15-Nov-2025

ବିନିକା(ହିମାଂଶୁ ଶେଖର ପୁଟେଲ)ବିନିକା କଂଶାରିପଡ଼ା ବ୍ରଜବିହାରି ନୃତ୍ୟକଳା ପରିଷଦ ତରଫରୁ ଚାଲିଥିବା ଗୋକୁଳାଷ୍ଟମୀ ମହୋତ୍ସବର ଶୁକ୍ରବାର ଷଷ୍ଠ ଦିବସରେ ନଟଖଟିଆ କୃଷ୍ଣଙ୍କ ସାହସିକତାରେ ସାରା ଗୋପପୁରବାସୀ ଉତ୍ସବ ମନାଇବା ସହିତ କୃଷ୍ଣ ବଳରାମଙ୍କୁ ଦୋଳିରେ ଝୁଲାଇ "ହାତୀ ଝୁଲଇ ଗୋ କେଡେ ସୁନ୍ଦର ଦିଶେ" ଆଦି ସୁନ୍ଦର ଗୀତ ଗାନ କରି ଭକ୍ତି ମୟରେ ମଜ୍ଜି ଯାଇଥିଲେ ।ସେହିପରି କୃଷ୍ଣ ମାତା ଯଶୋଦାଙ୍କ ବାସଲ୍ୟ ପ୍ରେମରେ ଗୋପରେ ନନ୍ଦୋତ୍ସବ ପାଳିତ ହୋଇଥିବା ଦେଖିବାକୁ ମିଳିଥିଲା ଦଧିବାମନ ମନ୍ଦିର ପ୍ରାଙ୍ଗଣରେ। ଅନ୍ୟ ପକ୍ଷରେ ଯୋଗେଶ୍ୱର ମନ୍ଦିର ବନଦୂର୍ଗା ପ୍ରାଙ୍ଗଣ ମଥୁରା ନଗରୀ ରାଜ ଦରବାରରେ ମହାରାଜ କଂସ ରଙ୍ଗ ସଭା ଆୟୋଜନ କରିଥିଲେ । ଦୈବବାଣୀରେ ବିଚଳିତ କଂସ ମନ୍ତ୍ରୀଙ୍କ ପରାମର୍ଶ କ୍ରମେ ଧେନୁକାସୁର ରାକ୍ଷସକୁ ଡକାଇ ଗୋପପୁର ପ୍ରେରଣ କରିଥିଲେ ।ପରେ ମଥୁରା ନଗରୀ ବାସୀଙ୍କ ମନୋରଞ୍ଜନ ସକାଶେ ଦରବାରରେ କଳାକାର ମାନଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା ।ଗୋପରେ ଧେନୁକାସୁର ପହଞ୍ଚିବା ପରେ ବିଭିନ୍ନ ସ୍ଥାନରେ ଆତଙ୍କରାଜ ଚଳାଇବା ଜାଣି କୃଷ୍ଣ ତା ପାଖକୁ ଯାଇ ଯୁଦ୍ଧ କରି ନିଧନ କରିଥିଲେ ।  କଂସର ନିମନ୍ତ୍ରଣ କ୍ରମେ ଦରବାରରେ ରାଜକୀୟ ଅତିଥି ଭାବେ ରାଜନୈତିକ ବ୍ୟକ୍ତି ବିଶେଷ ଯୋଗଦେଇ ସାଂସ୍କୃତିକ ବାର୍ତ୍ତା ପ୍ରଦାନ କରିଥିଲେ।ଏହି ଅବସରରେ କମିଟି ସଭାପତି ମନୋଜ ଦାସ ସଭାପତିତ୍ତ କରିଥିବା ବେଳେ ସମ୍ପାଦକ ଅତିଥି ପରିଚୟ ପ୍ରଦାନ ଏବଂ ହିମାଂଶୁ ଭୂଷଣ ପଣ୍ଡା,ସୌମ୍ୟ ରଞ୍ଜନ ପୂଜାରୀ,ବିରଞ୍ଚି ନାରାୟଣ ମେହେର ମଞ୍ଚ ପରିଚାଳନା କରିଥିଲେ ।