26-Dec-2025

ବଲାଙ୍ଗିର, ଗତ କିଛିଦିନ ତଳେ ବାଲାଙ୍ଗୀର ସାଂସଦ ସଙ୍ଗୀତା କୁମାରୀ ସିଂଦେଓ ସର୍ବଭାରତୀୟସ୍ତରରେ ଶ୍ରେଷ୍ଠ ସାଂସଦ ଭାବରେ ଦିଲ୍ଲୀରେ ସମ୍ମାନିତ ହୋଇଥିଲେ। ଏହି ଅବସରରେ ବଲାଙ୍ଗୀର ଜିଲ୍ଲା ଓକିଲ ସଂଘ ପକ୍ଷରୁ ଆଜି ସ୍ଥାନୀୟ ସିଭିଲ କୋର୍ଟ ବାର୍ ହଲ୍ ଠାରେ ଆୟୋଜିତ ଏକ ସ୍ୱତନ୍ତ୍ର ଉତ୍ସବରେ ସାଂସଦ ଶ୍ରୀମତୀ ସିଂଦେଓଙ୍କୁ ମାନପତ୍ର ଓ ଉପାୟନ ଦେଇ ସମ୍ବର୍ଦ୍ଧନା ପ୍ରଦାନ କରାଯାଇଛି। ବଲାଙ୍ଗୀର ଜିଲ୍ଲା ଓକିଲ ସଂଘର ସଭାପତି ବାସୁଦେବ ରଥଙ୍କ ଆବାହକତ୍ୱରେ ଅନୁଷ୍ଠିତ ଏହି ସମ୍ବର୍ଦ୍ଧନା ସଭାରେ ସାଂସଦ ଶ୍ରୀମତୀ ସିଂଦେଓ ଯୋଗ ଦେଇ ବଲାଙ୍ଗୀରବାସୀଙ୍କ ଭଲପାଇବା ଓ ସମର୍ଥନ ଯୋଗୁଁ ମୁଁ ଏହି ପଦବୀ ପାଇଛି, ତେଣୁ ଏହାର ପ୍ରତିବଦଳରେ ଏ ଅଂଚଳର ପାଇଁ ସବୁବେଳେ ସେବାକାର୍ଯ୍ୟ ଜାରି ରଖିବି ବୋଲି କହିଥିଲେ । ଜଣେ ସଂସଦ ଭାବରେ ନିଜ ନିର୍ବାଚନମଣ୍ଡଳୀର ବିକାଶ ଚିନ୍ତା କରିବା ସ୍ୱଭାବିକ କଥା କିନ୍ତୁ ଅର୍ଥନୀତିକୁ ସୁଦୃଢ଼ କରିବା ଓ ଆଞ୍ଚଳିକ ବୈଷମ୍ୟବାଦକୁ ଦୂର କରିବା ପାଇଁ ପଶ୍ଚିମ ଓଡ଼ିଶାର ଏକ ସମତୁଳ ବିକାଶ ଜରୁରୀ। ସରକାରଙ୍କ ଉନ୍ନୟନମୂଳକ ପ୍ରକଳ୍ପ ସବୁ କେବଳ ଗୋଟିଏ ଜିଲ୍ଲାରେ ସୀମତି ନହୋଇ କିଛି ବଡ ପ୍ରକଳ୍ପ ବଲାଙ୍ଗୀର କିମ୍ବା ପଡୋଶୀ ଜିଲ୍ଲା ମାନଙ୍କରେ ମଧ୍ୟ ହେବା ଆବଶ୍ୟକ। ଏଥିପାଇଁ ରାଗ ଅଭିମାନକୁ ଭୁଲି ପଶ୍ଚିମ ଓଡ଼ିଶାର ଜିଲ୍ଲା ମାନଙ୍କୁ ନିଜ ନିଜ ହୃଦୟକୁ ବଡ କରିବାକୁ ହେବ ବୋଲି ସାଂସଦ ଶ୍ରୀମତୀ ସିଂଦେଓ କହିଥିଲେ। ବଲାଙ୍ଗୀର ଜିଲ୍ଲା ଓକିଲ ସଂଘର ଦୀର୍ଘ ଦିନର ଦାବି