13-Jun-2026

ବଲାଙ୍ଗୀର(ପ୍ରେରଣା ଖବର)  ରୋମାନିଆରେ ଆୟୋଜିତ ବିଶ୍ୱ ପ୍ରସିଦ୍ଧ ଆନ୍ତର୍ଜାତୀୟ ୱିଲିୟମ୍ ସେକ୍ସପିୟର ଥିଏଟର ମହୋତ୍ସବରେ ୭୧ଟି ଦେଶର ପ୍ରତିନିଧିଙ୍କ ମଧ୍ୟରେ ଭାରତର ପ୍ରତିନିଧିତ୍ୱ କରି ବିଶ୍ୱ ମଞ୍ଚରେ ଓଡ଼ିଶା ଓ ଭାରତର ଗୌରବ ବୃଦ୍ଧି କରିଥିବା କଳିଙ୍ଗ ଇନଷ୍ଟିଟ୍ୟୁଟ ଅଫ୍ ସୋସିଆଲ ସାଇନ୍ସେସ୍ (KISS), ଭୁବନେଶ୍ୱରର ପ୍ରତିଭାଶାଳୀ ଛାତ୍ରଛାତ୍ରୀମାନଙ୍କୁ ବଲାଙ୍ଗୀରବାସୀଙ୍କ ପକ୍ଷରୁ ଭବ୍ୟ ଓ ଐତିହାସିକ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା।
କିସର ଆଦିବାସୀ ଛାତ୍ରଛାତ୍ରୀମାନେ ନିଜର ଅନନ୍ୟ ଆଦିବାସୀ ଗୀତ, ସଙ୍ଗୀତ, ନୃତ୍ୟ, କଳା, ସଂସ୍କୃତି, ପରମ୍ପରା ଓ ଐତିହ୍ୟର ଅତୁଳନୀୟ ପ୍ରଦର୍ଶନ ମାଧ୍ୟମରେ ଆନ୍ତର୍ଜାତୀୟ ଦର୍ଶକଙ୍କୁ ମୁଗ୍ଧ କରିଥିଲେ। ବିଶେଷକରି ସାନ୍ତାଳୀ ଭାଷାରେ ୱିଲିୟମ୍ ସେକ୍ସପିୟରଙ୍କ ନାଟକ ମଞ୍ଚସ୍ଥ କରି ସେମାନେ ବିଶ୍ୱ ରଙ୍ଗମଞ୍ଚ ଇତିହାସରେ ଏକ ନୂତନ ଅଧ୍ୟାୟ ସୃଷ୍ଟି କରିଥିଲେ। ରୋମାନିଆରେ ସେମାନଙ୍କ ପ୍ରଦର୍ଶନକୁ କଳା, ସଂସ୍କୃତି ଓ ନାଟ୍ୟ ଜଗତର ବିଶିଷ୍ଟ ବ୍ୟକ୍ତିବର୍ଗଙ୍କ ଦ୍ୱାରା ଉଚ୍ଚ ପ୍ରଶଂସା କରାଯାଇଥିଲା।
ଏହିଏହି ସଫଳତା କେବଳ KISS ପାଇଁ ନୁହେଁ, ବରଂ ଓଡ଼ିଶା,

