19-Mar-2021

ଜଳେଶ୍ବର(ପ୍ରେରଣା ଖବର) ଚୋରୀ କରୁଥିବା ବେଳେ ଧରାପଡିଲେ ଦୁଇ ଦୁର୍ବୃତ୍ତ । ଗ୍ରାମବାସୀ ଧରି ନିର୍ଧୁମ ଛେଚିଲେ । ଏଭଳି ଅଭାବନୀୟ ଘଟଣା ଘଟିଛି ବାଲେଶ୍ବର ଜିଲ୍ଲା କମର୍ଦ୍ଦା ଥାନା ରସୁଲପୁର ଗାଁରେ ।

ସୂଚନାଯୋଗ୍ୟ ଯେ, ଗାଁର ଅଭିମନ୍ୟୁ ବେହେରାଙ୍କ ଘରେ ରାତି ଅଧରେ ପଶି ଛେଳି ଓ ପିଲା ଚୋରୀ କରୁଥିବା ବେଳେ ଦୁଇ ଦୁର୍ବୃତ୍ତ ଗ୍ରାମବାସୀଙ୍କ ଦ୍ଵାରା ଧରାପଡି ଛେଚା ଖାଇଲେ । ଏକ କାର ସହ ଦୁଇ ଜଣକୁ କମର୍ଦ୍ଦା ପୋଲିସକୁ ହସ୍ତାନ୍ତର କରିଛନ୍ତି ଗ୍ରାମବାସୀ । ଅନ୍ୟ ଦୁଇ ଜଣ ରାତି ଅନ୍ଧାରରେ ଫେରାର ହୋଇଯାଇଥିବା ଗ୍ରାମବାସୀ କହିଥିବା ବେଳେ ଛେଳି ଓ ଦେଢ଼ ବର୍ଷର ନାବାଳିକାଙ୍କୁ ଉଦ୍ଧାର କରାଯାଇଛି । ଦିନକୁ ଦିନ ଚୋରୀ ଓ ରାହାଜାନୀର ଘଟଣା ବଢ଼ିବଢ଼ି ଚାଲିଛି । ଗୁରୁବାର ରାତି ୨ଟା ସମୟରେ ଗାଁର ଅଭିମନ୍ୟୁ ବେହେରାଙ୍କ ପରିବାର ଲୋକେ ଶୋଇଥିବା ବେଳେ ତାଙ୍କ ଗୁହାଳରେ ଥିବା ଏକ ଛେଳିକୁ ଚୋରୀ କରି କାର ଭିତର ରଖିଥିଲେ ।

ପରେ ଘର ଭିତରେ ପଶି ଅଭିମନ୍ୟୁର ଦେଢ଼ ବର୍ଷର ଝିଅକୁ ଉଠାଇ ନେବା ସମୟରେ ପିଲାଟି କନ୍ଦିବାରୁ ଘରଲୋକେ ଉଠି ପାଟି କରିବାରୁ ଗାଁ ଲୋକେ ଆସି ଚୋରମାନଙ୍କୁ ଧରିଥିଲେ । ତେବେ ୪ ଜଣ ଚୋର ଭିତରୁ ଦୁଇ ଜଣ ଖସି ପଳାଇଥିବା ବେଳେ ଅନ୍ୟ ଦୁଇ ଜଣଙ୍କୁ ଗ୍ରାମବାସୀ ବାନ୍ଧି ନିର୍ଦ୍ଧୁମ ଛେଚିଥିଲେ । ପରେ କମର୍ଦ୍ଦା ପୋଲିସ ଆସି ଚୋରକୁ ଉଦ୍ଧାର କରିଛି । ଚୋରମାନେ ଭୋଗରାଇ ଅଞ୍ଚଳର ବୋଲି ଜଣାପଡିଥିବା ବେଳେ ପୋଲିସ ଅଧିକ ତଦନ୍ତ ଜାରି ରଖିଛି । ତେବେ ଚୋରମାନେ ବ୍ୟବହାର କରିଥିବା ମାରୁତି କାରକୁ ଲୋକେ ଭାଙ୍ଗି ଦେଇ କେନାଲ ପାଖକୁ ପକାଇ ଦେଇଥିବା ଦେଖିବାକୁ ମିଳିଛି ।