14-Mar-2021

ବୌଦ୍ଧ (ପ୍ରେରଣା ଖବର ବ୍ୟୁରୋ) ବୌଦ୍ଧ ବନଖଣ୍ଡ ଅଧିନସ୍ଥ ପୁରୁଣା କଟକ ରେଞ୍ଜ ଅନ୍ତର୍ଗତ ମୁଣ୍ଡେଶ୍ୱର ସଂରକ୍ଷିତ ଜଙ୍ଗଲରେ ନିଆଁ ଲଗାଇବା ଅଭିଯୋଗ ରେ ୪ ଜଣ ବ୍ୟକ୍ତିଙ୍କୁ ବନ ବିଭାଗ ଗିରଫ କରିଥିବା ଜଣାପଡିଛି l ପ୍ରାପ୍ତ ସୂଚନା ମତେ ଛତ୍ରଙ୍ଗ ଗ୍ରାମ ପଞ୍ଚାୟତ ଅନ୍ତର୍ଗତ ଧୁଙ୍ଗିଆ ମୁଣ୍ଡା ଗ୍ରାମର ଉମାକାନ୍ତ ମଲିକ (୪୦), ବନ୍ଧୁଆ ବେହେରା (୫୦), କୃଷ୍ଣଚନ୍ଦ୍ର ଦୀପ (୫୮) ଓ ପ୍ରଶାନ୍ତ ମଲ୍ଲିକ (୪୦) ଙ୍କୁ ବନ ବିଭାଗର କର୍ମଚାରୀ ମାନେ ଆଜି ସକାଳେ ମୁଣ୍ଡେଶ୍ୱର ସଂରକ୍ଷିତ ଜଙ୍ଗଲରେ ପେଟ୍ରୋଲିଙ୍ଗ କରୁଥିବା ସମୟରେ ଦେଖି ତଲାସୀ ନେବାରୁ ସେମାନଙ୍କ ନିକଟରୁ ୨ ଗୋଟି ଟାଂଗିଆ ଓ ଦୁଇଟି ଦିଆସିଲି ପାଇବା ପରେ ତାକୁ ଜବତ୍ କରି ସେମାନଙ୍କୁ ଗିରଫ କରି ପୁରୁଣାକଟକ ରେଞ୍ଜ କାର୍ଯ୍ୟାଳୟକୁ ଆଣିଥିଲେ।ସୂଚନାପାଇ ବୌଦ୍ଧ ଡିଏଫଓ ଯଶୋବନ୍ତ ସେଠୀ ସେଠାରେ ପହଂଚି ଗଣମାଧ୍ୟମକୁ ଏ ସମ୍ପର୍କରେ ସୂଚନା ଦେଇଥିଲେl ପେଟ୍ରୋଲିଂ ସମୟରେ ଏସିଏଫ ଜିତେନ୍ଦ୍ର କୁମାର ବେହେରା, ପୁରୁଣାକଟକ ରେଞ୍ଜର ନିହାର ରଞ୍ଜନ ମଲ୍ଲିକ, ବନପାଳ ବିଜୟା ନନ୍ଦ ସାହୁ, ବନରକ୍ଷୀ ଲାଲକୃଷ୍ଣ ସାହୁ, ମାନସ ରଞ୍ଜନ ସାହୁ, ଦୀପକ କୁମାର ନାଏକ, ଆଶିଷ ମେହେର ପ୍ରମୁଖ ଉପସ୍ଥିତଥିବା ଜଣାଯାଇଛି।ଅପର ପକ୍ଷରେ ମୁଣ୍ଡେଶ୍ୱର ଜଙ୍ଗଲରେ ଗତ ୩/୪ଦିନ ପୂର୍ବରୁ ନିଆଁ ଲାଗିଥିବା ବେଳେ  ନିଆଁ ଲଗାଇଥିବା ପଛରେ ପ୍ରକୃତରେ ସେମାନଙ୍କର ହାତ ଅଛିନା ନାହିଁ ଏହାକୁ ନେଇ ଚର୍ଚ୍ଚା ଜୋର ଧରିଛି।ଯଦି ସେମାନେ ପ୍ରକୃତ ଦୋଷୀ ତେବେ ତାଙ୍କ ବିରୁଦ୍ଧରେ ଦ୍ରୁଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ମାତ୍ର ଅନ୍ୟଥା କୌଣସି ନିରୀହ ଲୋକଙ୍କୁ ସନ୍ଦେହରେ ଯେପରି ଗିରଫ ନହୁଅନ୍ତି ସେଥିପ୍ରତି ବିଭାଗୀୟ ଅଧିକାରୀ ଅଧିକ ଯତ୍ନଶୀଳ ହେବାକୁ ସାଧାରଣରେ ମତପ୍ରକାଶ ପାଉଛି।