ହାଇକୋର୍ଟ ବେଂଚର ପୁନଃସ୍ଥାପନ ଦାବିକୁ ସମର୍ଥନ ଜଣାଇ ଶ୍ରୀମତୀ ସିଂଦେଓ ନିଜ ବକ୍ତବ୍ୟରେ ପାଟଣା ଷ୍ଟେଟ୍ ଅମଳରେ ଏଠାରେ ହାଇକୋର୍ଟ ବେଂଚ କାର୍ଯ୍ୟ କରୁଥିଲା ତେଣୁ ବଲାଙ୍ଗୀର ଓକିଲ ମାନଙ୍କର ଏହି ଦାବିର ଯଥାର୍ଥତା ରହିଛି ବୋଲି ଦୃଢ଼ୋକ୍ତି ପ୍ରକାଶ କରିଥିଲେ । ଏହି ଦାବିକୁ ନେଇ ଅତୀତରେ କେନ୍ଦ୍ରୀୟସ୍ତରର ନେତା ମାନଙ୍କ ସହ ଆଲୋଚନା କରାଯାଇଥିବା ବେଳେ ଭବିଷ୍ୟତରେ ଏହି ନ୍ୟାର୍ଯ୍ୟ ଦାବି ହାସଲ ପାଇଁ ମୁଁ ସ୍ୱରଉତ୍ତୋଳନ କରିବି ବୋଲି ଶ୍ରୀମତୀ ସିଂଦେଓ କହିଛନ୍ତି । ବରିଷ୍ଠ ଆଇନଜୀବୀ ଜୟକୃଷ୍ଣ ସାହୁଙ୍କ ସଂଯୋଜନାରେ ଅନୁଷ୍ଠିତ ଆଜିର ଏହି ସମ୍ବର୍ଦ୍ଧନା ସଭାରେ ଅନ୍ୟ ମାନଙ୍କ ମଧ୍ୟରେ ବରିଷ୍ଠ ଆଇନଜୀବୀ ଶଶୀଭୂଷଣ ପୁରୋହିତ, ଅମରେନ୍ଦ୍ର ମିଶ୍ର, ଭବାନୀ ଶଙ୍କର ଶତପଥୀ ଓ ବରିଷ୍ଠ ବିଜେପି ନେତା ଗୋପାଳଜୀ ପାଣିଗ୍ରାହୀ ପ୍ରମୁଖ ନିଜ ବକ୍ତବ୍ୟରେ ନୂତନ ସିଭିଲ କୋର୍ଟ ବିଲ୍ଡିଂ ନିର୍ମାଣ କାମକୁ ତ୍ୱରାନ୍ୱିତ କରିବା, ନୂତନ ବାର୍ ହଲ୍ ନିର୍ମାଣ ଓ ଲାଇବ୍ରେରୀ ହଲ୍ ର ଉନ୍ନତିକରଣ ଦିଗରେ ବଲାଙ୍ଗୀର ସାଂସଦଙ୍କ ଦୃଷ୍ଟି ଆକର୍ଷଣ କରିଥିଲେ । ଶେଷରେ ଜିଲ୍ଲା ଓକିଲ ସଂଘର ସଂପାଦକ ସଂଜୟ ବଗର୍ତ୍ତୀ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମକୁ ସଫଳ କରିବାରେ ସଂଘର ସଭ୍ଯ ଉମାଶଙ୍କର ସାହୁ, ଉପସଭାପତି ସୁଧଂଶୁ ଦେଓ, କୋଷାଧ୍ୟକ୍ଷ ସମୀର ମିଶ୍ର, କାର୍ଯ୍ୟକାରୀ କମିଟିର ଦିପ୍ତୀ ଶର୍ମା, ଭବାନୀ ଶଙ୍କର ଭୋଇ, ପ୍ରମୋଦ ତ୍ରିପାଠୀ, ଶିବ ଦ୍ଵିବେଦୀ ସବିତା ମିଶ୍ର ପ୍ରମୁଖ ସହଯୋଗ କରିଥିଲେ ।