05-Apr-2026

ବଲାଙ୍ଗିର(ପ୍ରେରଣା ଖବର): ଓଡ଼ିଶା ପକ୍ଷ ଦିବସ ପାଳନ ଅବସରରେ ଶ୍ରମ ଆୟୁକ୍ତ, ବଲାଙ୍ଗିରଙ୍କ ପକ୍ଷରୁ "ନାମଫଳକ ଓଡ଼ିଆରେ" ଲେଖା ଅଭିଯାନ ସଚେତନତା ପଦଯାତ୍ରାର ଶୁଭାରମ୍ଭ ସ୍ଥାନୀୟ ପ୍ରଭାଗୀୟ ଶ୍ରମ ଆୟୁକ୍ତ କାର୍ଯ୍ୟାଳୟ ପରିସରରୁ କରାଯାଇଥିଲା। ଏହି କାର୍ଯ୍ୟକ୍ରମରେ ପ୍ରଭାଗୀୟ ଶ୍ରମ ଆୟୁକ୍ତ ସୁକାନ୍ତ ସେଠି, ପୌରପରିଷଦ ନିର୍ବାହୀ ଅଧିକାରୀ ସନ୍ତୋଷ କୁମାର ବେହେରା ଓ ଜିଲ୍ଲା ସଂସ୍କୃତି ଅଧିକାରୀ

ରାଜେନ୍ଦ୍ର କୁମାର ମାଝି ପ୍ରମୁଖ ଉପସ୍ଥିତ ଥିଲେ । ପଦଯାତ୍ରା ସହରର ପ୍ରମୁଖ ରାସ୍ତା ଓ ଛକ ଦେଇ ଆୟୋଜିତ ହୋଇ, ଜନସାଧାରଣ ଓ ବ୍ୟବସାୟୀଙ୍କୁ ନାମଫଳକ ଓଡ଼ିଆ ଭାଷାରେ ସ୍ପଷ୍ଟ ଓ ନିର୍ଭୁଲ ଭାବରେ ଲେଖିବା ପାଇଁ ସଚେତନ କରାଯାଇଥିଲା। ଏହି ଅଭିଯାନରେ ସହକାରୀ ଶ୍ରମ ଅଧିକାରୀ କେଶବ ବେହେରା, ରଜନୀକାନ୍ତ ଛତ୍ରିଆ, ବିଭୁଦତ୍ତ ମଲ୍ଲିକ, ସୁଶ୍ରୀ ଦୀପା ନେଟି, ପ୍ରେମରଞ୍ଜନ ରଣା, ଅଭୟ କୁମାର ମହାକୁର, ରାଜୀବ କୁମାର ମହାନ୍ତି, ଗ୍ରାମୀଣ ଶ୍ରମ ନିରୀକ୍ଷକ ଅଶୋକ କୁମାର ଡୁଙ୍ଗ ଡୁଙ୍ଗ ସହିତ ଶ୍ରମ ବିଭାଗର କର୍ମଚାରୀମାନେ ଅଂଶଗ୍ରହଣ କରିଥିଲେ।
ଏହା ସହ, ଓଡ଼ିଶା ପକ୍ଷ ଦିବସ ପାଳନ ଅବସରରେ ଜିଲ୍ଲା ଶିକ୍ଷା ବିଭାଗ ପକ୍ଷରୁ ଆର.ଆର. କଲୋନୀ ଉଚ୍ଚ ବିଦ୍ୟାଳୟ, ଲର୍କିପାଲିରେ ଜିଲ୍ଲାସ୍ତରୀୟ ପ୍ରବେଶ ଉତ୍ସବ ଓ "ଖଡ଼ିଛୁଆଁ–୨୦୨୬" ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ବଲାଙ୍ଗିର ଜିଲ୍ଲାପରିଷଦ ଅଧ୍ୟକ୍ଷା ଦେବକୀ ସାହୁ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ ନାଗ, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ପ୍ରବୀର କୁମାର ପଣ୍ଡା, ରିନା ବେହେରା, ସେବାଶ୍ରୀ ଭୋଇ, ଗୋଷ୍ଠୀ ଶିକ୍ଷା ଅଧିକାରୀ ନୀଳମଣି ପଟେଲ, ପ୍ରଧାନଶିକ୍ଷକ କିଶୋର ହନୁମାନ ମଞ୍ଚାସୀନ ଥିଲେ । ଆଜିର କାର୍ଯ୍ୟକ୍ରମରେ ଶିଶୁମାନଙ୍କୁ ବେଗ ଓ ଶିକ୍ଷା ସାମଗ୍ରୀ ପ୍ରଦାନ କରାଯାଇଥିଲା । ଶିଶୁମାନଙ୍କୁ ଆକୃଷ୍ଟ କରିବା ପାଇଁ "ଖେଳଘର", "ରଙ୍ଗପସରା" ଓ "ଗପଘର" ଭଳି ବିଭିନ୍ନ ଷ୍ଟଲ ସଜାଯାଇଥିଲା । ଏହି ପ୍ରୟାସର

ମୂଳ ଉଦ୍ଦେଶ୍ୟ ଥିଲା — ଶିଶୁମାନଙ୍କୁ ଶିକ୍ଷା, ସୃଜନଶୀଳତା ଓ ମନୋରଞ୍ଜନ ସହିତ ସମ୍ପୃକ୍ତ କରିବା । "ଖେଳଘର" ମାଧ୍ୟମରେ ସଂଖ୍ୟା, "ରଙ୍ଗପସରା" ମାଧ୍ୟମରେ ଚିତ୍ରାଙ୍କନ ଓ "ଗପଘର" ମାଧ୍ୟମରେ କଥାକାହାଣୀର ଆନନ୍ଦ ଉପଭୋଗ କରିବାର ସୁଯୋଗ ଦିଆଯାଇଥିଲା । ଏହି ଅବସରରେ ମୁଖ୍ୟ ଅତିଥି ପତାକା ଦେଖାଇ ସଚେତନତା ରଥର ଉଦ୍ଘାଟନ କରିଥିଲେ। ସଦର ବ୍ଲକର ସମସ୍ତ ସହ-ଶିକ୍ଷା ଅଧିକାରୀ, ସିଆରସିସି, ପ୍ରଧାନଶିକ୍ଷକ, ପ୍ରଧାନ ଶିକ୍ଷୟିତ୍ରୀ ଓ ଅଭିଭାବକମାନେ ଉପସ୍ଥିତ ଥିଲେ।