04-Aug-2025

ଡୁଙ୍ଗୁରିପାଲି(ଅରବିନ୍ଦମିଶ୍ର): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଏକ କୃଷିବହୁଳ ଅଞ୍ଚଳ । ବିନିକା ଓ ଡୁଙ୍ଗୁରିପାଲି ବ୍ଲକକୁ ନେଇ କୃଷି ଜିଲା ରହିଛି। ଏହାର କାର୍ଯ୍ୟାଳୟ ଡୁଙ୍ଗୁରିପାଲିରେ ରହିଥ‌ିବା ବେଳେ ଉଭୟ ବ୍ଲକ ପାଇଁ ଏହା କାର୍ଯ୍ୟ କରିଥାଏ। ହୀରାକୁଦ କେନାଳ ଜଳସେଚିତ ଅଞ୍ଚଳ ରହିଥ‌ିବା ବେଳେ ବିନିକା ବ୍ଲକ ମହାନଦୀ କୂଳରେ । ଡୁଙ୍ଗୁରିପାଲି ବ୍ଲକ ଅଙ୍ଗ ନଦୀ ରହିଥ‌ିବାରୁ ଉଭୟ ବ୍ଲକ କେନାଲ ଓ ନଦୀ ପାଣିରେ ଚାଷ କରିଥାନ୍ତି । ବଡବଡ ଚାଷୀ ମଧ୍ୟ ଏହି ଅଞ୍ଚଳରେ ରହିଛନ୍ତି । ଚାଷୀମାନଙ୍କୁ ବିଭିନ୍ନ ସମୟରେ ନକଲି ବିହନ ଧାନଠାରୁ ଆରମ୍ଭ କରି କୀଟନାଶକ ଔଷଧ, ସାର ଅଡୁଆରେ ପକାଇ ଥାଏ । ଚାଷୀମାନଙ୍କୁ ବିଭିନ୍ନ ଲୋଭଦେଖାଇ ଏହି ଅଞ୍ଚଳରେ ଅନେକ ଗୁଡ଼ିଏ ସାର ଓ କୀଟନାଶକ ଦୋକାନ ରହିଛି । ଛତୁଫୁଟିଲା ଭଳି ଦୋକାନ ଗୁଡ଼ିକୁ ଅଧିକାରୀମାନେ ଲାଇସେନ୍ସ ପ୍ରଦାନ କରିଛନ୍ତି। ଲାଇସେନ୍ସ ପ୍ରଦାନ ପରେ ସେମାନ କେଉଁ କଂପାନୀର ସାର, କୀଟନାଶକ, ବିହନ ବିକ୍ରି କରୁଛନ୍ତି ଏହା ଉପରେ ବିଭାଗ ଧ୍ୟାନ ଦେଉ ନାହାନ୍ତି । ସାଉଁଟି ଆଣିଲା ଭଳି ବିଭିନ୍ନ କମ୍ପାନୀର ଷ୍ଟିକର ବ୍ୟବହାର କରି ନିରୀହ ଚାଷୀମାନଙ୍କୁ ଲୁଟି ଚାଲିଛନ୍ତି । ଆଜି ଯିଏ ସାମାନ୍ୟ ଦୋକାନ ଟିଏ କରିଛି, କିଛି ବର୍ଷ ତଳେ କାହିଁରେ କାହିଁ ଚଳୁଛି। ଗାଡି ମଟର, ବଙ୍ଗଳା ଠିକା କରିବା ସହ ବିଦେଶ ବୁଲି ଯିବାର ଅଫର କମ୍ପାନୀଠାରୁ ପାଉଛନ୍ତି। ଅନ୍ୟ ପକ୍ଷରେ ଚାଷୀ ଶୋଷଣର ଶୀକାର ହେଉଛନ୍ତି। ବିଭାଗୀୟ ଅଧିକାରୀମାନେ ମଧ୍ଯ ବିଭିନ୍ନ ସମୟରେ ନାମକୁ ମାତ୍ର ଚଢ଼ଉ, ତଦନ୍ତ କରି ମାସିକିଆ କୋଟାରୁ ଆରମ୍ଭ କରି ପଦ ଅନୁସାରେ ୬ମାସିଆ କୋଟାରେ ଚାଷୀଙ୍କ ସ୍ବାର୍ଥକୁ ବିକ୍ରି କରି ଦେଉଛନ୍ତି । ଏହି ଅଞ୍ଚଳରେ କେତେକ ଦୋକାନରେ ନ‌କଲି ସାର କାରବାର ଚାଲିଥିବା ଆଲୋଚନା ହେଉଛି । ବର୍ତ୍ତମାନେ ଚାଷୀ ଗ୍ରାମର ସାର ୨୮-୨୮-୦ର ଆବଶ୍ୟକତା ବାରୁ କେତେକ ଦୋକାନୀ ଉକ୍ତ ବସ୍ତାର ଲଗୋ ଥିବା ବ୍ୟବହାର କରି ୨୦-୨୦-୦ ସାରକୁ ଭକ୍ତ ବସ୍ତାରେ ବିକ୍ରି କରି ଲାଭବାନ ହେଉଛନ୍ତି । ଏହି ଖବର ବିଭାଗୀୟ ଅଧିକାରୀ ମାନଙ୍କ ପାଖରେ ଥିଲେ ମଧ୍ୟ ଚୁପ । ଚାପରେ ଚେପା ବିଭାଗ ନା ଭିତରି ସଲସୁତୁରା ଚାଲିଛି ବୋଲି ଆଲୋଚନା ହେଉଛି l