26-Jan-2026

ବରପାଲି (ସୁଦାମ ଦୀପ)
ଦେଶର ୭୭ତମ ସାଧାରଣତନ୍ତ୍ର ଦିବସ ଅବସରରେ ବରଗଡ଼ ଜିଲ୍ଲା ବିଜେପୁର ବ୍ଲକରେ ସାଧାରଣତନ୍ତ୍ର ଦିବସ ପାଳିତ ହୋଇଯାଇଛି। ବିଜେପୁର ହାଇସ୍କୁଲ ପଡିଆ ଠାରେ ଆୟୋଜିତ ବ୍ଲକ ସ୍ତରୀୟ   ବିଧାୟକ ଶ୍ରୀ ସନତ କୁମାର ଗଡତିୟା ମୁଖ୍ୟ ଅତିଥି ଭାବେ ଯୋଗଦେଇ ଜାତୀୟ ପତାକା ଉତ୍ତୋଳନ କରିଥିଲେ।ପତାକା ଉତ୍ତୋଳନ ପରେ ଜାତୀୟ ସଙ୍ଗୀତ ଗାନ ହୋଇଥିଲା ଏବଂ ସମଗ୍ର ପଡିଆ “ଜୟହିନ୍ଦ” ଓ “ବନ୍ଦେ ମାତରମ୍” ନାରାରେ ଗୁଞ୍ଜରିତ ହୋଇଉଠିଥିଲା। ସମାରୋହରେ ବ୍ଲକ ପ୍ରଶାସନର ଅଧିକାରୀ, ଜନପ୍ରତିନିଧି, ବିଭିନ୍ନ ବିଭାଗର କର୍ମଚାରୀ, ଶିକ୍ଷକ, ଛାତ୍ରଛାତ୍ରୀ ଓ ବହୁ ସାଧାରଣ ଜନତା ଉପସ୍ଥିତ ଥିଲେ।ଏହି ଅବସରରେ ବିଧାୟକ ଶ୍ରୀ ସନତ କୁମାର ଗଡତିୟା କହିଥିଲେ ଯେ, ସାଧାରଣତନ୍ତ୍ର ଦିବସ ହେଉଛି ଭାରତର ଗଣତାନ୍ତ୍ରିକ ପରମ୍ପରାକୁ ସ୍ମରଣ କରିବାର ଏକ ଐତିହାସିକ ଓ ପବିତ୍ର ଦିନ। ଏହି ଦିନ ଆମକୁ ସ୍ୱାଧୀନତା ସଂଗ୍ରାମୀମାନଙ୍କର ଅପାର ତ୍ୟାଗ ଓ ବଳିଦାନକୁ ସ୍ମରଣ କରାଇ ଦିଏ। ସେମାନଙ୍କ ତ୍ୟାଗର ଫଳରୂପ ଆଜି ଆମେ ଏକ ସ୍ୱାଧୀନ, ସାର୍ବଭୌମ ଓ ଗଣତାନ୍ତ୍ରିକ ଦେଶର ନାଗରିକ ଭାବେ ଗର୍ବ କରୁଛୁ।ବିଧାୟକ କହିଥିଲେ ଯେ, ଭାରତର ସମ୍ବିଧାନ ହେଉଛି ଆମର ସର୍ବୋଚ୍ଚ ଗ୍ରନ୍ଥ, ଯାହା ସମସ୍ତ ନାଗରିକଙ୍କୁ ସମାନ ଅଧିକାର, ସ୍ୱାଧୀନତା ଓ ନ୍ୟାୟ ପ୍ରଦାନ କରେ। ଡାକ୍ତର ଭୀମରାଓ ଆମ୍ବେଦକରଙ୍କ ନେତୃତ୍ୱରେ ରଚିତ ଏହି ସମ୍ବିଧାନକୁ ରକ୍ଷା କରିବା ଓ ତାହାର ଆଦର୍ଶକୁ ଜୀବନରେ ଅନୁସରଣ କରିବା ପ୍ରତ୍ୟେକ ଭାରତୀୟର କର୍ତ୍ତବ୍ୟ ବୋଲି ସେ ଉଲ୍ଲେଖ କରିଥିଲେ।ସେ ଆହୁରି କହିଥିଲେ ଯେ, ଗଣତନ୍ତ୍ର କେବଳ ଏକ ପ୍ରଣାଳୀ ନୁହେଁ, ଏହା ଏକ ଜୀବନ ଶୈଳୀ। ଆମେ ସମସ୍ତେ ମିଶି ସତ୍ୟ, ସହିଷ୍ଣୁତା, ଭାଇଚାରା ଓ ଶାନ୍ତିର ମୂଲ୍ୟବୋଧକୁ ଧାରଣ କରିଲେ ହେଲେ ମାତ୍ର ଦେଶ ଆଗକୁ ବଢ଼ିପାରିବ। ଏକ ସମୃଦ୍ଧ ଓ ବିକଶିତ ଭାରତ ଗଠନ ପାଇଁ ଯୁବପିଢ଼ି ଦେଶର ଉନ୍ନତିରେ ସକ୍ରିୟ ଭୂମିକା ନେବାକୁ ଆହ୍ୱାନ କରିଥିଲେ।ସମାରୋହରେ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀମାନେ ଦେଶଭକ୍ତିମୂଳକ ସଙ୍ଗୀତ, ନୃତ୍ୟ ଓ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ କରି ଉପସ୍ଥିତ ଦର୍ଶକଙ୍କ ମନ ଜିତିନେଇଥିଲେ। କାର୍ଯ୍ୟକ୍ରମ ଶେଷରେ ଦେଶର ଏକତା, ଅଖଣ୍ଡତା ଓ ସମ୍ବିଧାନିକ ମୂଲ୍ୟବୋଧକୁ ସୁରକ୍ଷିତ ରଖିବା ପାଇଁ ସମସ୍ତେ ସଂକଳ୍ପ ଗ୍ରହଣ କରିଥିଲେ।