15-Apr-2026

ସିନାପାଲି,(ଚିନ୍ତାମଣି ନେତାମ):
ନୂଆପଡା ଜିଲ୍ଲା ସିନାପାଲି ବ୍ଲକ ଅନ୍ତର୍ଗତ ନୀଳଜି ଗ୍ରାମରେ ଅବସ୍ଥିତ ସରସ୍ବତୀ ଶିଶୁ ବିଦ୍ୟାମନ୍ଦିର ପରିସରରେ ଅଷ୍ଟାଦଶ ବାର୍ଷିକ ଉତ୍ସବ ଉତ୍ସାହ, ଉଲ୍ଲାସ ଓ ଆନନ୍ଦମୟ ପରିବେଶରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ଛାତ୍ରଛାତ୍ରୀ, ଅଭିଭାବକ, ଶିକ୍ଷକ ଓ ସ୍ଥାନୀୟ ଗଣମାନ୍ୟ ବ୍ୟକ୍ତିଙ୍କର ଭରପୂର ସମାଗମ ଦେଖିବାକୁ ମିଳିଥିଲା।
ଉତ୍ସବ ଅବସରରେ ଆୟୋଜିତ ସଭାରେ ପରିଚାଳନା ସମିତିର ସଭାପତି ଶ୍ରୀଯୁକ୍ତ ସତ୍ୟବ୍ରତ ଗହୀର ସଭାପତିତ୍ୱ କରିଥିଲେ। ମୁଖ୍ୟ ଅତିଥି ଭାବରେ ପୂର୍ବତନ ବୋଡେ଼ନ ପଂଚାୟତ ସମିତି ଅଧ୍ୟକ୍ଷ ଶ୍ରୀଯୁକ୍ତ ଲମ୍ବୋଦର ନିଆଲ ଯୋଗଦେଇଥିଲେ। ମୁଖ୍ୟ ବକ୍ତା ଭାବରେ ଶ୍ରୀଯୁକ୍ତ ଗୌରାଙ୍ଗ କୁମାର ସାହୁ, କବି-ଶିକ୍ଷକ ପି.ଏମ. ଶ୍ରୀ ରାଜା (ଏ.ଟି. ହାଇସ୍କୁଲ, ଖଡ଼ିଆଳ) ଉପସ୍ଥିତ ରହି ପ୍ରେରଣାଦାୟକ ଭାଷଣ ଦେଇଥିଲେ।
ଏହାସହ ଉପାଧ୍ୟାକ୍ଷା ସ୍ୱତନ୍ତ୍ର ଉନ୍ନୟନ ପରିଷଦ ନୂଆପଡା ଶ୍ରୀମତୀ ବେଳମତି ମାଝୀ, ସଂକୁଳ ପ୍ରମୁଖ ଶ୍ରୀଯୁକ୍ତ ତୁଳସୀ ରାମ ମେହେର, ପରିଚାଳନା ସମିତି ସମ୍ପାଦକ ଶ୍ରୀ ଲକ୍ଷ୍ମଣ ପ୍ରଧାନ ଏବଂ ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ପ୍ରସାନନ୍ଦ କୁମ୍ଭାର ସମ୍ମାନିତ ଅତିଥି ଭାବେ ଯୋଗଦେଇଥିଲେ।
କାର୍ଯ୍ୟକ୍ରମର ଆରମ୍ଭରେ ଅତିଥିମାନେ ପ୍ରଭୁ ଶ୍ରୀରାମ, ମା ସରସ୍ବତୀ, ଶ୍ରୀଗୁରୁଜୀ, ଡ଼ଃ ହେଡ଼ଗୱାର ଓ ଭାରତ ମାତାଙ୍କ ଫଟୋଚିତ୍ରରେ ମାଲ୍ୟାର୍ପଣ କରି ଦୀପ ପ୍ରଜ୍ୱଳନ ସହ ପୂଜାର୍ଚ୍ଚନା କରିଥିଲେ। ଶିଶୁମନ୍ଦିର ଛାତ୍ରୀମାନେ ସୁମଧୁର କଣ୍ଠରେ ସ୍ୱାଗତ ସଙ୍ଗୀତ ପ୍ରସ୍ତୁତ କରି ସମସ୍ତଙ୍କୁ ମୋହିତ କରିଥିଲେ। ପରବର୍ତ୍ତୀତ ମୁଖ୍ୟ ଅତିଥିଙ୍କୁ ପୁଷ୍ପଗୁଚ୍ଛ ଓ ସ୍ମୃତିଚିହ୍ନ ପ୍ରଦାନ କରି ସମ୍ମାନିତ କରାଯାଇଥିଲା।
ସମ୍ପାଦକ ଶ୍ରୀ ଲକ୍ଷ୍ମଣ ପ୍ରଧାନ ଅତିଥିମାନଙ୍କ ପରିଚୟ ପ୍ରଦାନ କରିଥିବାବେଳେ ପ୍ରଧାନ ଆଚାର୍ଯ୍ୟ ଶ୍ରୀ ବୀରଭଦ୍ର ସା ବାର୍ଷିକ ବିବରଣୀ ପଠନ କରିଥିଲେ। ଅତିଥିମାନେ ନିଜ ଭାଷଣରେ ଶିଶୁମନ୍ଦିରକୁ ଏକ ଆଦର୍ଶ ଶିକ୍ଷା ଅନୁଷ୍ଠାନ ବୋଲି ବର୍ଣ୍ଣନା କରି, ଏଠାରେ ଶିକ୍ଷା ସହ ସଂସ୍କାର ଓ ଚରିତ୍ର ଗଠନକୁ ଯେପରି ଗୁରୁତ୍ୱ ଦିଆଯାଉଛି ତାହାର  ପ୍ରଶଂସା କରିଥିଲେ।
