13-Mar-2021

ରେଢାଖୋଲ ( ଅନିଲ କୁମାର ପୃଷ୍ଟି )  ସମ୍ବଲପୁର ଜିଲ୍ଲା ରେଢାଖୋଲ ଥାନା ପୋଲିସ ଗତକାଲି ବିଳମ୍ବିତ ରାତିରେ କଟକ- ସମ୍ବଲପୁର ୫୫  ନମ୍ବର ଜାତୀୟ ରାଜପଥ କଡର ସାଧୁମୁଣ୍ଡା ନିକଟରୁ  ବେଆଇନ ଭାବେ ଟ୍ରଲରୁ ଚୋରି ହେଉଥିବା ଏକ ବଡ ଧରଣର କୋଇଲା ଚୋରି ରାକେଟକୁ ପୋଲିସ ଧରିଛି। ଏହି ଚୋରି ରାକେଟରେ ପୋଲିସ ୫ ଟ୍ରଲର , ଗୋଟିଏ ବୋଲେରୋ, ଓ ଜଣେ ଜଗୁଆଳକୁ ଅଟକ ରଖି ପୋଲିସ ଅଧିକ ପଚରା ଉଚରା କରୁଛି। ଜଣା ଯାଇଛି ଯେ ଦୀର୍ଘ ଦିନ ହେଲା ରେଢାଖୋଲ ଅଞ୍ଚଳର ବିଭିନ୍ନ ଜାତୀୟ ରାଜପଥ କଡ଼ରେ ଥିବା ଢ଼ାବା ସହିତ ବିଭିନ୍ନ ସ୍ଥାନ ମାନଙ୍କରେ ଟ୍ରକ ଓ ଟ୍ରଲର ମାନଙ୍କରୁ କୋଇଲା ସବୁ ଚୋରି ହୋଇ ଥାଏ। ଏହି ଟ୍ରକ ଓ ଟ୍ରଲର ମାନଙ୍କରେ ବିଶେଷ କରି ବାହାର ରାଜ୍ୟକୁ ସବୁ ଯାଇଥାଏ।ହେଲେ ଓଡିଶାରୁ ବାହାର ରାଜ୍ୟକୁ ଯାଉଥିବା କୋଇଲା ଗାଡି ସବୁ ଉକ୍ତ ରାଜ୍ୟ ମାନଙ୍କରେ ପହଞ୍ଚିଲା ବେଳକୁ ଗାଡି ମାଲିକ ମାନେ ସବୁ ଓଜନ କଲା ପରେ  କୋଇଲା ଓଜନରେ ୩/୪ କ୍ୟୁଣ୍ଟାଲ କମ ପଡିଥାଏ। ଏହା ପରେ ଗାଡି ମାଲିକ ମାନେ କାହିଁକି ଗାଡିରୁ କୋଇଲା କମ ହେଉଛି କାରଣ ଜାଣିବା ପାଇଁ ଗାଡିମାନଙ୍କର ପିଛା କରିବା ପରେ ସମ୍ବଲପୁର ଜିଲ୍ଲା ରେଢାଖୋଲ ଥାନା ଅନ୍ତର୍ଗତ ୫୫ ନମ୍ବର ଜାତୀୟ ରାଜପଥର ସାଧୁମୁଣ୍ଡା ଗ୍ରାମ ନିକଟରେ ରାସ୍ତା କଡରେ ଗାଡି ସବୁ ଅଟକି ପ୍ରତେକ ଗାଡିରୁ ୨/୩ କ୍ୟୁଣ୍ଟାଲ କୋଇଲା ବାହାର କରାଯାଉଛି। ଏହା ସହିତ ଏହି କୋଇଲା ଚୋରି କାର୍ଯ୍ୟରେ ୫/୧୦  ଜଣ ଶ୍ରମିକ ନିଯୁକ୍ତ ହୋଇଛନ୍ତି। ଏପରିକି ଉକ୍ତ କୋଇଲା ଚୋରି ସ୍ଥାନରେ ଘର, ରୋଷେଇ, ଆଦି ବ୍ୟବସ୍ଥା ସହ ସବୁ କିଛିର ବ୍ୟବସ୍ଥା ରହିଛି। ଏହା ସବୁ ଗାଡି ମାଲିକ ମାନେ ଜାଣିବା ପରେ ରେଢାଖୋଲ ଥାନାରେ ଜଣାଇଥିଲେ। ପୋଲିସ ଏହା ଜାଣିବା ପରେ ଘଟଣା ସ୍ଥଳକୁ ପୋଲିସ ପ୍ରମୁଖ ସଦଳବଳେ ଯାଇ  ଗାଡି ମାନଙ୍କରୁ ଚୋରି ହେଉଥିବା  କୋଇଲା ଗାଡି ମାନଙ୍କୁ ଜବତ କରିଛି। ପୋଲିସ ଏହି ବଡ଼ ଧରଣର କୋଇଲା ଚୋରି ଘଟଣାରେ  ୫ ଟ୍ରଲର, ଗୋଟିଏ ବୋଲେରୋ ଓ ଜଣେ ଜଗୁଆଳକୁ ଅଟକ ରଖି ପଚରା ଉଚୁରା କରୁଥିବା ଜଣା ଯାଉଛି।ଏହି କୋଇଲା ଚୋରି ଘଟଣା ଦୀର୍ଘ ଦିନ ହେଲା ଚାଲି ଆସୁଥିବାବେଳେ ଆଜିର ଏହି ଚଢ଼ାଉ ପୋଲିସର ବଡ଼ ସଫଳତା ବୋଲି ଜଣା ପଡ଼ିଛି।

ହେଲେ ଏ ସଂକ୍ରାନ୍ତରେ ରେଢାଖୋଲ ଥାନା ଅଧିକାରୀ ସୁରୁବାବୁ ଛତ୍ରିଆଙ୍କୁ ପଚାରିବାରେ ସେ କହିଲେ ଯେ ଚୋରି କୋଇଲା ଗାଡି ସବୁ ଅଟକ ରଖାଯାଇଛି ହେଲେ  ଏ ପର୍ଯ୍ୟନ୍ତ କେହି ହେଲେ ଅଭିଯୋଗ କରିନାହାନ୍ତି ବୋଲି କହିଛନ୍ତି। ଏହି ଘଟଣାରେ ମାମଲା ରୁଜୁ ହେବାପରେ ଘଟଣା ସମ୍ପର୍କରେ ଜଣା ଯିବ ବୋଲି ପ୍ରକାଶ କରି ଥିଲେ।