ଭାରତ ଓ ସମଗ୍ର ବିଶ୍ୱର ଆଦିବାସୀ ସମାଜ ପାଇଁ ଗର୍ବ ଓ ଗୌରବର ବିଷୟ। ଛାତ୍ରଛାତ୍ରୀମାନେ ବିଶ୍ୱ ସମୁଦାୟ ସମ୍ମୁଖରେ ଭାରତର ଆଦିବାସୀ ସଂସ୍କୃତିର ସମୃଦ୍ଧି, ବିବିଧତା ଓ ମହାନ ପରମ୍ପରାକୁ ସଫଳତାର ସହ ପ୍ରତିପାଦନ କରିଥିଲେ।
 ବଲାଙ୍ଗିର ଜାତୀୟ ରାଜପଥରୁ KISS କ୍ୟାମ୍ପସ, ପର୍ଯ୍ୟନ୍ତ ପାରମ୍ପରିକ ଆଦିବାସୀ ବାଦ୍ୟଯନ୍ତ୍ର, ନୃତ୍ୟ, ଗୀତ ଓ ସାଂସ୍କୃତିକ ଶୋଭାଯାତ୍ରା ମାଧ୍ୟମରେ କଳାକାରମାନଙ୍କୁ ଉତ୍ସାହ ଓ ଆନନ୍ଦର ସହ ଭବ୍ୟ ସ୍ୱାଗତ କରାଯାଇଥିଲା। KISS କ୍ୟାମ୍ପସରେ ଆୟୋଜିତ ସମ୍ବର୍ଦ୍ଧନା ସଭାରେ ବିଭିନ୍ନ ସାମାଜିକ, ସାଂସ୍କୃତିକ, ଶିକ୍ଷାନୁଷ୍ଠାନିକ  ସଂଗଠନର ପ୍ରତିନିଧିମାନେ ଯୋଗଦେଇ କଳାକାରମାନଙ୍କୁ ଅଭିନନ୍ଦନ ଜଣାଇଥିଲେ।
ବକ୍ତାମାନେ KIIT ଓ KISSର ପ୍ରତିଷ୍ଠାତା ଡ଼. ଅଚ୍ୟୁତ ସାମନ୍ତଙ୍କ ପ୍ରତି ଗଭୀର କୃତଜ୍ଞତା ବ୍ୟକ୍ତ କରି କହିଥିଲେ ଯେ, ତାଙ୍କର ଦୂରଦର୍ଶୀ ନେତୃତ୍ୱ ଲକ୍ଷାଧିକ ଆଦିବାସୀ ଶିଶୁଙ୍କ ଜୀବନରେ ଶିକ୍ଷା, ସ୍ୱାସ୍ଥ୍ୟ, କ୍ରୀଡ଼ା, କୌଶଳ ବିକାଶ, କଳା, ସଂସ୍କୃତି ଓ ସାମାଜିକ ସଶକ୍ତିକରଣ ମାଧ୍ୟମରେ ଅଭୂତପୂର୍ବ ପରିବର୍ତ୍ତନ ଆଣିଛନ୍ତି। ଶିକ୍ଷା ମାଧ୍ୟମରେ ଦାରିଦ୍ର୍ୟ ଦୂରୀକରଣ କ୍ଷେତ୍ରରେ ତାଙ୍କର ଅବଦାନ ସମଗ୍ର ବିଶ୍ୱ ପାଇଁ ଏକ ଆଦର୍ଶ ମଡେଲ୍ ଭାବେ ପରିଗଣିତ ହେଉଛି।
ବକ୍ତାମାନେ କହିଥିଲେ ଯେ, ମାତ୍ର ୩୩ ବର୍ଷ ମଧ୍ୟରେ KISS ଲକ୍ଷାଧିକ ଆଦିବାସୀ ଛାତ୍ରଛାତ୍ରୀଙ୍କୁ ଗୁଣାତ୍ମକ ବିଦ୍ୟାଳୟ, ଉଚ୍ଚ ଓ ବୃତ୍ତିଗତ ଶିକ୍ଷା ପ୍ରଦାନ କରି ବିଭିନ୍ନ କ୍ଷେତ୍ରରେ ରୋଜଗାରର ସୁଯୋଗ ସୃଷ୍ଟି କରିଛି। ଏହା ଦ୍ୱାରା ସେମାନଙ୍କ ମଧ୍ୟରେ ଆତ୍ମନିର୍ଭରଶୀଳତା, ସମ୍ମାନ ଓ ସାମାଜିକ ନ୍ୟାୟର ଭାବନା ସୁଦୃଢ଼ ହୋଇଛି। ଡ଼. ସାମନ୍ତଙ୍କ ଶିକ୍ଷା, ସ୍ୱାସ୍ଥ୍ୟ, କ୍ରୀଡ଼ା, କଳା, ସଂସ୍କୃତି, ଭାଷା ସଂରକ୍ଷଣ, ହସ୍ତଶିଳ୍ପ, ମାନବୀୟ ମୂଲ୍ୟବୋଧ ଓ ସାମାଜିକ ଉନ୍ନତି କ୍ଷେତ୍ରରେ ଅବଦାନ ଅତୁଳନୀୟ ବୋଲି ବର୍ଣ୍ଣନା କରାଯାଇଥିଲା।
 

ସମ୍ବର୍ଦ୍ଧନା ସଭାରେ ପୂର୍ବତନ ରାଜ୍ୟସଭା ସାଂସଦ ଶ୍ରୀ ନିରଞ୍ଜନ ବିଶି, ପୂର୍ବତନ ଦେଓଗାଁ ବ୍ଲକ ଅଧ୍ୟକ୍ଷ ଶ୍ରୀ ଲକ୍ଷ୍ମଣ ମେହେର, ଜିଲ୍ଲା ସଂସ୍କୃତି ଅଧିକାରୀ, ଜିଲ୍ଲା କ୍ରୀଡ଼ା ଅଧିକାରୀ, ବ୍ଲକ ଶିକ୍ଷା ଅଧିକାରୀ, ଆଇନଜୀବୀ ପ୍ରିୟରଞ୍ଜନ ବାହିଦାର ଓ ଜଷ୍ଟିସ୍ ଏସ୍. କାର୍ଜୀ ପ୍ରମୁଖ ଉଦ୍ବୋଧନ ଦେଇ କଳାକାରମାନଙ୍କୁ ଅଭିନନ୍ଦନ ଜଣାଇଥିଲେ।
ସମସ୍ତ ବକ୍ତା KISS ପରିବାରକୁ ଇତିହାସ ସୃଷ୍ଟି କରି ଓଡ଼ିଶା ଓ ଭାରତର ଗୌରବକୁ ବିଶ୍ୱ ଦରବାରରେ ପହଞ୍ଚାଇଥିବାରୁ ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ ଜଣାଇଥିଲେ।