03-Aug-2025

ବରୀ (ରଞ୍ଜିତ ମହାନ୍ତି): ଗୋଳକୁଣ୍ଡ ଇନ୍ଦୁପୁର ରାସ୍ତାର ମିର୍ଜାପୁର ଅଂଶରେ ପ୍ରାୟ ଦେଢ଼ ବର୍ଷରୁ ଉର୍ଦ୍ଧ୍ବ ହେବ ବାଡ଼ ପୋତା ଯାଇଛି। ଫଳରେ ମୁଖ୍ୟ ରାସ୍ତାଟି ଏଠାରେ ଅଣଓସାରିଆ ହୋଇଯିବା ଯୋଗୁଁ ଯାତାୟାତରେ ଅସୁବିଧା ଦେଖାଦେଇଛି । ସରକାରୀ ନକ୍ସାରେ ଏଠାରେ ରାସ୍ତା ନାହିଁ । ପୂର୍ବରୁ ଜରି ଘାଇ ବନ୍ଧ ପାଖରୁ ବଣିଆ ସାହି ପର୍ଯ୍ୟନ୍ତ ଏକ ପାଦ ଚଲା ରାସ୍ତା ରହିଥିଲା। ପ୍ରଥମେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଗୋଳକୁଣ୍ଡ ଇନ୍ଦୁପୁର ରାସ୍ତା ନିର୍ମାଣ କରାଯିବା ସମୟରେ ଜରି ଘାଇ ବନ୍ଧ ପାଖରୁ ଗାଆଁ ଭିତର ରାସ୍ତାକୁ ବାଦ ଦିଆଯାଇ ଏହି ରାସ୍ତା ନିର୍ମାଣ କରାଯାଇଥିଲା। ରାସ୍ତା ହେଲା ପରେ ଗାଆଁ ଭିତରୁ ଲୋକମାନେ ଧୂରେଟ୍‌ରେ ରାସ୍ତା କଡ଼କୁ ଉଠି ଆସିଲେ। ମିର୍ଜାପୁର ଏହି ଅଂଶରେ ରାସ୍ତା କଡ଼କୁ ମନ୍ଦିର ନିର୍ମିତ ହୋଇଛି । ମନ୍ଦିରର ଆର ପଟରେ ଜଣେ
ବ୍ୟକ୍ତି ଘର ମଧ୍ୟ କରିଛନ୍ତି । ଗତ ୨୦୨୨ ମସିହାରେ ଗ୍ରାମ୍ୟ ଉନ୍ନୟନ ରାସ୍ତା ଯେତେବେଳେ ଗୃହ ଓ ରାସ୍ତା ନିର୍ମାଣ ବିଭାଗ ଅଧାନକୁ ଗଲା ସେତେବେଳକୁ ବିଭାଗୀୟ ନିୟମ ଅନୁଯାୟୀ ପୁରୁଣା ରାସ୍ତାରେ ମରାମତି
ବା ନିର୍ମାଣ କରାଯାଇ ଏହାକୁ ଚଉଡ଼ା କରାଗଲା। ତେବେ ମନ୍ଦିର ଓ ବ୍ୟକ୍ତିଗତ ଜମି ଭିତରେ ପୁରୁଣା ରାସ୍ତାଟି ବ୍ୟବଧାନ ଥିବାରୁ ଆଉ ଅଧିକ ଚଉଡ଼ା ସମ୍ଭବ ହେଲା ନାହିଁ । ରାସ୍ତା କଡ଼ ଘର ମାଲିକଙ୍କର ଯାଗା ମନ୍ଦିର
ପାଚେରି ଭିତରକୁ ଥ‌ିବା ଦର୍ଶାଇ ସେ ନିଜ ଘର ପଟକୁ ରାସ୍ତା ଚଉଡ଼ା ହେବାର ଚାହିଁ ନଥିଲେ । ଫଳରେ ପୁରୁଣା ରାସ୍ତା ସୀମାନ୍ତ ଉପରେ ସେ ବାଡ଼ ପୋତି ଦେଇଛନ୍ତି। ବାଡ଼ ଓ ମନ୍ଦିର ଭିତରେ ମାତ୍ର ୮ ଫୁଟ୍ ରହିଛି। କେବଳ ଅଟୋ ଓ ଛୋଟିଆ ଚାରି ଚକିଆ ଯାନ ଏହି ବାଟ ଦେଇ ଯାତାୟାତ କରି ପାରୁଥିବା ବେଳେ ବଡ଼ ଗାଡ଼ି ଓ ଆମ୍ବୁଲାନ୍ସ ଏହି ବାଟ ଦେଇ ଯାଇ ପାରୁ ନାହିଁ। ମୁଖ୍ୟ ରାସ୍ତା ଉପରେ ଏହା ଏକ ସ୍ପର୍ଶକାତର ଘଟଣା ହୋଇଥିଲା ପ୍ରଶାସନିକ ଅଧିକାରୀମାନେ ନୀରବ ରହିବା ଘଟଣା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ପ୍ରଶାସନ ଏହାର ସମାଧାନ ସ୍ବରୂପ ମାପ ଚୁପ କରାଇ ଏଠାରେ ରାସ୍ତାଟିକୁ ଯାତାୟାତ ଉପଯୋଗୀ କରାଇବା ପାଇଁ ସାଧାରଣରେ ଦାବି ହେଉଛି।