13-Mar-2021

ନୟାଗଡ଼, ନେହେରୁ ଯୁବକେନ୍ଦ୍ର ସଂଗଠନ, ନୟାଗଡ ଏବଂ ୟୁଥ ଫର ସୋସାଇଟି, କୁମ୍ଭାରପଡ଼ା ର ମିଳିତ ଆନୁକୂଲ୍ୟରେ ନୟାଗଡ଼ ଜିଲ୍ଲା ଖଣ୍ଡପଡା ବ୍ଲକର  କୁମ୍ଭାରପଡ଼ା ଗ୍ରାମରେ ବିଦ୍ୟାର୍ଥୀ ଶିକ୍ଷା ନିକେତନ ପରିସରରେ ବ୍ଳକସ୍ତରୀୟ ଯୁବ ସଂସଦ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା | ଉକ୍ତ କାର୍ଯ୍ୟକ୍ରମ ରେ ପ୍ରଥମପର୍ଯ୍ୟାୟ ରେ ସ୍ଥାନୀୟ ଦଶରୁ ଉର୍ଦ୍ଧ ଯୁବାସଂଗଠନ ଏବଂ ଶିକ୍ଷାନୁଷ୍ଠାନ ର ଯୁବକ ଯୁବତୀ ଙ୍କୁ ନେଇ ଏକ ମହିଳା ସଶକ୍ତିକରଣ  ପଦଯାତ୍ରା କୁମ୍ଭାରପଡ଼ା ସ୍ଥିତ ଗାନ୍ଧୀ ଛକ ପର୍ଯ୍ୟନ୍ତ ଯାଇଥିଲା | ସେଠାରେ ଗାନ୍ଧିଜୀ ଙ୍କ ପ୍ରତିମୂର୍ତ୍ତି ରେ ନେହେରୁ ଯୁବକେନ୍ଦ୍ର ସଂଗଠନ ର ଖଣ୍ଡପଡା ବ୍ଳକ ସଂଯୋଜିକା ଶ୍ରୀମତୀ ସାଗରୀକା ଲେଙ୍କା ପୁଷ୍ପମାଲ୍ୟ ଅର୍ପଣ କରିଥିଲେ | ଗାନ୍ଧୀ ଛକ ଠାରୁ ଏହି ଶତାଧିକ ଯୁବକ ଯୁବତୀ ଙ୍କ ପଦଯାତ୍ରା କୁମ୍ଭାରପଡ଼ା ସ୍ଥିତ ବିଦ୍ୟାର୍ଥୀ ଶିକ୍ଷା ନିକେତନ ପରିସର ପର୍ଯ୍ୟନ୍ତ ଅନେକ ସଚେତନ ମୂଳକ ସ୍ଲୋଗାନ ସହିତ ପହଞ୍ଚିଥିଲା | ସେଠାରେ ଏକ ସଭା ଅନୁଷ୍ଠିତ ହୋଇଥିଲା | ଉକ୍ତ କାର୍ଯ୍ୟକ୍ରମ ରେ ଗଣିଆ ବନାଞ୍ଚଳ ଅଧିକାରିଣୀ ସୋନାଲି ସିଓ ଉଦ୍ଘାଟକ ଭାବେ ଯୋଗ ଦେଇଥିଲେ | ଆଜିର ଯୁବସମାଜ କୁ ସେ ଅନେକ ସାମାଜିକ କର୍ତ୍ତବ୍ୟ ବିଷୟରେ ସୂଚନା ପ୍ରଦାନ କରିଥିବା ବେଳେ ଉପସ୍ଥିତ ଯୁବତୀ ମାନଙ୍କୁ ଝାନସୀ ରାଣୀ ଲକ୍ଷ୍ମୀବାଇ, କୁନ୍ତଳାକୁମାରୀ ସାବତ ଙ୍କ ଭଳି ସାହାସିକତା ଦ୍ୱାରା ନାରୀ ସମାଜ କୁ ରକ୍ଷା