19-Mar-2026

(ରଂଜିତ ମହାନ୍ତି )
 ବରୀ-ରାମଚନ୍ଦ୍ରପୁର ଥାନା ଅନ୍ତର୍ଗତ ଚତର ଅଞ୍ଚଳରେ ଡକାୟତି ଯୋଜନା କରୁଥିବା ୪ଡକାୟତଙ୍କୁ ପୁଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଭଦ୍ରକ ଜିଲ୍ଲା ଦୋବଲ ମୁସ୍ତାଫାପୁର ଗ୍ରାମର ସ୍ୱର୍ଗତ ସୁକୁଟା ଦାସଙ୍କ ପୁଅ ସଂଜିତ ଦାସ(୪୦), ଶତର ଦାସଙ୍କ ପୁଅ ଅର୍ଜୁନ ଦାସ(୨୯), ରଘୁନାଥପୁର ଗ୍ରାମର ହରିହର ସାମଲଙ୍କ ପୁଅ କୁସନ ସାମଲ (୨୨) ଏବଂ ଯାଜପୁର ରୋଡ ଥାନା ମୁଣ୍ଡମାଳ ଅଞ୍ଚଳର ବିଜୟ ଦାସଙ୍କ ପୁଅ ମନୋଜ ଦାସ(୨୫) ବୋଲି ପୁଲିସ ସୂଚନା ଦେଇଛି। ପୁଲିସ ସୂଚନା ମୁତାବକ, ଚଳିତ ମାସ ୧୭ ତାରିଖ ସନ୍ଧ୍ୟା ୫ଟା ସମୟରେ ପ୍ରାୟ ୬ରୁ ୭ଜଣ ଯୁବକ ଚତର ନିକଟରେ ଥିବା ନଦୀକୂଳରେ ସନ୍ଦେହଜନକ ଭାବେ ବସିଥିଲେ। ଏ ସଂପର୍କରେ ଖବର ପାଇ ଏଏସ୍ଆଇ ଲକ୍ଷ୍ମୀନାରାୟଣ ସ୍ବାଇଁଙ୍କ ନେତୃତ୍ୱରେ ପାଟ୍ରୋଲିଂ କରୁଥିବା ପୁଲିସ ଟିମ୍ ଘଟଣାସ୍ଥଳରେ ଚଢ଼ଉ କରିଥିଲେ। ପୁଲିସକୁ ଦେଖ୍ ୨-୩ଜଣ
ଘଟଣାସ୍ଥଳରୁ ଚମ୍ପଟ ମାରିଥିଲେ। ଅନ୍ୟମାନେ ଖସି ଯିବାକୁ ଉଦ୍ୟମ କରୁଥିବା ବେଳେ ପୁଲିସ ସେମାନଙ୍କୁ ମାଡ଼ି ବସିଥିଲା। ଖୋଜାଖୋଜି କରିବାରୁ ସେମାନଙ୍କ ନିକଟରୁ ଛୁରୀ, ଆଇରନ୍ ରଡ, ତେଲେଙ୍ଗା କଟୁରୀ,
ଲଙ୍କା ଗୁଣ୍ଡ ପ୍ୟାକେଟ୍, କାଚ ଗୁଣ୍ଡ ଓ ପ୍ଲାଷ୍ଟିକ ପାଇପ୍ ମିଳିଥିଲା । ପୁଲିସ ସେମାନଙ୍କ ନିକଟରୁ ଏହି ମାରଣାସ୍ତ୍ର ସହ ଏକ ମୋବାଇଲ୍ ଫୋନ୍ ମଧ୍ୟ ଜବତ କରିଥିଲା। ଥାନାରେ ପଚରାଉଚୁରା ବେଳେ ସେମାନେ ଡକାୟତି ପାଇଁ ଯୋଜନା କରୁଥିବା ପୁଲିସ ଜାଣିବାକୁ ପାଇଥିଲା।
ପୂର୍ବରୁ ସେମାନଙ୍କ ନାମରେ ପାଣିକୋଇଲି, ଯାଜପୁର ରୋଡ, ଭଦ୍ରକ ସହର ଓ ଧର୍ମଶାଳା ଥାନାରେ ୮ଟି ମାମଲା ଥିବା ପୁଲିସ ସୂଚନା ଦେଇଛି। ଏହାକୁ ନେଇ ଥାନାରେ କେସ୍ ନଂ ୧୦୬/୨୬
ଓ ଭାରତୀୟ ନ୍ୟାୟ ସୁରକ୍ଷା ସଂହିତାର ଧାରା ୩୧୦(୪), ୩୧୦(୫)ରେ ଏକ ମାମଲା ରୁଜୁ କରି ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ୍ ନାମଂଜୁର ହେବାରୁ ସେମାନଙ୍କୁ ଜେଲ୍ ଯିବାକୁ ପଡ଼ିଥିବା ପୁଲିସ ସୂଚନା ଦେଇଛି।