24-Jun-2026

କଣ୍ଟାମାଳ(ଜୟ କୁମାର ମହାରଣା) : କଣ୍ଟାମାଳ ଥାନାର ନାକତଳୁ ସୋମବାର ରାତିରେ ଲକ୍ଷ୍ମୀବଜାର ସ୍ଥିତ ମୁଖ୍ୟ ରାସ୍ତାକଡରେ ଥିବା ଶ୍ରୀଲକ୍ଷ୍ମୀ ମୋବାଇଲ ଦୋକାନର ପଛପାଖ କାନ୍ଥ ଭାଙ୍ଗି ପ୍ରାୟ ୧୫ଲକ୍ଷରୁ ଉର୍ଦ୍ଧ୍ଵ ମୂଲ୍ୟର ମୋବାଇଲ ଚୋରି ହୋଇଥିବା ନେଇ  କଣ୍ଟାମାଳ ଥାନାରେ ହୋଇଥିବା ଅଭିଯୋଗରୁ ଜଣାଯାଇଛି l  ଘଟଣାସ୍ଥଳରେ ପୋଲିସ ଏସଡିପିଓ ଲରେନ୍ସ ରାଉତରାୟ ପହଞ୍ଚି ଘଟଣାର ସିସିଟିଭି ଫୁଟେଜ ସହ ପାରିପାର୍ଶ୍ଵିକ ସ୍ଥିତି ଯାଞ୍ଚ କରିଥିବା ବେଳେ କଣ୍ଟାମାଳ ପୋଲିସ ପକ୍ଷରୁ ତଦନ୍ତ ଜାରିରହିଛି  l  ସୂଚନାମତେ କଣ୍ଟାମାଳ ଥାନା ଠାରୁ ମାତ୍ର ୫୦ମିଟର ଦୂରରେ ମୁଖ୍ୟରାସ୍ତା କଡ଼ ଲକ୍ଷ୍ମୀବଜାର ରେ ଥିବା ଶ୍ରୀଲକ୍ଷ୍ମୀ ମୋବାଇଲ ଦୋକାନ ମାଲିକ ଶାନ୍ତନୁ ରଣା ମଙ୍ଗଳବାର ସକାଳୁ ଆସି ଦୋକାନ ଖୋଲିଥିଲେ l  ଦୋକାନ ଖୋଲି ଦେଖିଥିଲେ ଯେ ଦୋକାନ ପଛପଟ କାନ୍ଥରେ ସିନ୍ଧି ହୋଇଥିବା ବେଳେ ସମସ୍ତ ଦାମୀ ମୋବାଇଲ ଚୋରି ହୋଇଛି l  ଏସମ୍ପର୍କରେ ଦୋକାନ ମାଲିକ ଶାନ୍ତନୁ ରଣା କଣ୍ଟାମାଳ ଥାନାରେ ଏକ ଏତଲା ଦେଇଥିଲେ  l  ଏତଲାକୁ ଭିତ୍ତିକରି ପୋଲିସ ଘଟଣାସ୍ଥଳରେ

ପହଞ୍ଚି ଘଟଣାର ତଦନ୍ତ ଆରମ୍ଭ କରି ଦୋକାନ ଭିତରେ ଲାଗିଥିବା ସିସିଟିଭି ଯାଞ୍ଚ କରିଥିଲା l  ଦୋକାନ ପଛ ପଟ କାନ୍ଥ ତଳପଟେ ସିନ୍ଧି କରି ଭିତରକୁ ଦୁଇଜଣ ମୁଖାଧାରୀ ଦୁର୍ବୃତ୍ତ ପଶି ମୋବାଇଲ ଟର୍ଚ୍ଚ ଆଲୁଅ ଜାଳି ଗୋଟି ଗୋଟି କରି ସବୁ ମୋବାଇଲ ନେଉଥିବା ସିସିଟିଭିରେ କୈଦ ଫୁଟେଜ ରୁ ସ୍ପଷ୍ଟ ଭାବେ ଦେଖିବାକୁ ମିଳିଛି  l  ମୋବାଇଲ ଚୋରି ସମୟର ସମସ୍ତ ଦୃଶ୍ୟ ସିସିଟିଭି ରେ କଏଦ ହୋଇଥିବା ଫୁଟେଜ ସମ୍ପ୍ରତି ମୋବାଇଲ ରୁ ମୋବାଇଲକୁ ଘୁରିବୁଲୁଛି l  ଥାନା ନିକଟରୁ ପୋଲିସ ର ନାକତଳୁ କାନ୍ଥ ଭାଙ୍ଗି ଲକ୍ଷ ଲକ୍ଷ ଟଙ୍କାର ମୋବାଇଲ ଚୋରି ଘଟଣା ପୋଲିସ ପାଇଁ ଏକ ଚ୍ୟାଲେଞ୍ଜ ହୋଇଛି  l  ତେବେ ଘଟଣାର ଯାଞ୍ଚ ଚାଲିଥିବା ବେଳେ ତଦନ୍ତରେ ସାଇଣ୍ଟିଫିକ ଟିମ ର ସହାୟତା ନିଆଯାଇଥିବା କଣ୍ଟାମାଳ ଥାନା ଭାରପ୍ରାପ୍ତ ଥାନାଧିକାରୀ ପ୍ରକାଶ ଭୋଇ କହିଛନ୍ତି  l  ଘଟଣାର ଅଭିଯୁକ୍ତ ମାନଙ୍କୁ ତୁରନ୍ତ ଗିରଫ କରିବା ଓ ରାତ୍ରିକାଳୀନ ପେଟ୍ରୋଲିଙ୍ଗ ବ୍ୟବସ୍ଥାକୁ କଡାକଡି କରିବା ପାଇଁ କଣ୍ଟାମାଳ ବଣିକ ସଂଘ ଓ ଜନସାଧାରଣ ପୋଲିସ ନିକଟରେ ଦାବୀ କରିଛନ୍ତି  l