07-Apr-2026

ବଲାଙ୍ଗୀର(ପ୍ରେରଣା ଖବର): ବାଲାଙ୍ଗୀରର ଜଣାଶୁଣା ଦକ୍ଷ ସଂଗଠକ ତଥା ଜଣେ ମେଳାପୀ ମଣିଷ ଭାବରେ ସମସ୍ତଙ୍କ ପରିଚିତ ପ୍ରମୋଦ ସାହୁଙ୍କ ମାତ୍ର ୫୩ ବର୍ଷ ବୟସରେ ଆଜି  ହୃଦଘାତରେ ପରଲୋକ ହୋଇଯାଇଛି। ଗତ କିଛି ଦିନ ତଳେ ପ୍ରମୋଦଙ୍କୁ ଛାତିରେ ଯନ୍ତ୍ରଣା ହେବାରୁ ତାଙ୍କୁ ପରିବାର ଲୋକେ ହସ୍ପିଟାଲରେ ଭର୍ତ୍ତି କରିଥିଲେ। ପରେ ପରେ  ବିଭିନ୍ନ ସ୍ୱାସ୍ଥ୍ୟଗତ ଜଟିଳ ସମସ୍ୟା ଦେଖାଯିବା ସହ ତାଙ୍କ କିଡ଼ନୀ ଆକ୍ରାନ୍ତ ହେବାରୁ ତାଙ୍କୁ

ଗୁରୁତର ଅବସ୍ଥାରେ ବୁର୍ଲା ହସ୍ପିଟାଲରେ ଭର୍ତ୍ତି କରାଯାଇଥିଲା। ତେବେ ଡାକ୍ତରଙ୍କ ସମସ୍ତ ପ୍ରଚେଷ୍ଟା ସତ୍ୱେ ଆଜି ପ୍ରମୋଦଙ୍କ ପରଲୋକ ହୋଇଯାଇଛି। ବଲାଙ୍ଗୀର ମୁନିସିପାଲିଟିର ପୂର୍ବତନ ଅଧ୍ୟକ୍ଷ ପ୍ରଦୀପ ସାହୁ ଙ୍କ ସାନ ଭାଇ ପ୍ରମୋଦ ବିଜେପି ର ଦୃଢ଼ ସମର୍ଥକ ରହିବା ସହ ବଲାଙ୍ଗୀର ଏକ୍ସନ କମିଟି ସମେତ ବିଭିନ୍ନ ସାମାଜିକ ସଂଗଠନ ସହିତ ଜଡିତ ଥିଲେ। ଆଜି ମୃତ୍ୟୁ ଖବର ପ୍ରଚାରିତ ହେବା ପରେ ପ୍ରମୋଦଙ୍କ ଟିକ୍ରାପଡା ସ୍ଥିତ ବାସଭବନରେ ନିଜର ଜ୍ଞାତି କୁଟୁମ୍ବ ଓ ବନ୍ଧୁ ସ୍ୱଜନ ଙ୍କ ଭିଡ଼ ଜମିଥିଲା। ମୃତ୍ୟୁ ଶଯ୍ୟା ନିକଟରେ ପ୍ରମୋଦ ଙ୍କ ବିଧବା ପତ୍ନୀ  ଝରଣା ଓ ଦୁଇ ପୁଅ ସ୍ୱାଗତ ସଙ୍ଗମ ଏବଂ ସ୍ୱସ୍ତିକ ସଙ୍ଗମ ଉପସ୍ଥିତ ଥିଲେ।

ପ୍ରମୋଦଙ୍କ ଅକାଳ ବିୟୋଗରେ ପାଟଣାଗଡ଼ ବିଧାୟକ ତଥା ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ବଲାଙ୍ଗୀର ସାଂସଦ ସଂଗୀତା କୁମାରୀ ସିଂହଦେଓ, ବରିଷ୍ଠ ବିଜେପି ନେତା ଗୋପାଳଜୀ ପାଣିଗ୍ରାହୀ ଓ ବିଜେପି ଜିଲ୍ଲା ସଭାପତି ଶ୍ରୀବତ୍ସ ବେହେରା ଗଭୀର  ଶୋକପ୍ରକାଶ କରିବା ସହ ବଲାଙ୍ଗୀର ଜଣେ ଦୃଢ଼ ସଂଗଠକଙ୍କୁ ହରାଇଲା ବୋଲି କହିଛନ୍ତି। ଆଜି ବିଭୁତି ପଡା ସ୍ମଶାନ ଘାଟ ଠାରେ  ଠାରେ ତାଙ୍କର ଅନ୍ତିମ ସଂସ୍କାର କରାଯାଇଛି।  ପ୍ରମୋଦଙ୍କ ବଡ ପୁଅ ସ୍ୱାଗତ ସଙ୍ଗମ ମୁଖାଗ୍ନି ଦେଇଥିଲେ। ପ୍ରମୋଦଙ୍କ ଅକାଳ ବିୟୋଗରେ ବଲାଙ୍ଗୀର ଟିକ୍ରାପଡା ଅଞ୍ଚଳରେ ଶୋକର ଛାୟା ଖେଳି ଯାଇଛି।