04-Apr-2026

ରେଙ୍ଗାଲିକ୍ୟାମ୍ପ(ଆକାଶ ମିଶ୍ର): ଅତାବିରା ଥାନା ଅନ୍ତର୍ଗତ ଶାସ୍ତ୍ରୀ ନଗର ,ୱାର୍ଡ ନଂ ୮ ପେଟ୍ରୋଲ ପମ୍ପ ସମ୍ମୁଖରେ ଆଜି ଅପରାହ୍ନ ପ୍ରାୟ ୪ ଟା ୩୦ ମିନିଟ ରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଦୁଇଟି ମୋଟରସାଇକେଲ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଜଣେ ଯୁବକଙ୍କର ପ୍ରାଣହାନି ଘଟିଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ମୃତକ ଜଣକ ହେଲେ ବାବେବିରା ଗ୍ରାମର ରାହୁଲ ସ୍ୱାଇଁ (୩୬)।
ସୂଚନା ଅନୁସାରେ, ରାହୁଲ   ଗାଡ଼ି ନଂ  ଓ ଆର୍ ଏଚ୪୧୦୩  ରେ ପେଟ୍ରୋଲ ପମ୍ପରୁ ତେଲ ଭରି ବାହାରୁଥିବା ସମୟରେ ବିପରୀତ ଦିଗରୁ ଦ୍ରୁତ ବେଗରେ ଆସୁଥିବା ଏକ ନମ୍ବର ବିହୀନ ବାଇକ୍ ତାଙ୍କୁ ଜୋରଦାର ଧକ୍କା ଦେଇଥିଲା। ଧକ୍କା ଦେଇଥିବା ବାଇକ ଚାଳକ  ଅତାବିରା ମିନାର ବନ୍ଧ ପଡ଼ା ର  ଗଙ୍ଗା ବାଗ (୨୭)   ଦୁର୍ଘଟଣା ପରେ  ରାହୁଲ ଙ୍କ ମୃତ୍ୟୁ ହୋଇଥିବା ଜାଣି   ଖସି ପଳାଇବାକୁ ଉଦ୍ୟମ କରୁଥିବା ବେଳେ ଉପସ୍ଥିତ ସ୍ଥାନୀୟ ଲୋକେ ତାଙ୍କୁ କାବୁ କରିଥିଲେ। ପ୍ରାଥମିକ ଚିକିତ୍ସା ପରେ ଉକ୍ତ ଯୁବକଙ୍କୁ ପୋଲିସ ଜିମା ଦିଆଯାଇଛି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଶବ ବ୍ୟବଚ୍ଛେଦ ପାଇଁ ବରଗଡ଼ ପଠାଇଛି।
ରାହୁଲଙ୍କ ଅକାଳ ବିୟୋଗରେ ସାରା ବାବେବିରା ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଜଣେ ଭଲ ମଣିଷ ଓ ମେଳାପୀ ଯୁବକ ଭାବେ ପରିଚିତ ରାହୁଲ ସବୁବେଳେ ଗ୍ରାମର ପ୍ରତ୍ୟେକ କାର୍ଯ୍ୟରେ ଆଗଭର ହେଉଥିଲେ। ତାଙ୍କର ଏକ ୭ ବର୍ଷର ଝିଅ ଏବଂ ମାତ୍ର ୧ ବର୍ଷର ପୁଅ ଅଛନ୍ତି। ସେ ଘାସିରାମ ସ୍ୱାଇଁ ଙ୍କ ଏକ ମାତ୍ର ପୁଅ । ପରିବାରର ରୋଜଗାରିଆ ପୁଅକୁ ହରାଇ  ପିତାମାତା,     ସ୍ତ୍ରୀ ଓ ପିଲାମାନେ ଅସହାୟ ହୋଇପଡ଼ିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଗଭୀର ଦୁଃଖ ପ୍ରକାଶ କରିଛି।