19-Mar-2021

ଢେଙ୍କାନାଳ(ପ୍ରେରଣା ଖବର ବ୍ୟୁରୋ): ଢେଙ୍କାନାଳ ସଦର ଥାନା ସାରିଅଁ ଗାଁରେ ଯୁବକଙ୍କୁ ନିର୍ମମ ହତ୍ୟା । ହତ୍ୟାକରି ଗାଁ ଦାଣ୍ଡରେ ପକାଇ ଚମ୍ପଟ ମାରିଲେ ଅଭିଯୁକ୍ତ । ମୃତକ ହେଲେ ସାରିଅଁ ଗାଁର ସନା ସାହୁ । ଅଭିଯୁକ୍ତ ସେହି ଗାଁର ବାପି ନାୟକ ବୋଲି ଜଣାପଡିଛି ।

ସୂଚନାଯୋଗ୍ୟ ଯେ, ଗୁରୁବାର ରାତି ପ୍ରାୟ ୯ଟା ସମୟରେ ଗାଁ ଦାଣ୍ଡରେ ହଠାତ୍ ଅଭିଯୁକ୍ତ ବାପି ନାୟକ ସନାଙ୍କୁ ଏକ ଧାରୁଆ ଅସ୍ତ୍ରରେ ହାଣିବା ପାଇଁ ଗୋଡାଇଥିଲା । ବାପିର ଆକ୍ରମଣରେ ସନାଙ୍କର ମୁହଁ ଓ କାନମୁଣ୍ଡାରେ ଗଭୀର ଆଘାତ ଲାଗିବା ସହିତ ପ୍ରବଳ ରକ୍ତସ୍ରାବ ହୋଇଥିଲା । ଘଟଣାସ୍ଥଳରୁ ସନାଙ୍କୁ ଗ୍ରାମବାସୀ ଉଦ୍ଧାର କରି ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ଡାକ୍ତରଖାନାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଭିଯୁକ୍ତ ବାପି ଫେରାର ଥିବାବେଳେ ସଦର ଥାନା ଓ ଟାଉନ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।