02-Feb-2026

୪ ଦିନ ପର୍ଯ୍ୟନ୍ତ ବିଭିନ୍ନ କାର୍ଯ୍ୟକ୍ରମ

ବଲାଙ୍ଗୀର(ପ୍ରେରଣା ଖବର): ଅବିଭକ୍ତ ବଲାଙ୍ଗୀର ଜିଲ୍ଲାର ଗ୍ରାମାଞ୍ଚଳର ପ୍ରଥମ ହାଇସ୍କୁଲ ଦେଓଗାଁବ୍ଲକ ଜରାସିଂହାର ନେତ୍ରଭାନୁ ହାଇସ୍କୁଲକୁ ୭୫ବର୍ଷ ପୁରି ୭୬ବର୍ଷରେ ପଦାର୍ପଣ କରିଛି। ଦୀର୍ଘ ୭୫ ବର୍ଷ ଧରି ଅଞ୍ଚଳର ଶିକ୍ଷାର ବିକାଶରେ ଆଲୋକବର୍ତ୍ତିକା ସାଜିଥିବା ଏହି ଅନୁଷ୍ଠାନରୁ ଶିକ୍ଷାଲାଭ କରି ବହୁତ ଛାତ୍ରଛାତ୍ରୀ ବଡବଡ ପଦବୀରେ ରହିଛନ୍ତି। ଏବେ ପ୍ରାୟ ୬,୫୦୦ରୁ ଉର୍ଦ୍ଧ୍ୱ ପୁରାତନ ଛାତ୍ରଛାତ୍ରୀ ରହିଛନ୍ତି । ଏହି ୭୫ବର୍ଷ ପୂର୍ତ୍ତି ଉପଲକ୍ଷେ ପୁରାତନଛାତ୍ରମାନଙ୍କ ପକ୍ଷରୁ ଆସନ୍ତା ଫେବୃୟାରୀ ୫ ତାରିଖରୁ ୮ ତାରିଖ ପର୍ଯ୍ୟନ୍ତ ସ୍କୁଲର ପ୍ଲାଟିନମ ଜୁବୁଲି ଉତ୍ସବ ପାଳିତ ହେବାକୁ ଯାଉଛି। ସେହି ୪ଦିନ ଜରାସିଂହା ବିଏନ ସିଂଦେଓ ଷ୍ଟାଡିୟମରେ ଉତ୍ସବ ଆୟୋଜିତ ହେବ ଓ ଏଥିରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହେବ ବୋଲି ଆୟୋଜକ କମିଟି ପକ୍ଷରୁ କୁହାଯାଇଛି। ଆଜି ନେତ୍ରଭାନୁ ହାଇସ୍କୁଲର ସଭାକକ୍ଷରେ ଜୁବୁଲି କମିଟି ପକ୍ଷରୁ ଏକ ସାମ୍ବାଦିକ ସମ୍ବିଳନୀ କରାଯାଇ ଗଣମାଧ୍ୟମକୁ ସୂଚନା ଦିଆଯାଇଛି । ଜୁବୁଲି କମିଟିର ସଭାପତି ଲକ୍ଷ୍ମଣ କୁମାର ମେହେର ଓ ଉପଦେଷ୍ଟା ଯଜେ୍ଞଶ୍ୱର ବାବୁ ଗଣମାଧ୍ୟମକୁ ସୂଚନା ଦେଇଛନ୍ତି ଯେ,ଏହି ଉତ୍ସବରେ ପ୍ରାୟ ପୁରାତନ ଛାତ୍ରମାନଙ୍କୁ ସାମିଲ କରାଯାଇଛି। ପ୍ରତ୍ୟହ ରାଜ୍ୟସ୍ତରୀୟ ନେତୃବୃନ୍ଦ ଉତ୍ସବରେ ଯୋଗଦେବେ ଓ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜିତ ହେବ। ପ୍ରାୟ ୪୪ଟି ସାଂସ୍କୃତିକ ଦଳ ଯୋଗ ଦେଉଥିବା ବେଳେ ପୁରାତନ ଛାତ୍ର, ଅବସରପ୍ରାପ୍ତ ଶିକ୍ଷକ ମାନଙ୍କୁ ନେଇ ଏକ ଆଲୋଚନାଚକ୍ର ମଧ୍ୟ ଅନୁଷ୍ଠିତ ହେବାକୁ ଯାଉଛି। ଠିକ ସେହିପରି ପୁରାତନ ଛାତ୍ରଛାତ୍ରୀ ଓ ଶିକ୍ଷକ ମାନଙ୍କ ଅନୁଭୁତିର ଲେଖାଗୁଡିକୁ ନେଇ ଏକ ସୁଦୃଶ୍ୟ ସ୍ମରଣିକା ମଧ୍ୟ ପ୍ରକାଶିତ ହେବାକୁ ଯାଉଛି। ପ୍ରତ୍ୟେକଦିନ ଦିନବେଳା ଓ ସଂଧ୍ୟାରେ କାର୍ଯ୍ୟକ୍ରମ ହେବ। ୮ ତାରିଖରେ ପୁରାତନ ଛାତ୍ରଛାତ୍ରୀଙ୍କୁ ନେଇ ଏକ ଭାବବିନିମୟ କାର୍ଯ୍ୟକ୍ରମ ମଧ୍ୟ ରହିଛି । ପ୍ରଥମଦିନର ସାଧାରଣସଭାରେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ, ପୂର୍ବତନମନ୍ତ୍ରୀ ତଥା ବର୍ତ୍ତମାନର ରେଢାଖୋଲ ବିଧାୟକ ପ୍ରସନ୍ନ ଆଚାର୍ଯ୍ୟ, ବିଧାୟକ ଡ.ଅରୁଣ ସାହୁ, ପୂର୍ବତନ ବିଧାୟକ ତଥା ସମ୍ବାଦ ଗ୍ରୁପର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ, ଦ୍ୱିତୀୟ ଦିନରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ପିସିସି ସଭାପତି ଭକ୍ତଚରଣ ଦାସ, ପୂର୍ବତନ ମନ୍ତ୍ରୀ ନରସିଂହ ମିଶ୍ର, ଜୟଦେବ ଜେନା, ପୂର୍ବତନ ବିଧାୟକ ସନ୍ତୋଷ ସିଂ ସାଲୁଜା, ବିନୋଦ ପାତ୍ର, ତୃତୀୟ ଦିନ ସ୍ୱାସ୍ଥ୍ୟ, ପରିବାର କଲ୍ୟାଣ, ସଂସଦୀୟ ବ୍ୟାପାର ଓ ବୈଦ୍ୟୁତିକ ପ୍ରଯୁକ୍ତି ବିଦ୍ୟା ବିଭାଗର ମନ୍ତ୍ରୀ ଡ.ମୁକେଶ ମହାଲିଙ୍ଗ, ଜିଲ୍ଲାପରିଷଦ ସଭାପତି ଦେବକୀ ସାହୁ, ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ, ରସରାଜ ଅଚ୍ୟୁତ ପୁରୋହିତ ଓ ଚତୁର୍ଥ ଦିନରେ ପଞ୍ଚାୟତିରାଜ ପାନୀୟ ଜଳ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ 

