08-Feb-2026

ବଲାଙ୍ଗୀର (ପ୍ରେରଣା ଖବର)-ବଲାଙ୍ଗୀରର ସରକାରୀ ଆୟୁର୍ବେଦ ମହାବିଦ୍ୟାଳୟର ୫୦ବର୍ଷ ପୂର୍ତ୍ତିରେ ଗତ ୪ଦିନ ଧରି ଚାଲିଥିବା ସୁବର୍ଣ୍ଣଜୟନ୍ତୀ ଉତ୍ସବ ଉଦଯାପିତ ହୋଇ ଯାଇଛି । ଉଦଯାପନୀ ଉତ୍ସବରେ ମୁଖ୍ୟଅତିଥି ଭାବରେ ଯୋଗଦେଇ ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ କହିଛନ୍ତି ଯେ,ବଲାଙ୍ଗୀରର ସରକାରୀ ଆୟୁର୍ବେଦ ମହାବିଦ୍ୟାଳୟକୁ ଏକ ଆୟୁଷ ବିଶ୍ୱବିଦ୍ୟାଳୟକୁ ଉନ୍ନିତ କରାଯିବା ଦାବିର ଯଥାର୍ଥତା ରହିଛି । ବଲାଙ୍ଗୀର ଜିଲ୍ଲା ଦୀର୍ଘଦିନରୁ ଆୟୁର୍ବେଦର ଏକ ହବଭାବରେ ରହିଆସିଛି । ଏହି ମହାବିଦ୍ୟାଳୟରେ ପାଠପଢି ହଜାର ହଜାର ସଂଖ୍ୟାରେ ଡାକ୍ତର ସୃଷ୍ଟି ହୋଇ ଓଡିଶା ତଥା ଦେଶର ବିଭିନ୍ନ ରାଜ୍ୟରେ କାର୍ଯ୍ୟରତ ଅଛନ୍ତି । ବଲାଙ୍ଗୀରର ଗନ୍ଧମାର୍ଦ୍ଧନ ପର୍ବତ ସମେତ ଅନ୍ୟାନ୍ୟ ଜଙ୍ଗଲରେ ମୁଲ୍ୟବାନ ଔଷଧିୟ ବୃକ୍ଷ,ଗୁଲ୍ମମଲତା ରହିଛି । ତାହାର ଗବେଷଣାର ମଧ୍ୟ ଆବଶ୍ୟକତା ରହିଛି । ଭାରତରେ ଆୟୁର୍ବେଦଚିକିତ୍ସାର ଗୁରୁତ୍ୱବଢିଛି । ଯେତେବେଳେ ମୁଁ ସାଂସଦ ଥିଲି ସେତେବେଳେ ହରୀଶଙ୍କରରେ ଏକ ହର୍ବାଲ ଗାର୍ଡେନ କରାଇଥିଲେ । ଏହା ସହିତ ଛାତ୍ରାବାସ ଓ ଅନ୍ୟାନ୍ୟ ଭିତ୍ତିଭୂମୀ ନିର୍ମାଣ କରାଯାଇଥିଲି ।  ବାପା ଅନଙ୍ଗଉଦୟ ସିଂଦେଓ ମନ୍ତ୍ରୀ ଥିବା ବେଳେ ପ୍ରଥମକରି ମହାବିଦ୍ୟାଳୟର ନୂତନ ବିଲଡିଂ ନିର୍ମାଣ କରାଇଥିଲେ । ଏବେ ଜୁବୁଲିଗେଟ ଓ ଜିମ ନିର୍ମାଣ କରାଯାଇଛି । ଆଗକୁ ଆହୁରି ଭିତ୍ତିଭୂମୀ ନିର୍ମାଣ ପାଇଁ ପଦକ୍ଷେପ ନିଆଯିବ ବୋଲି କହିଥିଲେ । ମହାବିଦ୍ୟାଳୟର ଅଧ୍ୟକ୍ଷ ପ୍ରଫେସର ଡ.