17-Feb-2026

ବଲାଙ୍ଗୀର(ପ୍ରେରଣା ଖବର): ସ୍ଥାନୀୟ ସରକାରୀ ମହିଳା ମହାବିଦ୍ୟାଳୟ ର କନଫରେନ୍ସ ହଲ ଠାରେ "ପ୍ରାନ୍ତର ପ୍ରତିନିଧିତ୍ୱ: ସ୍ୱର, ଦୃଶ୍ୟମାନତା ଏବଂ ସାମାଜିକ ପରିବର୍ତ୍ତନ" ବିଷୟକ ଦୁଇଦିନିଆ ଜାତୀୟ ଆଲୋଚନାଚକ୍ର ବ୍ୟାପକ ଆଲୋଚନା, ପ୍ୟାନେଲ୍ ଚର୍ଚ୍ଚା ଓ ପ୍ରାୟୋଗିକ ଅଧିବେଶନ ମାନଙ୍କ ସହ ଶେଷ ହୋଇଛି। ଏହି ଆଲୋଚନାଚକ୍ରରେ ଚାରିଟି ପ୍ୟାନେଲ୍ ଚର୍ଚ୍ଚl-ଗୋଟିଏ ଇଂରାଜୀ ବିଭାଗରୁ ଓ ତିନିଟି ସାମାଜିକ ବିଜ୍ଞାନରୁ ଏହା ସହିତ ୧୫ଟି ପ୍ରାୟୋଗିକ ଅଧିବେଶନ ଆୟୋଜିତ ହୋଇଥିଲା। ଏଥିରେ ୧୨୦ରୁ ଅଧିକ ଗବେଷଣାତ୍ମକ ପ୍ରବନ୍ଧ ଦେଶର ୪୮ଟି ବିଶ୍ୱବିଦ୍ୟାଳୟ ଓ କଲେଜରୁ ଆସିଥିବା ଅଧ୍ୟାପକ, ଗବେଷକ ଓ ଛାତ୍ରଛାତ୍ରୀ ମାନଙ୍କ ଦ୍ୱାରା ପ୍ରସ୍ତୁତ ହୋଇଥିଲା। ଶିକ୍ଷାନୁଷ୍ଠାନ ମାନଙ୍କ ମଧ୍ୟରେ ଦିଲ୍ଲୀ ବିଶ୍ୱବିଦ୍ୟାଳୟ, ଜବାହରଲାଲ ନେହେରୁ ବିଶ୍ୱବିଦ୍ୟାଳୟ, ହାଇଦ୍ରାବାଦ୍ ବିଶ୍ୱବିଦ୍ୟାଳୟ, କାଶ୍ମୀର କେନ୍ଦ୍ରୀୟ ବିଶ୍ୱବିଦ୍ୟାଳୟ, କେନ୍ଦ୍ରୀୟ ବିଶ୍ୱବିଦ୍ୟାଳୟ, କେରଳ, ଡକ୍ଟର ହରି ସିଂହ ଗୌର ବିଶ୍ୱବିଦ୍ୟାଳୟ , ପଣ୍ଡିଚେରୀ, ରାଜସ୍ଥାନ ବିଶ୍ୱବିଦ୍ୟାଳୟ, ଓଡିଆ କେନ୍ଦ୍ରୀୟ ବିଶ୍ୱବିଦ୍ୟାଳୟ,  ଉତ୍କଳ ବିଶ୍ୱବିଦ୍ୟାଳୟ, ରେଭେନ୍ସା ବିଶ୍ୱବିଦ୍ୟାଳୟ, ବ୍ରହ୍ମପୁର ବିଶ୍ୱବିଦ୍ୟାଳୟ, ସମ୍ବଲପୁର ବିଶ୍ୱବିଦ୍ୟାଳୟ, ଗଙ୍ଗାଧର ବିଶ୍ୱବିଦ୍ୟାଳୟ ଓ ରାଜେନ୍ଦ୍ର ବିଶ୍ୱବିଦ୍ୟାଳୟ ପ୍ରମୁଖ ଅଂଶଗ୍ରହଣ କରିଥିଲେ। ଅଂଶଗ୍ରହଣକାରୀ ମାନେ କାଶ୍ମୀରରୁ କେରଳ ଓ ରାଜସ୍ଥାନରୁ ଆସାମ ପର୍ଯ୍ୟନ୍ତ ଦେଶର ବିଭିନ୍ନ ଅଞ୍ଚଳକୁ ପ୍ରତିନିଧିତ୍ୱ କରି ବିବିଧ ଆଞ୍ଚଳିକ ଅନୁଭବ ଆଣିଥିଲେ। ଚାରିଟି ପ୍ୟାନେଲ୍ ଚର୍ଚ୍ଚା ଓ ପନ୍ଦରଟି ପ୍ରାୟୋଗିକ ଅଧିବେଶନରେ ସାମାଜିକ ନ୍ୟାୟ, ସମାବେଶୀ ଶିକ୍ଷା, ପରିବେଶ ଆଧାରିତ ପ୍ରାନ୍ତୀକତା, ପ୍ରବାସନ, ଲିଙ୍ଗ ସଶକ୍ତିକରଣ, କଳ୍ୟାଣମୂଳକ ନୀତି, ଆର୍ଥିକ ସମାବେଶ, ସାହିତ୍ୟିକ ପ୍ରତିରୋଧ ଓ ଗଣତାନ୍ତ୍ରିକ ଅଂଶଗ୍ରହଣ ଭଳି ବିଷୟ ଗୁଡ଼ିକ ଉପରେ ଗଭୀର ଆଲୋଚନା ହୋଇଥିଲା। ଏହି ଅଧିବେଶନ ଗୁଡ଼ିକ ତାତ୍ତ୍ୱିକ ଧାରଣା ଓ ପ୍ରାୟୋଗିକ ଗବେଷଣାକୁ ସମନ୍ୱୟ କରି ପ୍ରାନ୍ତୀୟ କଣ୍ଠସ୍ୱର ଓ ସାମାଜିକ ପରିବର୍ତ୍ତନ ଉପରେ ଅନୁଶାସନମୂଳକ ସଂଳାପକୁ ଉତ୍ସାହିତ କରିଥିଲା। ଆଲୋଚନାଚକ୍ରର ଶେଷ ଅଧିବେଶନ ଚିନ୍ତନମୂଳକ ଆଲୋଚନା ଓ ଶାସ୍ତ୍ରୀୟ ଆଦାନ ପ୍ରଦାନ ସହିତ ଆୟୋଜିତ ହୋଇଥିଲା।ସମାପନ ଉଦବୋଧନ ପଦ୍ମଶ୍ରୀ ସମ୍ମାନିତ ଲୋକ ସାହିତ୍ୟ ଗବେଷକ ମହେନ୍ଦ୍ର କୁମାର ମିଶ୍ରଙ୍କ  ଦ୍ୱାରା ପ୍ରଦାନ କରାଯାଇଥିଲା। ସେ ବିବିଧ ଭାଷୀ ଶିକ୍ଷା, ଆଦିବାସୀ ଜ୍ଞାନପ୍ରଣାଳୀ ଓ ସାଂସ୍କୃତିକ ଭାବେ ସମାବେଶୀ ପାଠ୍ୟପ୍ରଣାଳୀର ଗୁରୁତ୍ୱ ଉଲ୍ଲେଖ କରିଥିଲେ।ଏହା ସହିତ  ଡକ୍ଟର ରାଜ କିଶୋର ପାତ୍ର, ଦର୍ଶନ ଶାସ୍ତ୍ରରସହଯୋଗୀ ଅଧ୍ୟାପକ ଓ ଏଚଆରଡିସି ନିର୍ଦ୍ଦେଶକ ତାଙ୍କ ଉଦବୋଧନରେ ଉଚ୍ଚ ଶିକ୍ଷା କିପରି ଗବେଷଣା ଓ ନୀତି ମାଧ୍ୟମରେ

