15-Mar-2021

ସମ୍ବଲପୁର,(ସଂଜୀବ କୁମାର ପାଣିଗ୍ରାହୀ): ବୁର୍ଲା ଭୀମସାରର ଆସିଷ୍ଟାଣ୍ଟ ପ୍ରଫେସର ଡାକ୍ତର ଶଙ୍କର ରାମଚନ୍ଦାନୀଙ୍କୁ ପ୍ରଶଂସା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ମାନବିକତା ଦେଖାଇ ଡାକ୍ତର ଶଙ୍କର ରାମଚନ୍ଦାନୀ ଯେଉଁ କାମ କରୁଛନ୍ତି ସେଥିପାଇଁ ସେ ପ୍ରଶଂସାର ହକଦାର ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ନିଜ ଡ୍ୟୁଟି ପରେ ସେ ଗରିବ ଲୋକଙ୍କ ପାଇଁ ଟଙ୍କିକିଆ କ୍ଲିନିକ୍ କରି ଯେଉଁ କାମ କରିଛନ୍ତି ତାହା ଅନ୍ୟମାନଙ୍କୁ ପ୍ରେରଣା ଦେବ ନିଶ୍ଚିତ । କେନ୍ଦ୍ରମନ୍ତ୍ରୀ ଟ୍ବିଟ୍ ଯୋଗେ ରାମଚନ୍ଦାନୀଙ୍କୁ ପ୍ରଶଂସାରେ ପୋତି ପକାଇଛନ୍ତି ।

ସୂଚନାଯୋଗ୍ୟ ଯେ, ବୁର୍ଲା ଭୀମସାରର ଆସିଷ୍ଟାଣ୍ଟ ପ୍ରଫେସର ଶଙ୍କର ରାମଚନ୍ଦାନୀ ଗରିବ ରୋଗୀଙ୍କୁ ସାହାଯ୍ୟ ପାଇଁ କେତେବେଳେ ନିଜ ଗାଡିରେ ହସ୍ପିଟାଲ ପହଞ୍ଚାଇଛନ୍ତି ତ କେତେବେଳେ ଏଚଆଇଭି ସଂକ୍ରମିତଙ୍କୁ ୫୦ହଜାର ଟଙ୍କା ସହାୟତା ଦେଇଛନ୍ତି । ତେବେ କିଛିଦିନ ହେବ ଓ୍ବାନ୍ ରୁପି କ୍ଲିନିକ୍ ଆରମ୍ଭ କରି ବେଶ୍ ଚର୍ଚ୍ଚାରେ ରହିବା ସହ ବିଭିନ୍ନ ମହଲରୁ ପ୍ରଶଂସା ସାଉଁଟୁଛନ୍ତି  ଡାକ୍ତର ରାମଚନ୍ଦାନୀ ।