10-Oct-2020

ମାଲକାନଗିରି,10/10- ମାଲକାନଗିରି ଜିଲ୍ଲା ପଡିଆ ବ୍ଳକ କାଲଦାପଲ୍ଲୀ ପଞ୍ଚାୟତ ଅନ୍ତର୍ଗତ  ଦୁର୍ଗମ ଉଦୟଗିରି ଗ୍ରାମରେ ଗୁଣି ଗାରେଡ଼ି କରୁଥିବା ସନ୍ଦେହ କରି ବାଗା କାବାସୀ ନାମକ ଜଣେ ଲୋକ କୁ ସ୍ଥାନୀୟ ଅଞ୍ଚଳର କିଛି ଲୋକ ମାରିଦେବା ସହ ପ୍ରମାଣ ନଷ୍ଟ କରିବା ପାଇଁ ଶବକୁ ପାଖରେ ଥିବା ବଣକୁ ନେଇ ପୋଡି ଦେଇଥିଲେ। ଦୁର୍ଗମ ଅଞ୍ଚଳରେ ଘଟିଥିବା ଏଭଳି ହତ୍ୟାକାଣ୍ଡ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିବା ବେଳେ ଅପରାଧି ଙ୍କ ବିରୋଧରେ ପୋଲିସ ର କାର୍ଯ୍ୟାନୁଷ୍ଠାନ ପ୍ରତି ସମସ୍ତଙ୍କ ନଜର ରହିଥିଲା। ତେବେ ପୋଲିସ ପକ୍ଷରୁ ବିଭିନ୍ନ ଲୋକଙ୍କୁ ଉଠାଇ ପଚରାଉଚୁରା କରିବା ପରେ ଆଜି ଦୁଇ ମୁଖ୍ୟ ଆସାମୀ ସମେତ ମୋଟ ପାଞ୍ଚଜଣଙ୍କୁ କୋର୍ଟ ଚାଲାଣ କରିଛି। ସୂଚନା ମୁତାବକ ଗତ ଏକ ବର୍ଷ ମଧ୍ୟରେ ଅଭିଯୁକ୍ତ ଗଙ୍ଗା ପଡିଆମି ର ମା ଓ ଭୀମା କାରାମ  ର ବାପା ଙ୍କୁ ସେହି ଗ୍ରାମର ବାଗା କାବାସୀ ଗୁଣିଗାରେଡ଼ି କରି ମାରିଦେଇଥିବା ସନ୍ଦେହ କରିଥିଲେ। ଗତ ବୁଧବାର  ଦିନ ପ୍ରାୟ ୨ ଟା ବେଳେ ଅଭିଯୁକ୍ତ ଦୁଇଜଣ ମୃତ ବାଗା କାବାସୀ ଙ୍କ ଘରକୁ ଆସି ଏକ ଲାଠି ଓ ଦୌଡ଼ି ସାହାଯ୍ୟରେ ମାରିବାକୁ ଚେଷ୍ଟା କରିଥିଲେ। ଏଥିସହ ଗଙ୍ଗା ପଡିଆମି ଏକ କୁରାଢ଼ି ସାହାଯ୍ୟରେ ବାଗା ର ମୁଣ୍ଡ ଓ ବେକକୁ ପ୍ରହାର କରିବାରୁ ସେଠାରେ ହିଁ ବାଗା ର ମୃତ୍ୟୁ ହୋଇଥିଲା। ଏହାପରେ ପ୍ରମାଣ ନଷ୍ଟ କରିବା ପାଇଁ ଅନ୍ୟକିଛି ସହଯୋଗୀଙ୍କ ସହ ଉଭୟ ବାଗା ର ମୃତ ଶରୀର କୁ ଗ୍ରାମ ନିକଟସ୍ତ ମଶାଣିରେ ପୋଡ଼ି ଦେଇଥିଲେ। ତେବେ ଗତ ବୁଧବାର ରାତିରେ ମୃତ ବାଗା ର ସ୍ତ୍ରୀ ପଡିଆ ଥାନାରେ ଲିଖିତ ଅଭିଯୋଗ କରିବା ପରେ ପଡିଆ ଥାନାରେ କେସ୍ ନଂ ୪୩ /୨୦, ଧାରା ୩୦୨/୨୦୧ /୩୪ ଆଇ ପି ସି ଏକ ମାମଲା ରୁଜୁ କରି ଘଟଣାର ତଦନ୍ତ ଜାରୀ ରହିଥିଲା। ତଦନ୍ତ ରେ ପୋଲିସ ମୁଖ୍ୟ ଆସାମୀ ସମେତ ଅନ୍ୟ ୩ ଜଣ ସହଯୋଗୀଙ୍କୁ ଗିରଫ କରିବା ସହ ସେମାନଙ୍କ ଠାରୁ ହତ୍ୟା ବେଳେ ବ୍ୟବହୃତ କୁରାଢ଼ି ମଧ୍ୟ ଜବତ କରାଯାଇଥିବା ଜଣାପଡିଛି। ଆଜି ସମସ୍ତ ଅଭିଯୁକ୍ତଙ୍କୁ ସ୍ଵାସ୍ଥ୍ୟ ପରୀକ୍ଷା କରାଯିବା ପରେ କୋର୍ଟ ଚାଲାଣ କରାଯାଇଥିବା ପଡିଆ ଥାନା ଅଧିକାରୀ ରଞ୍ଜନ କୁମାର ମାଝୀ କହିଛନ୍ତି।