ପ୍ରାନ୍ତୀକତାକୁ ସମାଧାନ କରିପାରେ ସେଥିରେ ଗୁରୁତ୍ୱ ଦେଇ ଥିଲେ।ଏହି ଅଧିବେଶନ ରେ ଆଲୋଚନାଚକ୍ର ସମ୍ବନ୍ଧୀୟ ରିପୋର୍ଟ ପ୍ରସ୍ତୁତି, ଅତିଥି ସମ୍ମାନ ଓ ବାହାରୁ ଆସିଥିବା ପ୍ରତିନିଧିମାନଙ୍କୁ ପ୍ରମାଣପତ୍ର ବଣ୍ଟନ କରାଯାଇଥିଲା।ଅତିଥି ପରିଚୟ ଅଧ୍ୟାପକ ସଲୋମନ କୁମାର,ମଞ୍ଚ ପରିଚାଳନା ଡଃ ଅନୁରାଧା ମିଶ୍ର, ସଂଗୋଷ୍ଠୀ ବିବରଣୀ ଡଃ ରାଜେଶ କୁମାର କର୍ଣ୍ଣ ପାଠ କରିଥିଲେ। ଆଲୋଚନାଚକ୍ର ର ସଂଯୋଜକ ପ୍ରତୀକ୍ଷା ପ୍ରତିଶୃତି ଧନ୍ୟବାଦ ଦେଇଥିଲେ।ସେ ସମସ୍ତ ଅତିଥି, ଅଂଶଗ୍ରହଣକାରୀ,ଆୟୋଜକମଣ୍ଡଳୀ ଓ ଛାତ୍ରଛାତ୍ରୀମାନଙ୍କୁ ସମ୍ମିଳିତ ପ୍ରୟାସ ପାଇଁ କୃତଜ୍ଞତା ଜଣାଇଥିଲେ। କଲେଜର ଅଧ୍ୟକ୍ଷଙ୍କ ଶେଷ ମତାମତ ସହ କାର୍ଯ୍ୟକ୍ରମ ଔପଚାରିକ ଭାବେ ଶେଷ ହୋଇଥିଲା।ଏହି ଦୁଇଦିନିଆ ଆୟୋଜନ ଜ୍ଞାନ ବିନିମୟ ଓ ସଂଳାପର ଏକ ସଜୀବ ଜାତୀୟ ମଞ୍ଚ ରୂପେ ପରିଣତ ହୋଇ ପ୍ରାନ୍ତୀୟ କଣ୍ଠସ୍ୱରକୁ ଉତ୍ତୋଳନ କରିବା ଓ ସମାବେଶୀ,ସାମାଜିକ ଭାବେ ସଜାଗ ଗବେଷଣାକୁ ପ୍ରୋତ୍ସାହନ ଦେବାରେ ଉଚ୍ଚ ଶିକ୍ଷାନୁଷ୍ଠାନମାନଙ୍କ ଅଙ୍ଗୀକାରକୁ ପୁନରୁଦ୍ଧାର କରିଛି।ଦେଶର ବିଭିନ୍ନ ସ୍ଥାନରୁ ଆସିଥିବା ଶିକ୍ଷାବିତ,ଗବେଷକ ଓ ଛାତ୍ରଛାତ୍ରୀମାନେ ଏଥିରେ ସକ୍ରିୟ ଭାଗ ନେଇଥିଲେ।ଦେବଦତ୍ତ ପାଣିଗ୍ରାହୀ,ଅଜିତ କୁମାର ପଣ୍ଡା,ଡଃ ସିଦ୍ଧେଶ୍ଵର ପଧାନ,ରାକେଶ ମଲ୍ଲିକ, ସିଦ୍ଦାର୍ଥ ଦାଶ,ଦୀନେଶ ସିଂ ପ୍ରମୁଖ ସହଯୋଗ କରିଥିଲେ ।