29-Sep-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ଥିବା ମାହେଶ୍ୱରୀ ପୀଠରେ ଦେବୀଙ୍କ ସ୍ନାନ ଯାତ୍ରା ଓ ମହାଷ୍ଟମୀ ପୂଜା ଧୂମଧାମରେ ପାଳିତ ହୋଇଯାଇଛି।ପ୍ରକାଶ ଥାଉ କି ଯେ ଦେବୀଙ୍କ ପୀଠରେ ଚଳିତ ପୁଅ ଜୁନ୍ତିଆ ଠାରୁ ଆରମ୍ଭ ହୋଇଥିବା ଷୋହଳ ପୂଜା ଆଜି ଅନ୍ତିମ ଦିନରେ ପହଞ୍ଚିଥିଲା ।ଏହି ପରିପ୍ରେକ୍ଷୀରେ ଫୁଲମୁଠି ଠାରେ ଅନୁଷ୍ଠିତ ମାହେଶ୍ୱରୀଙ୍କ ପୂଜା ଅନ୍ୟତମ ।ଆଜି ଅପରାହ୍ନରେ ଦେବୀ ମାହେଶ୍ୱରୀ ଓ ବାଡ଼ି ଦେବତାଙ୍କୁ ମନ୍ଦିର ଦେହେରୀ ଯଥାରିତ ପୂଜାର୍ଚ୍ଚନା କରିବା ପରେ ଜୟ ଜୟ ଧ୍ବନିରେ ମନ୍ଦିରରୁ ବାଡ଼ି ଦେବତା,ଛତର କୁ ବାହାର କରିଥିଲେ। ଏହି ଅବସରରେ ମନ୍ଦିର ସମ୍ଭୂଖ ପରିସରରେ ଥିବା ହଜାର ହଜାର ଶ୍ରଦ୍ଧାଳୁ ଦେବୀଙ୍କ ଦର୍ଶନ କରିବାର ସୁଯୋଗ ପାଇଥିଲେ।ହୁଳହୁଳି ସହ ଘଣ୍ଟବାଦ୍ୟର ତାଳେ ତାଳେ ବାଡ଼ି ଦେବତା,ଛତର କୁ ଏକ ଶୋଭାଯାତ୍ରାରେ ମନ୍ଦିର ସେବାୟତ ମାନେ ସ୍ନାନ ପାଇଁ ପୁଣ୍ୟତୋୟା ପାପକ୍ଷୟ ଅଭିମୁଖେ ଯାଇଥିଲେ । କଳାହାଣ୍ଡି ର ଘୁମୁରା ବାଦ୍ୟ ଭକ୍ତଙ୍କୁ ବାନ୍ଧି ରଖିଥିଲା ।ବାଡ଼ି ଦେବତା ସ୍ନାନ ସାରି ଫେରିବା ବେଳେ ଉରଲେ ସ୍ଥିତ ରଘୁନାଥ ମନ୍ଦିର ପ୍ରାଙ୍ଗଣରେ ଗ୍ରାମବାସୀଙ୍କ ତରଫରୁ ବିଧି ରୀତି ଅନୁସାରେ ପୂଜାର୍ଚ୍ଚନା କରାଯାଇଥିଲା ।ପରେ ବାଡ଼ି ଦେବତା ନିଜ ଗ୍ରାମ ଅଭିମୁଖେ ଫେରି ଘର ଘର ପୂଜା ପାଇଥିଲେ ।ଏହି ଅବସରରେ ଭାଇର ଶୁଭ ମଙ୍ଗଳ ପାଇଁ ଉପବାସ କରିଥିବା ଭଉଣୀ ମା ମାହେଶ୍ୱରୀ ଦେବୀଙ୍କ ଠାରେ ପୂଜାର୍ଚ୍ଚନା ପୂର୍ବକ ଭାଇ ହାତରେ ଜୁନ୍ତିଆ ବାନ୍ଧି ଥାନ୍ତି।ବ୍ଲକର ଡ଼ଭଲା, ଅରିଗାଁ,ବଲାରଙ୍ଗା,ଭଣ୍ଡାର,ଗୁଲୁଣ୍ଡା, କର୍ତଙ୍ଗ ପ୍ରଭୃତି ସ୍ଥାନରେ ମାହେଶ୍ୱରୀ ଙ୍କ ସ୍ନାନ ଯାତ୍ରା ଆନନ୍ଦ ଉଲ୍ଲାସ ମଧ୍ୟରେ ପାଳିତ ହୋଇଥିବା ଜଣାପଡିଛି ।