06-Jun-2026

ବଲାଙ୍ଗୀର (ପ୍ରେରଣା ଖବର):  ଗତକାଲି ରାଜେନ୍ଦ୍ର ବିଶ୍ୱବିଦ୍ୟାଳୟର ସ୍ନାତକ ପରୀକ୍ଷା ଫଳାଫଳ ପ୍ରକାଶ ପାଇଥିବାବେଳେ ବଲାଙ୍ଗୀର ଜିଲ୍ଲାର ସକମାସ୍ଥିତ  ଯୁବୋଦୟ କଲେଜ ଅଫ ଆଡଭାନ୍ସଡ୍ ଟେକ୍ନୋଲୋଜି  ଏକ ଐତିହାସିକ ସଫଳତା ହାସଲ କରିଛି। ଏହି କଲେଜର ଛାତ୍ରୀ ଦେବଜାନୀ ଖମାରୀ, ଶ୍ରୀ ଅଶୋକ କୁମାର ଖମାରୀ ଓ ଶ୍ରୀମତୀ କାମଳିନୀ ଖମାରୀଙ୍କ କନ୍ୟା, ବଲାଙ୍ଗୀରର ଚଣ୍ଡନଭାଟିରୁ ଆସନ୍ତି, ସେ ୯.୪୬ ସି ହାସଲ କରି ସମଗ୍ର ବିଶ୍ୱବିଦ୍ୟାଳୟରେ ପ୍ରଥମ ସ୍ଥାନ ଅଧିକାର କରିଛନ୍ତି।

ସେହିପରି ଏହି କଲେଜର ଅନ୍ୟ ଜଣେ ମେଧାବୀ ଛାତ୍ରୀ ଶିଖା ମଞ୍ଜରୀ କଠାର, ଶ୍ରୀ ସରୋଜ କଠାର ଓ ଶ୍ରୀମତୀ ଝରଣା କଠାରଙ୍କ କନ୍ୟା , କୁମ୍ଭାରୀ , ସଇଁତଳାରୁ ଆସନ୍ତି , ସେ ୯.୩୭ ସିଜିପିଏ ହାସଲ କରି ବିଶ୍ୱବିଦ୍ୟାଳୟର ଦ୍ୱିତୀୟ ସ୍ଥାନ ଅଧିକାର କରିଛନ୍ତି।

ଉଲ୍ଲେଖଯୋଗ୍ୟ ଯେ, ଗତବର୍ଷ  ଯୁବୋଦୟର ଛାତ୍ରୀ ଅଞ୍ଜେଲିନା ପାଣିଗ୍ରାହୀ ୯.୩୬  ସିଜିପିଏ ସହ ବିଶ୍ୱବିଦ୍ୟାଳୟର ଶୀର୍ଷ ସ୍ଥାନ ହାସଲ କରିଥିଲେ। ଚଳିତ ବର୍ଷ ଦେବଜାନୀ ଓ ଶିଖା ମଞ୍ଜରୀ ଉଭୟେ ତାଙ୍କଠାରୁ ଅଧିକ ସିଜିପିଏ ହାସଲ କରି ନୂଆ କୀର୍ତ୍ତିମାନ ସ୍ଥାପନ କରିଛନ୍ତି।

ଦେବଜାନୀ ଖମାରୀ ଜୀବବିଜ୍ଞାନ ଶାଖାରେ ବିଶ୍ୱବିଦ୍ୟାଳୟ ସ୍ତରରେ ଶୀର୍ଷ ସ୍ଥାନ ଅଧିକାର କରିଥିବା ବେଳେ, ଶିଖା ମଞ୍ଜରୀ କଠାର ଭୌତିକ ବିଜ୍ଞାନ ଶାଖାରେ ପ୍ରଥମ ସ୍ଥାନ ଅଧିକାର କରିଛନ୍ତି। ଦେବଜାନୀ ପ୍ରାଣୀବିଜ୍ଞାନ ବିଭାଗର ଛାତ୍ରୀ ହୋଇଥିବା ବେଳେ ଶିଖା ମଞ୍ଜରୀ ପଦାର୍ଥ ବିଜ୍ଞାନ  ବିଭାଗର ଛାତ୍ରୀ ଅଟନ୍ତି।

ଏହି ସଫଳତା ପରେ ଉଭୟ ଛାତ୍ରୀଙ୍କ ଗାଁରେ ଖୁସିର ଲହରୀ ଖେଳିଯାଇଛି। ପରିବାର ସଦସ୍ୟ, ସମ୍ପର୍କୀୟ, ବନ୍ଧୁବର୍ଗ ଏବଂ ଅଞ୍ଚଳବାସୀ ଏହି ସଫଳତାକୁ ନେଇ ଗର୍ବ ଅନୁଭବ କରୁଛନ୍ତି। କଲେଜ ପକ୍ଷରୁ ମଧ୍ୟ ଉଭୟ ଛାତ୍ରୀଙ୍କୁ ଶୁଭେଚ୍ଛା ଓ ଉଜ୍ଜ୍ୱଳ ଭବିଷ୍ୟତ ପାଇଁ ଶୁଭକାମନା ଜଣାଯାଇଛି।

ଏହି ଅବସରରେ ଅନୁଷ୍ଠାନର ନିର୍ଦ୍ଦେଶକ  ଶ୍ରୀ ଆମ୍ବରୀଶ  ଦାଶ କହିଛନ୍ତି, “ ଯୁବୋଦୟର ଛାତ୍ରଛାତ୍ରୀଙ୍କୁ କେବଳ ଗୁଣାତ୍ମକ ଶିକ୍ଷା ନୁହେଁ, ବରଂ ବ୍ୟବହାରିକ ଜ୍ଞାନ, ବ୍ୟକ୍ତିତ୍ୱ ବିକାଶ ଓ ଦୃଷ୍ଟିଭଙ୍ଗୀର ଉନ୍ନତି ପାଇଁ ବିଭିନ୍ନ ସୁଯୋଗ ପ୍ରଦାନ କରାଯାଏ। ଏହା ସହିତ ନିଶୁଳ୍କ ଚାକିରିମୁଖୀ ପ୍ରଶିକ୍ଷଣ ମାଧ୍ୟମରେ ଛାତ୍ରଛାତ୍ରୀଙ୍କୁ କର୍ମକ୍ଷେତ୍ର ପାଇଁ ପ୍ରସ୍ତୁତ କରାଯାଉଛି।”