ଏହି ଅବସରରେ ସିନାପାଲି ଶିଶୁ ବିଦ୍ୟାମନ୍ଦିରର ପ୍ରଧାନ ଆଚାର୍ଯ୍ୟ ଶ୍ରୀ ଚରଣ ନେତାମ ଓ ସ୍ୱାଗତ ସଙ୍ଗୀତ ସମୟରେ ବାଦ୍ୟଯନ୍ତ୍ରରେ ସହଯୋଗ କରିଥିବା ଶିକ୍ଷକ ଶ୍ରୀ ଦୀପକ ସା ଏବଂ ଶ୍ରୀ ଧୀରେନ୍ଦ୍ର କୁମାର ସାଙ୍କୁ ନାରିକେଳ ଓ ଉପହାର ଦେଇ ସମ୍ମାନିତ କରାଯାଇଥିଲା।
ଉତ୍ସବର ମୁଖ୍ୟ ଆକର୍ଷଣ ଥିଲା ଛାତ୍ରଛାତ୍ରୀମାନଙ୍କର ଚମତ୍କାର ସାଂସ୍କୃତିକ କାର୍ଯ୍ୟକ୍ରମ। ନୃତ୍ୟ, ସଙ୍ଗୀତ, ଅଭିନୟ ଓ ବିଭିନ୍ନ ସୃଜନଶୀଳ ପ୍ରଦର୍ଶନ ମାଧ୍ୟମରେ ଶିଶୁମାନେ ନିଜ ପ୍ରତିଭାର ଦୃଶ୍ୟମାନ ପ୍ରଦର୍ଶନ କରି ସମସ୍ତଙ୍କ ହୃଦୟ ଜିତିନେଇଥିଲେ। ଦର୍ଶକମାନେ ମଧ୍ୟ ଏହି ପ୍ରଦର୍ଶନକୁ ଭୁରିଭୁରି ପ୍ରଶଂସା କରିଥିଲେ।
ଏହାସହ ଶିକ୍ଷା, କ୍ରୀଡ଼ା ଓ ଅନ୍ୟାନ୍ୟ କ୍ଷେତ୍ରରେ କୃତୀ ଛାତ୍ରଛାତ୍ରୀମାନଙ୍କୁ ଟ୍ରଫି ଓ ପୁରସ୍କାର ପ୍ରଦାନ କରାଯାଇଥିଲା, ଯାହା ସେମାନଙ୍କ ମନରେ ନୂଆ ଉତ୍ସାହ ଓ ପ୍ରେରଣା ସୃଷ୍ଟି କରିଥିଲା।
ସମଗ୍ର କାର୍ଯ୍ୟକ୍ରମକୁ ଆଚାର୍ଯ୍ୟ ଶ୍ରୀ ବୀରଭଦ୍ର ସା ସୁଚାରୁ ଭାବରେ ସଂଚାଳନା କରିଥିବାବେଳେ, ଶେଷରେ ପରିଚାଳନା ସମିତିର କୋଷାଧ୍ୟକ୍ଷ ଶ୍ରୀ ଓଂକାର ପାଣ୍ଡେ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।
ଏହି ଉତ୍ସବରେ ଅଞ୍ଚଳର ବିଭିନ୍ନ ପ୍ରମୁଖ ବ୍ୟକ୍ତିମାନେ ଯଥା ତାରାଚନ୍ଦ୍ର ପ୍ରଧାନ, କୁମ୍ଭ ବାଗ, ଅଶୋକ ପ୍ରଧାନ, କିଶୋର ସା, ଜନ୍ମେଜୟ ଦଣ୍ଡସେନା, ଥବିର ନିଆଲ, ଗଜମନ ନିଆଲ, ତୁଳସୀ ରାମ ନିଆଲ, ତରୁଣ ସା, ଦୁର୍ବଳ ସୁନାନୀ, ଲୋମସ ସା, ଦେବାନନ୍ଦ ବାଗ, ରୋହିତାଶ୍ୱ ସୁନାନୀ, ବୁଲୁ ସୁନାନୀ, ବିଜୟ ନାଗ, ଗଗନ ସା, ସନ୍ତୋଷ ସାହୁ ଆଦି ଉପସ୍ଥିତ ରହିଥିଲେ।ଉତ୍ସବର ସଫଳ ଆୟୋଜନରେ ସୁନେଶ୍ୱର ପୁଞ୍ଜି, ବେଣୁଧର ନିଆଲ, ଖିରାଦ୍ରୀ ସୁନାନୀ, ଡୁମେରମତି ଗହୀର, ପ୍ୟାରୀ ସା ଓ ମିନା ନାଗଙ୍କ ସହଯୋଗ ପ୍ରଶଂସନୀୟ ରହିଥିଲା। ଅଭିଭାବକ ଓ ପରିଚାଳନା ସମିତିର ସଭ୍ୟସଭ୍ୟା  ସହଯୋଗ କରିଥିଲେ l