କରିବା ସହିତ ସଚେତନ କରିବା ପାଇଁ ଆହ୍ୱାନ କରିଥିଲେ | "ଏକତା ହିଁ ବଳ " ଏହି ବିଷୟରେ ମଧ୍ୟ ଏକ ବକ୍ତବ୍ୟ ରଖି ଆମ ଧରିତ୍ରୀ ମାତା ର ସବୁଜ ଶାଢ଼ୀ ତଥା ବଣ ଜଙ୍ଗଲ କୁ କିପରି ରକ୍ଷା କରିବା ସେ ବିଷୟରେ ଅନେକ ଉଦାହରଣ ବାଢ଼ିଥିଲେ | ଏହି କାର୍ଯ୍ୟକ୍ରମ ରେ ମୁଖ୍ୟ ଅତିଥି ତଥା ନେହେରୁ ଯୁବକେନ୍ଦ୍ର ସଂଗଠନ ର ଖଣ୍ଡପଡା ବ୍ଳକ ସଂଯୋଜିକା ସାଗରୀକା ଲେଙ୍କା ଯୋଗ ଦେଇଥିବା ବେଳେ ଶିକ୍ଷକ ଗିରିଶ ଚନ୍ଦ୍ର ବେହେରା ମୁଖ୍ୟ ବକ୍ତା ଭାବେ ଯୋଗଦେଇ ନେତାଜୀ, ସ୍ୱାମୀ ବିବେକାନନ୍ଦ ଙ୍କ ଭଳି ମହାପୁରୁଷ ମାନଙ୍କ ଆଦର୍ଶ ରେ ଅନୁପ୍ରାଣିତ ହୋଇ ଦେଶ ମାତୃକା ର ସେବା କରିବାକୁ ଯୁବସମାଜ କୁ ବାର୍ତ୍ତା ପ୍ରଦାନ କରିଥିଲେ | ସମ୍ମାନିତ ଅତିଥି  ଭାବେ ଶିକ୍ଷକ ବିଭତ୍ସ ଭଞ୍ଜନ ମୁଦୁଲି, ଦୀପ୍ତିମୟୀ ଲେଙ୍କା, ସୁଭାଶିଷ ମିଶ୍ର, ପ୍ରିୟବ୍ରତ ମିଶ୍ର, ବିଭ୍ରାନ୍ତି ମୁଦୁଲି ସକ୍ରିୟ ମଞ୍ଚାସିନ ଥିଲେ | ସାମାଜିକ ଦାୟିତ୍ୱ ବୋଧତା ଏବଂ ଆଜିର ଯୁବ ସମାଜ ଶୀର୍ଷକ ରେ ଏକ ବିତର୍କ ପ୍ରତିଯୋଗିତା ଉପସ୍ଥିତ ବିଦ୍ୟାର୍ଥୀ ତଥା ଯୁବଗୋଷ୍ଠି ମଧ୍ୟରେ ଅନୁଷ୍ଠିତ ହୋଇଥିଲା | ଏହି ପ୍ରତିଯୋଗିତା ରେ ସୂର୍ଯ୍ୟକାନ୍ତ, ସାଇଶ୍ରୀ ଏବଂ ଦୀପକ ଯଥାକ୍ରମେ ପ୍ରଥମ, ଦ୍ଵିତୀୟ ଏବଂ ତୃତୀୟ ସ୍ଥାନ ପ୍ରାପ୍ତକରି ମଞ୍ଚାସିନ ଅତିଥି ମାନଙ୍କ ଠାରୁ ମାନପତ୍ର ଏବଂ ଟ୍ରଫି ଗ୍ରହଣ କରିଥିଲେ |ୟୁଥ ଫର ସୋସାଇଟି, କୁମ୍ଭାରପଡ଼ା ର ସମ୍ପାଦକ ଦିନେଶ କୁମାର ଲେଙ୍କା ଉକ୍ତ ବୈଠକରେ ସଂଯୋଜନା ଏବଂ ଧନ୍ୟବାଦ ଅର୍ପଣ କରିଥିଲେ