02-Feb-2026

ନୂଆପଡ଼ା: ୨୧ଶତାବ୍ଦୀର ଭାରତ- "ହର ଘର ନଲ"ର ଢିଣ୍ଡିମ ଓ "ଜଳ ଜୀବନ ମିଶନ"ର ଢେର ପ୍ରଚାର ମଧ୍ୟରେ ନୂଆପଡ଼ା ଜିଲ୍ଲାର ବୋଡ଼େନ ବ୍ଲକ୍ ଅନ୍ତର୍ଗତ କୋପଟି ଆମ୍ବ ଗ୍ରାମ ଆଜି ପର୍ଯ୍ୟନ୍ତ ପାଣି ପାଇଁ ସଂଘର୍ଷ କରୁଛି। ଏହା କେବଳ ଜଳ ସମସ୍ୟା ନୁହେଁ ଏହା ଏକ ପ୍ରଶାସନିକ ଅପରାଧ, ଏକ ରାଜନୈତିକ ଉଦାସୀନତା ଓ ଏକ ସମ୍ବିଧାନିକ ବିଫଳତା। ସମୁଦ୍ର ପତ୍ତନରୁ ପ୍ରାୟ ୩ ହଜାର ଫୁଟ ଉଚ୍ଚତାରେ, ଘନ ଜଙ୍ଗଳ ଘେରା ଏହି ଆଦିବାସୀ ବହୁଳ ଗ୍ରାମରେ ଆଜି ବି ଶୁଦ୍ଧ ପାନୀୟ ଜଳ ଏକ ସ୍ଵପ୍ନ ହୋଇ ରହିଛି। ସରକାର ଯେଉଁଠି ଗାଁ ଗାଁରେ ଟାଙ୍କି, ପାଇପ ଓ ନଳ ପହଞ୍ଚିଥ‌ିବା ଦାବି କରୁଛି, ସେଠାରେ କୋପଟି ଆମ୍ବର ବାସ୍ତବତା ହେଉଛି– ଗୋଟିଏ କୂଆଁ, ଓ ସେଥ୍‌ରେ ନିର୍ଭର କରୁଥିବା ଶତାଧୂକ ଜୀବନ। ପ୍ରଶ୍ନ ଉଠୁଛି-କୋପଟି ଆମ୍ବ କି ଭାରତର ନକ୍ସାରେ ନାହିଁ? ଏଠାର ଲୋକେ କି ଭୋଟ ଦିଅନ୍ତି ନାହିଁ? ନା ଆଦିବାସୀ ହେବା ଏକ ଅପରାଧ? ଯଦି ନୁହେଁ, ତେବେ ସରକାର କାହିଁକି ଏହି ଗ୍ରାମକୁ ପାନୀୟ ଜଳ ଭଳି ମୌଳିକ ଅଧିକାରରୁ ବଞ୍ଚିତ କରୁଛି? ଏଠାରେ ପାଣି ସଂଗ୍ରହ କେବଳ କାମ ନୁହେଁଏହା ଦୈନିକ ଜୀବନର ସବୁଠୁ ବଡ଼ ସଂଘର୍ଷା ମହିଳାମାନେ ପ୍ରତିଦିନ ଦୁଇ ସମୟ ଜଙ୍ଗଳ ମଧ୍ୟରୁ ହାତୀ,ଭାଲୁ, ବନ୍ୟପ୍ରାଣୀଙ୍କ ଭୟ ସହିତ, ଭାରୀ ପାତ୍ର ବୋହି ପାଣି ଆଣୁଛନ୍ତି। ସରକାର ଯେଉଁଠି "ନାରୀ ସଶକ୍ତିକରଣ"ର କଥା କହୁଛି, ସେଠାରେ କୋପଟି ଆମ୍ବର ମହିଳାମାନେ ପାଣିର ଭାର ଉଠାଇ ଜୀବନ ବୋହୁଛନ୍ତି। ମାଓ ପ୍ରଭାବର ଦୁହାଇ ଦେଇ ପ୍ରଶାସନ ପାଇଁ ଏହି ଅଞ୍ଚଳକୁ "ଅପହଞ୍ଚ” ଘୋଷଣା କରିଦେବା ସବୁଠୁ ସହଜ। କିନ୍ତୁ ପ୍ରଶ୍ନ ହେଉଛି-ଯେଉଁଠି ପାଣି ନାହିଁ, ସେଠାରେ ବିଶ୍ବାସ କେମିତି ଗଢ଼ିଉଠିବ? ବିକାଶ ଛଡ଼ା ସୁରକ୍ଷା କେମିତି ସମ୍ଭବ? "ହର ଘର ନଲ" ଯୋଜନା କୋପଟି ଆମ୍ବ ପାଇଁ କାହିଁକି ଅଟକିଗଲା? "ବସୁନ୍ଧରା" ଯୋଜନାର ଫାଇଲ କେଉଁ ଟେବୁଲ୍ ଉପରେ ଧୁଳି ଖାଉଛି? କେଉଁ ଅଧିକାରୀ ଏହାର ଦାୟିତ୍ଵ ନେବେ–ନା କି ଆଉ ଏକ ଗ୍ରୀଷ୍ମ ଋତୁ ଲୋକଙ୍କୁ ପାଣି ବିନା କଟାଇବା ପରେ ଫାଇଲ୍‌ ହଲାଇବେ? ସରକାରକୁ ଏବେ ଆଉ ଆବେଦନ ନୁହେଁ-ଉତ୍ତର ଦେବାକୁ ପଡ଼ିବ। କୋପଟି ଆମ୍ବର ଲୋକେ ଭିକ୍ଷା ମାଗୁନାହାନ୍ତି, ସେମାନେ ସେମାନଙ୍କ ଅଧିକାର ମାଗୁଛନ୍ତି। ପାଣି କୌଣସି ଉପକାର ନୁହେଁଏହା ଜୀବନ। ଯଦି ଏବେ ମଧ୍ୟ ପ୍ରଶାସନ ନିରବ ରହେ, ତେବେ ଏହି ନିରବତାକୁ ଇତିହାସ କ୍ଷମା କରିବ ନାହିଁ। ଗୋଟିଏ ପାର୍ବତ୍ୟ ଗ୍ରାମକୁ ପାଣି ଯୋଗାଇପାରୁନଥିବା ସରକାର, "ଉନ୍ନତ ଭାରତ"ର ଦାବି କରିବାର ନୈତିକ ଅଧିକାର ହାରାଇଦେଉଛି