09-Nov-2025

ଚୁଙ୍ଗୁରିପାଲି(ଅରବିନ୍ଦ ମିଶ୍ର)- ବୟସ ମାତ୍ର ୧୬ । ଚଳିତ ବର୍ଷ ମାଟ୍ରିକ ପାସ କରିଛି । ସମସ୍ତଙ୍କ ପରି ପାଠ ପଢି ଆଗକୁ ବଢିବାର ପ୍ରବଳ ଇଚ୍ଛା ଶକ୍ତି ରହିଛି । କିନ୍ତୁ ଏହି ଇଚ୍ଛା ଶକ୍ତିକୁ ଅଟକାଇ ଦେଇଛି ଚାଲିବାର ସାମର୍ଥ୍ୟ । ଜନ୍ମରୁ ଦୁଇ ଗୋଡ ଅକାମୀ । ଯୁଆଡେ ଯିବ ମାଆର ଭରସା । ତାଙ୍କୁ କାଖେଇ କରି ନେବା ଆଣିବା କରନ୍ତି । ଏଭଳି ଏକ ଦୁଃଖନୀ ଝିଅ ହେଉଛି ସଙ୍ଗୀତା ମେହେର । ରହୁଛନ୍ତି ଡୁଙ୍ଗୁରିପାଲିର ଏକ ଅପରିଚିତ ଆଶ୍ରୟ ନେଇ । ଘର ନାହିଁ । ଜମି ନାହିଁ । ଅନ୍ୟର ସାହାରରେ ମାଆ ଝିଅ ରହୁଛନ୍ତି । ବାପା ଘନଶ୍ୟାମ ମେହେର ଗତ ତିନି ବର୍ଷ ତଳୁ ଆରପାରିରେ । ମାଆଝିଅ ଡୁଙ୍ଗୁରିପାଲି ସ୍କୁଲ ସମ୍ମୁଖରେ ଜରି ଟଣା ହୋଇଥିବା ଏକ ଛୋଟିଆ ଫଳ ଦୋକାନ କରିଛନ୍ତି । ମାଆ ସୁରେଖା ମେହେର ପ୍ରତ୍ୟେକ ଦିନ ଝିଅକୁ କାଖେଇ ଆଣିଥାନ୍ତି । ମାଆ ଏଣେତେଣେ ଯିବା ବେଳେ ଝିଅଟି ଫଳ ଦୋକାନରେ ବସି ଥାନ୍ତି । ଶତକଡା ୮୦ ଭାଗ ଦିବ୍ୟାଙ୍ଗ ହୋଇଥିବାରୁ ଚଳନ ଶକ୍ତି ସଂପୂର୍ଣ ଅଟକି ରହିଛି । ମାଟ୍ରିକ ପାସ କରିଥିଲେ ମଧ୍ୟ କଲେଜ ପଢିବାର ସ୍ବପ୍ନ ଆଶାରେ ରହିଯାଇଛି । ସାଙ୍ଗମାନେ କଲେଜ ଯାଉଥିବା ବେଳେ ଦିବ୍ୟାଙ୍କ ଝିଅଟି ରାସ୍ତା କଡର ଫୁଟପାଥରେ ଫଳ ବିକ୍ରୀ କରୁଥିବା ଦୃଶ୍ୟ ଯେକେହି ସଚେତନ ବ୍ୟକ୍ତିର ମାନସିକତାକୁ ଆଘାତ କରିବ । କଲେଜ ଯିବାକୁ ହେଲେ କାହାର ସାହାରା ନ ହେଲେ ଯାଇ ପାରିବ ନାହିଁ । ଘର ପାଖରେ ସ୍କୁଲ ଥିବାରୁ ମାଆ ନେବା ଆଣିବା କରୁଥିଲେ । କଲେଜ ଦୂରରେ ରହୁଥିବାରୁ ପ୍ରତ୍ୟେହ ଦିନ ନେବା ଆଣିବା ସମ୍ଭବ ନୁହେଁ । ମାଁ ଗୋଡ କାଢିଲେ ମାଆ ଝିଅର ପେଟ ଚଳିବ ।ଏଣୁ ଝିଅକୁ କଲେଜ ନେବା ଓ ଆଣିବା ମଧ୍ୟ ସମ୍ଭବ ହେଇ ନାହିଁ । ୧୦କେଳି ଚାଉଳ ଏବଂ ଝିଅର ୧୦୦୦ଟଙ୍କା ପ୍ରଶାସନ ପକ୍ଷରୁ ସହାୟତା ବ୍ୟତୀତ ଅନ୍ୟ କିଛି ନାହିଁ। ଶତକଡା ୮୦ଭାଗ ଦିବ୍ୟାଙ୍କ ହୋଇଥିରେ ମଧ୍ୟ ସେ ନାର୍ଯ୍ୟ  ଭତ୍ତା ପାଉ ନାହିଁ । ପ୍ରଶାସନ ପକ୍ଷରୁ ଏକ ବ୍ୟାଟେରୀ ଚାଳିତ ସାଇକେଲ ପାଇଲେ ସେ କଲେଜ ଯାଇ ପାରନ୍ତା ବୋଲି ପ୍ରେରଣା ପ୍ରତିନିଧ କୁ ମାଧ୍ଯମରେ ମାଆ ଝିଅ ପ୍ରସାଶନର ଦୃଷ୍ଟି ଆକର୍ଷଣ କରିବାକୁ କହିଛନ୍ତି । ବର୍ତମାନ ସୁବର୍ଣ୍ଣପୁର ଜିଲ୍ଲାରେ ଜଣେ ଦରଦି ଜିଲ୍ଲାପାଳ ଯୋଗ ଦେଇଛନ୍ତି । ଦିବ୍ୟାଙ୍ଗ ଝିଅର ଗୁହାରି ଶୁଣି ପଦକ୍ଷେପ ଗ୍ରହଣ କଲେ କଲେଜ ଯାଇ ପାରନ୍ତା ।