ରବିନାରାୟଣ ନାଏକ,ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇସଲୱାର,ସୁବର୍ଣ୍ଣପୁର ଜିଲ୍ଲାପାଳ ଡ.ନୃପରାଜ ସାହୁ, ବଲାଙ୍ଗୀର ଏସପି ଅଭିଲାଷ ଜୀ ଓ ସୁବର୍ଣ୍ଣପୁର ଏସପି ନାରାୟଣ ନାୟକ ଯୋଗଦେବେ ବୋଲି ସହମତି ଦେଇଥିବା କମିଟିର ସଭାପତି ଲକ୍ଷ୍ଣଣ କୁମାର ମେହେର ସୂଚନା ଦେଇଛନ୍ତି। ଆଜିର ଏହି ସାମ୍ବାଦିକ ସମ୍ବିଳନୀରେ ଜୁବୁଲି କମିଟିର ସଭାପତି ଲକ୍ଷ୍ମଣ କୁମାର ମେହେର, ଉପଦେଷ୍ଟା ଯଜେ୍ଞଶ୍ୱର ବାବୁ,ଅର୍ଥକମିଟିର ଅଧ୍ୟକ୍ଷ କରତାରସିଂ କୁମ୍ଭାର,ସ୍କୁଲର ପ୍ରଧାନଶିକ୍ଷକ ସରୋଜକୁମାର ଦଣ୍ଡସେନା, ଶିକ୍ଷୟିତ୍ରୀ ସସ୍ମିତା ସେଠ, ପ୍ରମୋଦ ସିଂନିନା, ସତ୍ୟନାରାୟଣ ପାଣି, ଉଜ୍ଜଳ ଝାଙ୍କର,ଜରାସିଂହାର ସମିତି ସଭ୍ୟ ଅମିତ ତ୍ରୀପାଠୀ,ଚିତ୍ତରଂଜନ ପ୍ରମୁଖ ଉପସ୍ଥିତ ଥିଲେ ।