ମନୋଜକୁମାର ସାହୁଙ୍କ ସଭାପତିତ୍ୱ ଓ ସୁଶୋଭିତା ଗୁରୁଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ମାନୀତ ଅତିଥି ଭାବରେ ଜିଲ୍ଲାପରିଷଦ ଅଧ୍ୟକ୍ଷା ଦେବକୀ ସାହୁ, ପୌରାଧ୍ୟକ୍ଷା ଲିକା ସାହୁ, ଭୀମଭୋଇ ମେଡିକାଲ କଲେଜର ଡିନ ଡ.ସ୍ୱୟଂପ୍ରଭା ପଧାନ ଯୋଗ ଦେଇଥିଲେ।

ଆୟୁର୍ବେଦିକ କଲେଜର ପୁରାତନ ଛାତ୍ରସଂଘର ସଭାପତି ଡ.ବାସୁଦେବ ପତି ସ୍ୱାଗତ ଅଭିଭାଷଣ ସହିତ ମହାବିଦ୍ୟାଳୟକୁ ବିଶ୍ୱବିଦ୍ୟାଳୟ କରିବାରେ ସମସ୍ତଙ୍କର ସହଯୋଗ କାମନା କରିଥିଲେ। ଶେଷରେ ଆଲୁମନି କମିଟିର ସଂପାଦକ ଡ.ଶିବବ୍ରତ ବେହେରା ଧନ୍ୟବାଦ ଅର୍ପଣ କରିଥିଲେ । ଗତ ୪ଦିନ ଧରି ମହାବିଦ୍ୟାଳୟ ପରିସରରେ ସୁବର୍ଣ୍ଣ ଜୟନ୍ତୀ ପାଇଁ ଆୟୁର୍ବେଦ ସଚେତନତା ଶୋଭାଯାତ୍ରା, ଆୟୁର୍ବେଦ ଚିକିତ୍ସା ଶିବିର, ରକ୍ତପରୀକ୍ଷା,ଆଲୋଚନାଚକ୍ର ଇତ୍ୟାଦି କାର୍ଯ୍ୟକ୍ରମ କରାଯାଇ ଥିଲା । ସାଇଣ୍ଟିଫିକ ସେସନରେ ପ୍ରଫେସର ଚନ୍ଦ୍ରକୁମାର ଦେଶମୁଖ,ପ୍ରଫେସର ରାଜେଶ ଠକ୍କରଙ୍କ ଭଳି ଆୟୁର୍ବେଦବିଦ୍ୱାନମାନେ ଆସି ଆଲୋଚନାରେ ଅଂଶଗ୍ରହଣ କରି ଡାକ୍ତର ଓ ଛାତ୍ରଛାତ୍ରୀଙ୍କୁ ନୂତନ ଦିଗଦର୍ଶନ ଦେଇଥିଲେ । ଏହି ସୁବର୍ଣ୍ଣଜୟନ୍ତି କାର୍ଯ୍ୟକ୍ରମରେ ବହୁସଂଖ୍ୟା ରେ ପୁରାତନ ଛାତ୍ରଛାତ୍ରୀ ଯୋଗଦେଇଥିଲେ । କାର୍ଯ୍ୟକ୍ରମକୁ ସଫଳ କରିବାରେ ଡା,ବିପିନ ବିହାରୀ ମିଶ୍ର,ଡ.ନିଗମାନନ୍ଦ ବଳ,ଡ.ଜ୍ୟୋତିରଂଜନ ମେହେର, ଡ.ସୁଶାନ୍ତ ମେହେର, ଡ.ସିମାଦ୍ରୀ ନାଏକ,ଡ.ସୁଶାନ୍ତ ସାହୁ,ଡ.ଗଣେଶ ମେହେର. ଡ.ଲଲୀତ ସାହୁ,ଡ.ଲିପ୍ସା ଦାସ ପ୍ରମୁଖ ସହ ମହାବିଦ୍ୟାଳୟର ଛାତ୍ରଛାତ୍ରୀଗଣ ସହଯୋଗ କରିଥିଲେ ।