13-Jun-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ପୁଇଁନ୍ତଲା ତହସିଲ କାର୍ଯ୍ୟାଳୟରେ ପ୍ରଶାସନିକ ତାଳମେଳର ଅଭାବ ଯୋଗୁଁ ଦୈନ୍ଦିନ କାର୍ଯ୍ୟ ସମ୍ପୂର୍ଣ୍ଣ ଅଚଳ ହୋଇପଡ଼ିଛି। ଜମିବାଡ଼ି ମ୍ୟୁଟେସନଠୁ ଆରମ୍ଭ କରି ଛାତ୍ରଛାତ୍ରୀଙ୍କ ସାର୍ଟିଫିକେଟ୍ କାର୍ଯ୍ୟ ପର୍ଯ୍ୟନ୍ତ ସବୁ କାମ ଠପ୍ ହୋଇଯାଇଛି। ଫଳରେ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି।

ପୁଇଁନ୍ତଲା ତହସିଲଦାର ଭାବେ କାର୍ଯ୍ୟରତ ଅଛନ୍ତି ଗୌରବ କୁମାର ବର୍ଗେ। ଅଭିଯୋଗ ଅନୁସାରେ, ତହସିଲଦାର ଅନୁପସ୍ଥିତ ରହିଲେ ତହସିଲର ସମସ୍ତ କାର୍ଯ୍ୟ ସମ୍ପୂର୍ଣ୍ଣ ଠପ୍ ହୋଇଯାଉଛି। ଏଥିସହ କାର୍ଯ୍ୟାଳୟରେ କାର୍ଯ୍ୟରତ ବରିଷ୍ଠ କର୍ମଚାରୀଙ୍କ ମଧ୍ୟରେ ସହଯୋଗର ଅଭାବ ସ୍ପଷ୍ଟ ଦେଖିବାକୁ ମିଳୁଛି। ମୁଖ୍ୟ କିରାଣୀ ରୀନା ପାଣିଗ୍ରାହୀ ଏବଂ ବରିଷ୍ଠ କର୍ମଚାରୀ ପ୍ରଭାତ ମଲ୍ଳିକ ଜନସାଧାରଣଙ୍କୁ ସହଯୋଗ କରୁନଥିବା ଅଭିଯୋଗ ହୋଇଛି। କେହି ନିଜ କାମ ସମ୍ପର୍କରେ ବୁଝିବାକୁ ଆସିଲେ ସେମାନେ ସବୁବେଳେ ବିରକ୍ତି ପ୍ରକାଶ କରୁଥିବା ସ୍ଥାନୀୟ ଲୋକେ କହିଛନ୍ତି।

ବର୍ତ୍ତମାନ ପରିସ୍ଥିତି ଆହୁରି ଜଟିଳ ହୋଇଛି ଆରଆଇ ଓ ଅମିନଙ୍କ ବଦଳି ପରେ। ନୂତନ ଭାବେ ଯୋଗଦାନ କରିବାକୁ ଥିବା କର୍ମଚାରୀ ଏପର୍ଯ୍ୟନ୍ତ ଯୋଗଦାନ କରିନଥିବାରୁ ଛାତ୍ରଛାତ୍ରୀଙ୍କ ଆୟ, ଜାତି, ବାସିନ୍ଦା ସାର୍ଟିଫିକେଟ୍ କାମ ସମ୍ପୂର୍ଣ୍ଣ ବନ୍ଦ ହୋଇପଡ଼ିଛି। ଏହାଦ୍ୱାରା ଉଚ୍ଚଶିକ୍ଷା ଓ ଚାକିରି ପାଇଁ ଆବେଦନ କରୁଥିବା ଛାତ୍ରଛାତ୍ରୀ ହଇରାଣ ହେଉଛନ୍ତି।

ସେହିପରି ଜନସାଧାରଣଙ୍କ ଜମିବାଡ଼ି ସମ୍ବନ୍ଧୀୟ ମ୍ୟୁଟେସନ କାର୍ଯ୍ୟ ମଧ୍ୟ ଠପ୍ ହୋଇପଡ଼ିଛି। ଗତ ବର୍ଷର ଅଧିକାଂଶ ମ୍ୟୁଟେସନ ଫାଇଲ୍ ଏପର୍ଯ୍ୟନ୍ତ ଫଏସଲା ହୋଇନଥିବା ଅଭିଯୋଗ ହୋଇଛି। କର୍ମଚାରୀଙ୍କ ସହଯୋଗର ଅଭାବ ଓ ସମୟାନୁବର୍ତ୍ତୀତା ନ ଥିବାରୁ ତହସିଲ କାର୍ଯ୍ୟାଳୟକୁ ଆସୁଥିବା ଲୋକେ ଦିନକୁ ଦିନ ଫେରିଯିବାକୁ ବାଧ୍ୟ ହେଉଛନ୍ତି।

ଏହି ପରିସ୍ଥିତି ଯୋଗୁଁ ପୁଇଁନ୍ତଲା ଅଞ୍ଚଳରେ ଜନଅସନ୍ତୋଷ ବଢ଼ିବାରେ ଲାଗିଛି। ସାଧାରଣ ଲୋକେ କହିଛନ୍ତି, ସରକାର ସାଧାରଣ ଲୋକଙ୍କ କାମକୁ ସହଜ କରିବା ପାଇଁ ଅନେକ ପଦକ୍ଷେପ ନେଉଥିବା ବେଳେ ତଳସ୍ତରେ କର୍ମଚାରୀଙ୍କ ଅବହେଳା ଯୋଗୁଁ ସେ ଉଦ୍ଦେଶ୍ୟ ବିଫଳ ହେଉଛି।

ସ୍ଥାନୀୟ ଲୋକେ ଦାବି କରିଛନ୍ତି ଯେ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ତୁରନ୍ତ ହସ୍ତକ୍ଷେପ କରି ପୁଇଁନ୍ତଲା ତହସିଲ କାର୍ଯ୍ୟାଳୟର କାର୍ଯ୍ୟ ପୁନଃ ସ୍ୱାଭାବିକ କରାଇବା ସହ ଦାୟିତ୍ୱରେ ଅବହେଳା କରୁଥିବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ।

ଏ ନେଇ ତହସିଲଦାର ଗୌରବ କୁମାର ବର୍ଗେଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲେ ମଧ୍ୟ ତାଙ୍କର ମତାମତ ମିଳିପାରିନାହିଁ।