27-Nov-2025

ବିନିକା(ହିମାଂଶୁ ଶେଖର ପୁଟେଲ)"ଜୟ ଗୋ ମାଁ ମାହେଶ୍ୱରୀ ତୁହି ହିଁ ଆମର ସାହା ଭରସା" ଆଦି ଭକ୍ତଙ୍କ ଧ୍ବନିରେ ଫୁଲମୁଠି ଗ୍ରାମ ପ୍ରକମ୍ବିତ ହୋଇଥିଲା ଗ୍ରାମରେ ମାଁ ଙ୍କ ନୂତନ ମନ୍ଦିର ପ୍ରତିଷ୍ଠା ପୂର୍ବରୁ ଆଜି ପବିତ୍ର ଗୁରୁବାର ଦିନରେ ଆଧ୍ୟାତ୍ମିକ ପରିବେଶ ମଧ୍ୟରେ ମନ୍ଦିର ଚୁଡ଼ରେ ରତ୍ନମୁଦ ସ୍ଥାପନ କାର୍ଯ୍ୟକ୍ରମ ବେଶ ଉତ୍ସାହ ଉଦ୍ଦୀପନା ମଧ୍ୟରେ ପାଳିତ ହୋଇଯାଇଛି।ବିନିକା ବ୍ଲକ ଅନ୍ତର୍ଗତ ଫୁଲମୁଠି ଗ୍ରାମରେ କେଉଁ ଆବାହନ କାଳରୁ ମାଁ ମାହେଶ୍ୱରୀ ଦେବୀ ପୂଜା ପାଉଛନ୍ତି ତାଙ୍କର ଭବ୍ୟ ନୂତନ ମନ୍ଦିର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେବାପରେ ଆସନ୍ତା ଫେବୃଆରୀ ମାସରେ ରୀତିନୀତି ଅନୁଯାୟୀ ମନ୍ଦିର ପ୍ରତିଷ୍ଠା ଉତ୍ସବ ପାଳନ ହେବ ।ଏନେଇ ଆଜି ମନ୍ଦିରରେ ରତ୍ନମୁଦ ସ୍ଥାପନ କରାଯାଇଥିଲା ।ଦେବୀଙ୍କ ବନ୍ଦନା ଗାନ ସହିତ ଭଜନ,କୀର୍ତ୍ତନ୍ୟର ତାଳେ ତାଳେ ଗ୍ରାମବାସୀ ଏକ ଶୋଭାଯାତ୍ରାରେ ମାହେଶ୍ୱରୀ ସ୍ନାନ ଘାଟ ନିକଟ ବଦବନ୍ଧକୁ ଯାଇଥିଲେ ।ସେଠାରେ ପୁରୋହିତ ବାସୁଦେବ ହୋତା ମନ୍ତ୍ର ଉଚ୍ଚାରଣ କରି ପୂଜା କାର୍ଯ୍ୟ ସମାପନ କରିବା ପରେ ଖରଖରି ଗଛକୁ ମନ୍ଦିରକୁ ଅଣାଯାଇ ମୂର୍ତ୍ତି ନିର୍ମାଣ କରାଯାଇଥିଲା । ମନ୍ଦିର ଚୁଡ଼ରେ ରତ୍ନମୁଦ ସ୍ଥାପନ ପୂର୍ବରୁ ସ୍ଥାନୀୟ ମଣ୍ଡପ ଠାରେ ପୂଜକ ଶ୍ରୀ ହୋତାଙ୍କ ତତ୍ତ୍ୱାବଧାନରେ ପୂଜା କାର୍ଯ୍ୟ ଆରମ୍ଭ ହୋଇଥିଲା ଏଥିରେ ମନ୍ଦିର ପ୍ରତିଷ୍ଠା କର୍ତ୍ତା ଭାବେ ବନମାଳି ମହାକୁର ଓ ତାଙ୍କ ଧର୍ମପତ୍ନୀ ମାଳତୀ ମହାକୁର ଦାୟିତ୍ଵ ନିର୍ବାହ କରିଥିଲେ।ପରେ ଶ୍ରଦ୍ଧାଳୁ ଭକ୍ତଙ୍କ ହରିବୋଲ ହୁଳହୁଳି ଧ୍ବନିରେ ମନ୍ଦିର ଚୁଡ଼ରେ ରତ୍ନମୁଦ ସ୍ଥାପନ କାର୍ଯ୍ୟକ୍ରମ ଆରମ୍ଭ ହୋଇଥିଲା ।ମାଁ ଙ୍କ ଆଶୀର୍ବାଦ ଏବଂ ସୁଖ ଦୁଃଖରେ  ମାଁ ସାହା ଭରସା ହେବାର ଆରାଧନା କରି ଲୋକେ ନିଜ ସ୍ଥିତିକୁ ଅନୁଶୀଳନ କରି ମାଁ ଙ୍କ ପାଇଁ କିଏ ସୁନା,ରୂପା,ତମ୍ବା ତ ଆଉ କିଏ ଟଙ୍କା,ପଇସା,ବିରି,ମୁଗ,ଚାଉଳ,ଧାନ ଅର୍ପଣ କରିଥିଲେ ।ମନ୍ଦିର ଚୁଡ଼ ଉପରକୁ ଭକ୍ତ ଉଠି ନିଜର ଅର୍ପିତ ସାମଗ୍ରୀକୁ ଦାନ କରିଥିଲେ ।ମନ୍ଦିର ଚୁଡ଼ାରେ ଥିବା ୩ଟି କୁମ୍ଭରେ ଦାନ ସାମଗ୍ରୀ ଭର୍ତ୍ତି କରାଯାଇଥିଲା ।କୁମ୍ଭ ଗୁଡିକ ସମ୍ପୂର୍ଣ୍ଣ ଭର୍ତ୍ତି ହେବାପରେ ଉପସ୍ଥିତ ଶ୍ରଦ୍ଧାଳୁ ଭକ୍ତଙ୍କ ଜୟ ଧ୍ବନିରେ ମନ୍ଦିର ପରିସର କମ୍ପି ଉଠିଲା।ଶେଷରେ ସମସ୍ତ ଶ୍ରଦ୍ଧାଳୁ ଭକ୍ତ ମାଁ ଙ୍କ ଆଶୀର୍ବାଦ ନେଇଥିଲେ ।ଏହି ରତ୍ନମୁଦ ସ୍ଥାପନ କାର୍ଯ୍ୟକ୍ରମରେ ମନ୍ଦିର ପ୍ରତିଷ୍ଠା କମିଟିର ସମସ୍ତ ସଦସ୍ୟ ଓ ଗ୍ରାମବାସୀ ସମ୍ପୂର୍ଣ୍ଣ ସହଯୋଗ କରିଥିଲେ।