜବତ କରିଛି ପୋଲିସ ।

ଖବର ଅନୁଯାୟୀ,  ବିଶେଷ ସୂତ୍ରରୁ ଖବର ପାଇ କୋରାପୁଟ ଏସପିଙ୍କ ନିର୍ଦ୍ଦେଶ କ୍ରମେ ନନ୍ଦପୁର  ଏସଡିପିଓଙ୍କ ନେତୃତ୍ୱରେ   ଲମତାପୁଟ ଏବଂ ଜଲାପୁଟ  ପୋଲିସ  ବାଙ୍ଗୁରପଡା  ନଦୀ ଘାଟରେ ପାଟ୍ରୋଲିଂ କରୁଥିଲେ  । ଠିକ୍‌ ଏହି ସମୟରେ  ବାଙ୍ଗୁରପଡା  ଗାଁ ପଟୁ  ଦ୍ରୁତଗତିରେ ଆସୁଥିବା ଏକ  ନମ୍ବରବିହୀନ  ଟ୍ରାକ୍ଟରକୁ ଅଟକାଇଥିଲା ପୋଲିସ ।  ଅନ୍ଧାର ଏବଂ ଘଞ୍ଚଜଙ୍ଗଲର ସୁଯୋଗ ନେଇ  ଡ୍ରାଇଭର ଓ ଗଞ୍ଜେଇ ମାଫିଆ  ଫେରାର ହୋଇଯାଇଛନ୍ତି । 

ଏହାପରେ ଟ୍ରାକ୍ଟର ପଛ ପଟ ଡାଲାରେ ଗଞ୍ଜେଇ ଥିବା ପୋଲିସ ଜାଣିବାକୁ ପାଇଥିଲା  ।  ଟ୍ରାକ୍ଟରରୁ ୧୪  ବସ୍ତାରେ   ପ୍ରାୟ  ୪ କ୍ଵିଣ୍ଟାଲ ଗଞ୍ଜେଇ ଜବତ କରାଯାଇଛି । ଯାହାର ମୂଲ୍ୟ ୪୦ ଲକ୍ଷରୁ ଅଧିକ ହେବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି। ଜବତ ଗଞ୍ଜେଇ ବାଙ୍ଗୁରପଡା ଗ୍ରାମରୁ ବାଲେଲ ଗ୍ରାମକୁ ଯାଇ  ସେଠାରେ ସ୍ଵତନ୍ତ୍ର  ପ୍ୟାକିଙ୍ଗ ହୋଇଥାଥାନ୍ତା  । ସେଠାରୁ ମାଫିଆ ମାନେ ବାହାର ରାଜ୍ୟକୁ ପଠାଇବା ପାଇଁ ଯୋଜନା କରୁଥିବା ପୋଲିସ ସୂଚନା ଦେଇଛି ।  ତେବେ ଏହି ଗଞ୍ଜେଇ ଚୋରାଚାଲାଣରେ  କେଉଁ ମାନେ ସମ୍ପୃକ୍ତ ଅଛନ୍ତି । ତାହାର ଛାନ୍‌ଭିନ୍ ଜାରି ରହିଛି ।