06-Feb-2021

ଭୁବନେଶ୍ବର (ପ୍ରେରଣା ଖବର): ଆଜି ସାରା ଭାରତରେ ବିଭିନ୍ନ କୃଷକ ସଂଗଠନର ତିନି ଘଣ୍ଟିଆ ଚକା  ବନ୍ଦ  ଡାକରା ଦିଆଯାଇଛି । ଏହି ପରିପ୍ରେକ୍ଷୀରେ ଗତକାଲି ସନ୍ଧ୍ୟାରେ ଦିଲ୍ଲୀ ରୁ ଆସି ଭୁବନେଶ୍ୱରରେ ପହଞ୍ଚିଲେ ରାଷ୍ଟ୍ରୀୟ କିଷାନ ମଜ଼ଦୁର ମହାସଂଘ ର ସଭାପତି ସଚିନ ମହାପାତ୍ର । ଭୁବନେଶ୍ୱର ରେଳ ଷ୍ଟେସନ ରେ ପହଞ୍ଚିବା ପରେ ମଜଦୂର ସଂଘ ପକ୍ଷରୁ ସ୍ୱାଗତ ସମ୍ବର୍ଧନା ଦିଆଯାଇ ଥିଲା । ଗତ ଦୁଇ ମାସ ଧରି ଦିଲ୍ଲୀ ସ୍ଥିତ ସର୍ବଭାରତୀୟ ସ୍ତରରେ ଚାଲିଥିବା କୃଷକ ଆନ୍ଦୋଳନ ଡାକରା ରେ ଓଡିଶା ତରଫ ରୁ ରାଷ୍ଟ୍ରୀୟ କିଷାନ ମଜ଼ଦୁର ମହାସଂଘର ରାଜ୍ୟ ସଭାପତି ସଚିନ୍ ମହାପାତ୍ର ଏକ ଟିମ ନେଇ ଆରମ୍ଭରୁ ଏହି ଆନ୍ଦୋଳନରେ ସାମିଲ ହୋଇଥିଲେ । ଏଥି ସହ ଵିଜ୍ଞାନ ଭବନରେ ହୋଇଥିବା କେନ୍ଦ୍ର ସରକାରଙ୍କ ସହ ଆଲୋଚନା ରେ ମଧ୍ୟ କୋର ଟିମରେ  ସାମିଲ ହୋଇଥିଲେ ସଚିନ ।
ଜାନୁଆରୀ ୨୬ ତାରିଖ ଦିନ ହୋଇଥିବା "କିଷାନ୍ ପାରୋଟ୍" ରେ ଓଡ଼ିଶାରୁ ଅନେକ ଚାଷୀଭାଇଙ୍କୁ ନେଇ ଭାଗ ନେବା ସହ, ଲାଗିରହିଥିବା ଆନ୍ଦୋଳନରେ ନିଜର  ଭୂମିକା ବଜାୟ  ରଖିବା ସହ  ଆଜିର ଚକା ବନ୍ଦ ଡାକରାକୁ ସଫଳ କରାଇବାକୁ ବିଭିନ୍ନ କୃଷକ ସଂଗଠନ ଓ ବିଭିନ୍ନ ଅନୁଷ୍ଠାନକୁ ନିବେଦନ କରିଛନ୍ତି ସଚିନ । ମଧ୍ୟାହ୍ନ ୧୨ ଘଟିକା ରୁ ଅପରାହ୍ନ ୩ ଘଟିକା ପର୍ଯ୍ୟନ୍ତ ଏହି ଚକା ବନ୍ଦକୁ ବିପୁଳ ସମର୍ଥନ ଦେବାକୁ ଜନସାଧାରଣଙ୍କୁ ଅନୁରୋଧ କରାଯାଇଛି । କେନ୍ଦ୍ର ସରକାର ଯଦି ଏହି କଳା ଆଇନ୍ କୁ ପ୍ରତ୍ୟାହାର ନ କରନ୍ତି ତେବେ ଏହି କୃଷକ ଆନ୍ଦୋଳନକୁ ବ୍ୟାପକ କରିବାକୁ ଚେତାବନୀ ଦେଇଛନ୍ତି ସଚିନ ମହାପାତ୍ର ।