11-Feb-2021

ବଲାଙ୍ଗୀର,(ପ୍ରେରଣା ଖବର): ମହାମାରୀ କରୋନା କବଳରୁ ବଲାଙ୍ଗୀର ଜିଲ୍ଲା ମୁକୁଳିବାକୁ ଯାଉଥିବା ବେଳେ ବର୍ତ୍ତମାନ ବିଭିନ୍ନ ସ୍କୁଲ, କଲେଜ ଓ ଅନ୍ୟାନ୍ୟ ଶିକ୍ଷାନୁଷ୍ଠାନ ଗୁଡିକରେ ନାମଲେଖା ପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି । ଏଡ୍‌ମିସନ ପାଇଁ ଜନ୍ମ ପ୍ରମାଣପତ୍ର ନିତାନ୍ତ ଆବଶ୍ୟକ ହୋଇଥିବା ବେଳେ ଏହି ପ୍ରମାଣପତ୍ର ପାଇଁ ଆବେଦନ କରାଯାଉଥିବା ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କ କୋର୍ଟ ରେ ସବୁବେଳେ ତାଲା ଝୁଲୁଥିବା ଦେଖାଯାଉଛି । କେବଳ ଜନ୍ମ ପ୍ରମାଣପତ୍ର ନୁହେଁ ୧୪୪ କେଶ, ୧ଠ୭ କେଶ ତଥା ମୃତ୍ୟୁ ପ୍ରମାଣପତ୍ର ଆଦି ଯାବତିୟ ଗୁରୁତ୍ୱପୂର୍ଣ୍ଣ କାଗଜପତ୍ର ପାଇଁ ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କ କୋର୍ଟରେ ଆବେନ କରାଯାଇଥାଏ । ଏଠାରେ କାର୍ଯ୍ୟରତ ଏକଜିକ୍ୟୁଟିଭ ମାଜିଷ୍ଟ୍ରେଟ ବିନୋଦ ନାୟକ କେତେବେଳେ ଆସନ୍ତି କେତେବେଳେ ଯାଆନ୍ତି ତାହା କେହି ଜାଣନ୍ତି ନାହିଁ । ଶ୍ରୀ ନାୟକ ଏସିଷ୍ଟାଣ୍ଡ କଲେକ୍ଟର ଭାବରେ ମଧ୍ୟ ଦ୍ୱେତ ଦାୟିତ୍ଵ ତୁଲାଇଥିବା ଯୋଗୁଁ ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କ କୋର୍ଟରେ କେତେବେଳେ ରହୁନଥିବା ଅଭିଯୋଗ ହୋଇଛି । ଏଥିଯୋଗୁଁ ଜନ୍ମ ପ୍ରମାଣପତ୍ର ଓ ଅନ୍ୟାନ୍ୟ ଡକ୍ୟୁମେଣ୍ଟ ପାଇବାକୁ ଆବେଦନ କରୁଥିବା ଓକିଲ ମାନଙ୍କୁ ବହୁତ ହଇରାଣ ହେବାକୁ ପଡୁଛି ।  କେତେବେଳେ ସବ୍‌କଲେକ୍ଟର ଅଫିସ ତ କେତେବେଳେ ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କ କାର୍ଯ୍ୟଳୟକୁ ଅଯଥାରେ ଦୌଡିବାକୁ ପଡୁଛି । ଏପରିକି ଏହି ଅଫିସ ରେ କୌଣସି କିରାଣୀ ମଧ୍ୟ ବସୁନଥିବା ଯୋଗୁଁ ଏହି କାର୍ଯ୍ୟାଳୟଟି ପ୍ରାୟତଃ ବନ୍ଦ ରହୁଥିବା ଦେଖାଯାଉଛି । ସପ୍ତାହରେ ଦିନେ ଦିୁଇ ଦିନ ଏକଜିକ୍ୟୁଟିଭ ମାଜିଷ୍ଟ୍ରେଟ ଶ୍ରୀ ନାଏକ ନିଜ ଅଫିସକୁ ଆସୁଥିବା ବେଳେ ଆବେଦନକାରୀଙ୍କ ପ୍ରବଳ ଭିଡ ହେବା ସହ କୋର୍ଟ କାମରେ ଅହେତୁକ ବିଳମ୍ବ ଘଟୁଛି ।

   ବଲାଙ୍ଗୀର ଜିଲ୍ଲାପାଳ ଏଥିପ୍ରତି ଦୃଷ୍ଟି ଦେଇ ତୁରନ୍ତ ଜଣେ ନିୟମିତ ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କୁ ଏଠାରେ ନିଯୁକ୍ତି କରିବା ପାଇଁ ଜନସାଧାରଣ ଦାବି କରିଛନ୍ତି ।